1 <<Ta̱wa̱i, yaba dem vu na wi a kupana kakuli,

ta̱wa̱i a̱ ubuta̱ u mini,

vuza na baci de dem wi n ikebe ba,

u ta̱wa̱, u tsula ili ka̱ta̱ u lyaꞋa.

Ta̱wa̱i, i gasa ma̱kya̱n m mani

babu ikebe ko babu katsupu.

2 Yiɗa̱i i zuwai ɗa i la̱nga̱sa̱i ikebe i ɗa̱ a̱ ubuta̱ wi ili i na yi ilikulya ba,

adama a̱ yiɗa̱i yi a̱ kula̱nga̱sa̱ ikebe i katsupu i ɗa̱ a̱ ubuta̱ wi ili i na yi a̱ kuciya̱ punu ili ba?

Panakai mu mayin, lyaꞋi ili i singai,

ka̱ta̱ i ɓa̱nka̱ wuma u ɗa̱ n ilikulyaꞋa i singai.

3 Zuwakai mu atsuvu ka̱ta̱ i ta̱wa̱ wa̱ va̱,

panakai mu, adama a na wuma u ɗa̱ u yongo lo.

Mi ta̱ a kuyaꞋan uzuwakpani n a̱ɗa̱ u na u kukpa̱ɗa̱ kukotso,

mi ta̱ e kuneke ɗa̱ ucigi u mayun u na u tsu kpa̱ɗa̱ kukotso tsu na n yaꞋankai Dawuda.

4 La̱na̱i, n zuwa yi ta̱ wo okpo magaꞋan a̱ ubuta̱ u uma,

vuzagbayin n kovonshi ka uma.

5 Mayun yi ta̱ e kuɗeke uma a̱ likuci kakau i na i yevei ba,

ka̱ta̱ likuci i na i yevei ɗa̱ ba i suma a̱ kuta̱wa̱ wa̱ ɗa̱,

adama a Vuzavaguɗu Ka̱shile ka̱ ɗa̱,

n Vuza Ciɗa va aza a Isaraila,

adama a na a̱yi ɗa u nekei ɗa̱ tsugbayin.>>

6 La̱nsa̱i Vuzavaguɗu a ayin a na wi kuciya̱,

ɗekei ni a makyan ma na wi ɗevu.

7 YaꞋan vuza gbani-gbani u ka̱sukpa̱ uye u gbani-gbani u ni,

ka̱ta̱ vuza na u kpa̱ɗa̱i kusuɓa̱ u ka̱sukpa̱ feu kusheshe ku ni,

yaꞋan u bono u tono Vuzavaguɗu adama a na u pana asuvayali a̱ ni,

n Ka̱shile ka̱ tsu, a̱yi na u kucinukpaka le unushi u le ba̱ri.

8 Vuzavaguɗu u danai,

<<Adama a na kusheshe ku va̱ ku ɗaɗa kusheshe ku ɗa̱ ba, nwalu n ɗa̱ n ɗaɗa nwalu n va̱ ba.>>

9 <<Uteku tsu na gaɗi wi daꞋangi n iɗika,

ta feu nwalu n va̱ mi daꞋangi nu nwalu n ɗa̱ nannai,

kusheshe ku va̱ kpamu ku laꞋa ta̱ kusheshe ku ɗa̱.

10 Tsu na mini ma zuva n kuta̱nu ku minimatali

a̱ tsu uta̱ gaɗi,

ka̱ta̱ kpamu a̱ kpa̱ɗa̱ kubono ɗe

sai a̱ ta̱na̱ta̱ngu iɗika ali i ɗa i ta̱na̱ ka̱ta̱ i shama,

nannai aza a̱ vica̱Ꞌa̱ a̱ kuciya̱ kuca̱Ꞌa̱,

ka̱ta̱ aza a na a kulyaꞋa ilikulya a̱ ciya̱ a lyaꞋa,

11 Ta feu kadanshi ka na ka̱ tsu uta̱ una̱ u va̱ ki nannai,

ka ki o kubono wa̱ va̱ ekiye a agaɗa ba,

ama ki ta̱ a kushatangu i na n sheshei kuyaꞋan,

ka̱ta̱ kpamu ka fuɗa ka yaꞋan i na n suꞋuki ni.

12 Yi ta̱ a̱ kuta̱ m ma̱za̱nga̱

ka̱ta̱ kpamu o tono n a̱ɗa̱ m ma̱ta̱na̱,

nsasan koɓolo n aginda

i ta̱ o kuɓosongu ishipa a kubana wa̱ nu,

ka̱ta̱ nɗanga n kakamba ra̱ka̱

m ɓasa ekiye e le.

13 Ubuta̱ u na wi ishi a kumatsasa awana wi ta̱ o kubono wa matsa mambulu,

ka̱ta̱ kpamu ubuta̱ u na wi ishi u tsu matsa mataci u bono matsa igeɓetsu. U ɗa wi ta̱ a kuyaꞋan kula adama a Vuzavaguɗu,

n urotu u na u kuyongo ko wannai,

u na wi kula̱nga̱sa̱ ba.>>