1 Na ɗa ili i na Vuzavaguɗu u danai,

<<YaꞋin kasingai

ka̱ta̱ kpamu i yaꞋan ili i na yi derere,

adama a na wishi u va̱ u yawa ta̱ ɗevu,

ka̱ta̱ ukuna u wishi u va̱ kpamu wu uta̱ e keteshe.

2 Una̱singai u ɗa a kubana u vuza na u ci yaꞋan ili i nampa,

a̱yi na u tsu reme i ɗa n ugbami,

vuza na u ci yaꞋan ugulani n kanna ka Ashibi ba,

ka̱ta̱ kpamu u takpa ekiye a̱ ni a̱ ubuta̱ u kuyaꞋan ki ili i gbani-gbani.>>

3 Ka̱ta̱ komoci ka na ki o kutono Vuzavaguɗu ka dansa tsu nampa ba,

<<Mayu Vuzavaguɗu wi ta̱ e kupece mu n uma a̱ ni.>>

Ka̱ta̱ kpamu madari ma vali ma̱ kpa̱ɗa̱ kudana,

<<Mpa maɗanga me ɗeku koci.>>

4 Na ɗa ili i na Vuzavaguɗu u danai.

<<A kubana u madari ma vali, a̱yi na wi a̱ kula̱na̱ kanna ka Ashibi ka̱ va̱ mayin,

a̱yi na u tsu zagba i na i ci yaꞋanka mu uyo

ka̱ta̱ kpamu u ɓa̱na̱ uzuwakpani u va̱ derere,

5 Mi ta̱ e kuneke le kula punu a kpaꞋa ku va̱

ka̱ta̱ ku ɗa kokpo ili i kuciɓasa a̱ ubuta̱ u uma a̱ va̱

ku na ku laꞋi ku muku n ali m muku ma̱ a̱ma̱ci,

mi ta̱ e kuneke le kula ku kowannai

ku na ki o kukotso ba.

6 Omoci a na o bonokoi a̱ɗu e le a̱ ubuta̱ u Vuzavaguɗu,

adama a na a yaꞋanka yi ulinga,

a ciga kpamu kula ku Vuzavaguɗu,

ɗa kpamu a cikpai ni,

vuza na de dem wi a̱ kuɓa̱na̱ kanna ka Ashibi mayin, ɗa kpamu o kugoyo a ɗa ba,

ɗa kpamu wi e kureme uzuwakpani u va̱ n utsura,

7 ele ɗa n kubanka a kusan ku ciɗa ku va̱,

ka̱ta̱ kpamu n zuwa le a yaꞋan ma̱za̱nga̱ a kpaꞋa ka avasa ku va̱.

KuneꞋe ku kusongu ku le koɓolo n alyuka e le

i ta̱ a̱ kuciya̱ wishi a katalikalyuka ka̱ va̱,

adama a na kpaꞋa ku va̱ uma ra̱ka̱ i ta̱ e kuɗeke ku ɗa

kpaꞋa ka avasa ku uma ra̱ka̱.>>

8 Vuzavaguɗu MalaꞋimili,

vuza na u ɓolongi aza a ugbashi a Isaraila u danai,

<<Mi ta̱ o kudoku mo ɓolonku le uma o yoku

kau n aza a na m ɓolongi ɗe.>>

9 Ta̱wa̱i ra̱ka̱ a̱ɗa̱ nnama n kakamba,

ta̱wa̱i ra̱ka̱ a̱ɗa̱ nnama n kutsun. Ta̱wa̱i i kpa̱ta̱ra̱ uma a̱ va̱.

10 Aza a kindi a Isaraila a̱yimba̱ a ɗa,

ra̱ka̱ vi le i n kuyeve ba,

nsheꞋe n ka̱bini n ɗa i,

a ci yaꞋan wali ba,

o ci yongo ta̱ ucigi wa alavu ka̱u,

sai alatani a ɗa o ci yongo a kuyaꞋan.

11 Ele nsheꞋe n ɗa n na mi n kutsa̱n ka̱u,

ili i ci yawa le ba.

Ele nguɓi n ɗa n na mi n unambi u kuyeve,

yaba dem vu le u ɓatsai a uye u ni,

yaba dem vu le a̱ kula̱nsa̱ i na i kuꞋuwa yi.

12 Yaba dem u danai, <<Ta̱wa̱i, yaꞋan ci ciya̱ ma̱ra̱,

yaꞋan kpamu tsu soꞋo ka̱ta̱ ma maka tsu.

Ka̱ta̱ kpamu mkpa tsu doku ci yaꞋan nannai ali

u laꞋa tsu nanlo.>>