1 Yayi wu ushuki n ili i na tsu panai?

U yayi kpamu Vuzavaguɗu u yotsongi kukiye ku utsura ku ni?

2 Adama a na u gbonguro ta̱ a̱ ubuta̱ u Vuzavaguɗu ci ili i na i topoi usavu,

tsu karalu ka na kuta̱i a iɗika i ɗekpu.

Wi n tsuloboi ko n tsugbayin a na tso bonoko asuvu a̱ tsu wa̱ ni ba,

babu ugaꞋin u na wi n u ɗa u na u kuzuwa ci cikala yi.

3 Ɗa uma o goyoi ni ɗa kpamu a iwain ni,

vuma vu una̱mgbuka̱tsuma̱ koɓolo n ukiwani wa atakaci.

Tsu zuwakai ni kucina̱ ɗa tsu tonoi a uye u yoku,

o goyoi ni ama a̱ tsu ci keɓece n a̱yi ba.

4 Mayun ɗa, u ɗika ta̱ mma̱la̱ n tsu

n una̱mgbi u ka̱tsuma̱ u tsu,

ama ɗa a̱ tsu ci sheshei tsu danai atakaci a̱ ni ta a̱ uta̱i u Ka̱shile,

atakaci adama a̱ unushi u ni.

5 Ama ɗa u ciya̱i usovi adama a kawuya ka tsu,

u ciya̱i ufori adama a̱ unushi u tsu.

Atakaci a na a̱ tuka̱i tsu m ma̱ta̱na̱ ta a̱ uta̱i wa̱ ni,

n adama a̱ usa̱n u ni u ɗaɗa tsu potsoi.

6 Ra̱ka̱ vu tsu ci ta̱ tsu nkyon n na n tambalukpai,

ɗa yaba dem u ka̱na̱i uye u ni,

ɗa Vuzavaguɗu u nekei ni

a̱miki a̱ unushi u tsu dem.

7 E nekei ni a takacikai, ɗa a gbarai ni,

ama n nannai dem u ɓa̱yuwa̱ una̱ u ni ba,

a lazai n a̱yi tsu ma̱giri ma na i a kubanka a̱ ubuta̱ u kukiɗa,

n tsu malala ma na o poloi bini a̱ ubuta̱ wa apuwanci,

u ɓa̱yuwa̱ una̱ u ni ba.

8 N atakaci koɓolo n afada ɗa a lazai n a̱yi,

yayi u kuyaꞋan kadanshi ka ntsukaya n ni?

Adama na a takpa yi ta̱ punu a̱ ka̱tsuma̱ ki iɗika i wuma,

ama ɗa a̱ ga̱la̱i ni adama a̱ unushi u uma a̱ va̱.

9 U saꞋwa kuyaꞋanka vuza ili i gbani-gbani ba,

Ko kadanshi ka gbani-gbani ka saꞋwa kuta̱ una̱ u ni ba,

a zuwai ni a kasaun ka vuza vu uciyi,

ɗa a̱ ciɗa̱ngi ni tsu vuza vu ma̱ga̱la̱ka̱.

10 N nannai dem, ucikali u Vuzavaguɗu a ɗa ciya̱ u takacika yi, ka̱ta̱ u zuwa yi una̱mgbuka̱tsuma̱.

Ko an Vuzavaguɗu u bonokoi wuma u ni kuneꞋe ku unushi,

wi ta̱ e kene ntsukaya n ni ka̱ta̱ u doku ayin a wuma u ni,

ka̱ta̱ ofoɓuso a singai a Vuzavaguɗu o yongo e ekiye a̱ ni.

11 Ayin a na baci atakaci a̱ ka̱ɗu a̱ ni a lazai,

wi ta̱ e kene kutashi ku wuma ka̱ta̱ u pana uyo,

n kuyeve ku ni kagbashi ku usuɓi ka̱ va̱ ki ta̱ a kisa uma n a̱bunda̱i,

ka̱ta̱ kpamu u canuku a̱miki a̱ unushi e le ra̱ka̱.

12 Adama a nannai mi ta̱ e kuneke yi ugboku a̱ ka̱tsuma̱ ku u gbayin,

ka̱ta̱ u pece i na a̱ pura̱i gbani koɓolo n aza a utsura a,

adama a na u neke ta̱ wuma u ni adama a na u kuwa̱,

ɗa kpamu e kecei ni a̱ ka̱tsuma̱ ka aza a ugbamukaci.

Adama a na u ɗika ta̱ unushi u uma n a̱bunda̱i,

ɗa kpamu u yaꞋin kavasa adama a aza a ugbamukaci wa.