1 Yayi a̱yi na wu uta̱i a Edom,

wu uta̱i a Bozura n kuminya ku ni utaɗanki m mini ma shili?

Yayi tamkpamu nannai n aminya o tsugono,

a kudasa n utsura ka̱u?

<<Mpa ɗa Vuzavaguɗu a kusala ukuna wu wishi u ɗa̱.

Mpa ɗa Vuzavaguɗu vu na mi n utsura u na mi isa vuma.>>

2 Yiɗa̱i i zuwai ɗa aminya a̱ nu i ushili,

tsu uma a na e ci kpete umaci wu nɗanga n kuyaꞋanka ma̱kya̱n?

3 <<M kpete ta̱ umaci wu nɗanga wa mpa endeꞋen,

a iɗika kakau babu vuza na wi koɓolo nu mpa.

N dasasai le n wupa u va̱

ɗa kpamu m kpetei le n wupa wa,

mpasa n le n taɗanki

aminya a̱ va̱ ɗa a̱ la̱nga̱sa̱i mu ntogu.

4 Adama a na kanna ka kutsupa ki ishi ta̱ a̱ ka̱ɗu ka̱ va̱,

ɗa kpamu ka̱ya̱ ka na n kisa uma ka yawai ɗe.

5 Mi indanai, ama babu vuza na n kuɓa̱nka̱,

o goyoi mu ama babu vuza na u ɓa̱nka̱i mu,

ɗa kubolu ku va̱ ku la̱nsa̱ka̱i mu wishi,

wupa u va̱ u ɓa̱na̱i mu.

6 N dasasai iɗika kakau

n wupa u va̱ n zuwai le o soꞋi ali ma makai le adama a wupa u va̱,

ɗa n tsuwa̱in mpasa n le a iɗika.>>

7 Mi ta̱ a kudansa ukuna wu ugaꞋin u Vuzavaguɗu,

ili i na u yaꞋin i na u yawai a cikpa yi,

a̱ ka̱tsuma̱ ki ili i na u yaꞋankai tsu dem,

mayu, ili i singai-singai n a̱bunda̱i i na u yaꞋankai

kpaꞋa ka aza a Isaraila,

adama a̱ ma̱ta̱na̱ ma̱ ni n kasingai ka̱ ni.

8 U danai, <<Mayun ele uma a̱ va̱ a ɗa,

muku n na n kudoro mu ba,>>

Nannai ɗa wo okpoi Kishi ke le.

9 N atakaci a na o soꞋi dem a̱yi feu u soꞋo ta̱ a ɗa,

ɗa kalingata ka na ki a kinda yi kisai le.

N ucigi u ni n kasingai ka̱ ni ɗa u tsulai le,

u ɗengusa̱i le gaɗi ɗa u ɗikai le

ali n a̱ya̱ a na a lazai ɗe.

10 Ama n nannai dem

a yaꞋin ugbamukaci ɗa a nusakai Ayinviki a Ciɗa.

Ɗaɗa kucukpa Ka̱shile ka zuwakai le kucina̱,

ɗa u bonoi wo okpoi vurala vi le ɗa u shilika̱i n ele.

11 Uma a̱ ni a ciɓai n ayin a cau,

a ayin a Musa n uma a̱ ni,

te ɗai vuza na wu uta̱i n ele n kalangu ka kaguɓa ka̱ ni ali ɗa a walai m mala,

m maguɓi mu ushiga wa?

Te ɗai vuza na u zuwai vuza

na u nekei le Ayinviki a Ciɗa a,

12 a̱yi na u suki utsura u gbayin u kubolu u ni

u yongo e kukiye ku usingai ku Musa,

vuza na u pecei mini ele lo e kene

adama a na u ciya̱ka̱ ka̱ci ka̱ ni kula ku singai ku na ko kukotso ba,

13 vuza na u walai n ele a̱ mini mu uga̱vi?

An kodoku ka na ka tsu suma a̱ likuci i na yi babu keteri,

ko kenu a̱ ta̱ɗa̱tsa̱ ba,

14 tsu kanaka ka na ka tsu bana a̱ ka̱ra̱Ꞌa̱ ka na ki n ijanu adama a na wu uvuka ɗe,

Ayinviki a Vuzavaguɗu e nekei le kuvuka.

Tsu nampa tsu ɗa vu tonoi n uma a̱ nu

ciya̱ vi ciya̱ka̱ ka̱ci ka̱ nu kula ku tsugbayin.

15 Indana a iɗika avu na ɗe zuva ka̱ta̱ ve ene,

a̱ ubuta̱ u ciɗa u nu n ubuta̱ u singai wi ida̱shi i nu.

Te ɗai kataci ka̱ nu n utsura u nu wi?

Ili i na i tsu ɗengusa̱ wu asuvu koɓolo n kuneke wu asuvayali vu takpa ta̱ i ɗa wa̱ tsu.

16 Ama avu ɗa Esheku a̱ tsu,

n nannai ta na Ibirahi u yeve tsu ba

ko Isaraila u zuka n a̱ tsu ba, avu Vuzavaguɗu,

avu ɗa Esheku a̱ tsu, kula ku nu ku ɗa

Kishi ka̱ tsu ali n ayin a cau a ɗe.

17 Vuzavaguɗu yiɗa̱i i zuwai ɗa vu ka̱sukpa̱i tsu a̱ ka̱ka̱ra̱sa̱ tsu ka̱sukpa̱i uye u nu

ɗa vu zuwai a̱ɗu a̱ tsu a gbamai ali ɗa tsu kpa̱ɗa̱i kupanaka wu?

Bono adama a agbashi a̱ nu,

kumaci ku nu ele ɗa aza na a kulyaꞋa agadu a̱ nu.

18 A̱ ka̱tsuma̱ ka ayin kenu uma a̱ nu e remei ubuta̱ u ciɗa u nu,

ama gogo na irala i tsu i kpete ta̱ ubuta̱ u ciɗa u nu.

19 A̱ tsu uma a̱ nu a ɗa ali n ayin a ɗe,

ama vu lyaꞋaka le tsugono ba,

a saꞋwa kuɗeke le n kula ku nu ba.