1 I na Vuzavaguɗu u danai Mazagbi ma̱ ni i ɗaɗa na,

a̱yi Sairusu, vuza na n ka̱na̱i kukiye ku usingai ku ni adama a na

u lyaꞋa aduniyan n kuvon,

ka̱ta̱ u takpa utsura wu ngono,

ka̱ta̱ a̱ ɓa̱yuwa̱ka̱ yi utsutsu u na babu vuza na u

kuɓa̱ya̱ngu u ɗa.

2 <<Mpa n kulaza ta̱ kelime ka̱ nu

ka̱ta̱ n sa̱ra̱ nsasan,

n fa̱da̱ kpamu utsutsu u na a yaꞋin n iyum i shili,

ka̱ta̱ m gbatya aburakpatsu a̱ iyum miri-miri.

3 Mpa n kuneke wu ta̱ kawalatsu,

n uciyi u na wi a̱ ubuta̱ wu usokongi,

adama na vi yeve a na mpa ɗa Vuzavaguɗu,

Ka̱shile ki Isaraila, vuza na u ɗekei nu n kula ku nu.

4 <<Adama a kagbashi ka̱ va̱ Yakubu,

n Isaraila vuza na n zagbai,

n ɗeke wu ta̱ n kula ku nu,

ɗa n neꞋi nu kula ku tsugbayin,

ko a na vi yevei mu ba.

5 Mpa ɗa Vuzavaguɗu, vuza yoku wi lo kpamu ba,

Ka̱shile ki lo ba sai mpa koci,

n neke wu ta̱ katsura,

ko a na vi yeve mu ba,

6 adama a na uma e yeve,

a ili i na i ɗikai a kasana ali a kubana a̱ ka̱livi,

vuza yoku wi lo ba sai mpa.

Mpa ɗa Vuzavaguɗu, vuza yoku wi lo kpamu ba.

7 Mpa ɗa n yaꞋin kutashi ɗa kpamu n yaꞋin ka̱yimbi,

mpa ɗa n yaꞋin kasingai n kawuya,

Mpa ɗa Vuzavaguɗu, vuza na u yaꞋin ili i nampa ra̱ka̱.

8 <<Avu gaɗi, yaꞋan ukuna u kasingai,

yaꞋan eleshu a̱ tuka̱ n kaꞋa a iɗika.

YaꞋan iɗika i ɓa̱yuwa̱ n wanshi,

adama a na wishi u yimkpa,

yaꞋan usuɓi u gbonguro n kaꞋa,

mpa Vuzavaguɗu ɗa n yaꞋin i ɗa.

9 <<Ili ya atakaci i ɗa u vuza na u shamgbai a kanananai n vuza na u yaꞋin ni,

Ili ya atakaci i ɗa mogbodo ma na ma yaꞋan kanananai n kamaꞋi ka̱ ni,

ko ciꞋin ci ta̱ kece kamaꞋi,

<Yiɗa̱i vi a kuyaꞋan?>

Ko kpamu avu vi yeve,

ulinga u nu ba?>

10 Ili ya atakaci i ɗa u vuza na u kudana esheku a̱ ni,

<Yiɗa̱i i zuwai ɗa vu matsai mu?>

Ko u dana a̱na̱ku a̱ ni,

yiɗa̱i vu matsai?>

11 <<Ili i na Vuzavaguɗu u danai i ɗaɗa na,

Vuza Ciɗa vi Isaraila, n vuza na kpamu u yaꞋin ni,

ka̱ta̱ ve ece mu ukuna wi ili i na yi lo a̱ kuta̱wa̱, adama a̱ ukuna wu muku n va̱ ba,

ko kpamu vu dana mu ili i na i gaꞋin n yaꞋan?

12 Mpa ɗa n yaꞋin aduniyan,

ɗa n yaꞋin kpamu vuma punu.

N ekiye a̱ va̱ a ɗa n yaꞋin gaɗi,

ɗa kpamu n zuwai ili i na yi ɗe va dem.

13 Vuzavaguɗu MalaꞋimili u danai, Mpa n kuɗa̱ngusa̱ ta̱ Sairusu adama a na u shatangu ulinga u kasingai u va̱,

mi ta̱ a kuzuwa nwalu n ni ra̱ka̱ n yaꞋan derere.

Wi ta̱ a kumaꞋasaka likuci i va̱

ka̱ta̱ u shikpa agbashi a̱ va̱,

u kuyaꞋan nannai va adama ikebe ko n katsupu ko yoku ba,

i ɗaɗa i na Vuzavaguɗu malyaimili u danai>>

14 Ili i na Vuzavaguɗu u danai i ɗa na,

<<Uciyi wa aza a Masar n aza a tsulaga a Kush,

koɓolo n wa aza a uɓon u gaɗi,

koɓolo n uma a ugaɗi a Sabina

i ta̱ a̱ kuta̱wa̱ wa̱ ɗa̱ ra̱ka̱

ka̱ta̱ okpo aza a̱ ɗa̱.

I ta̱ a̱ kuta̱wa̱ koɓolo n aza a tsulaga e le ra̱ka̱,

ka̱ta̱ o tono ɗa̱ kucina̱,

ushiyi n ikani i tsugbashi.

I ta̱ a̱ kukuɗa̱nku ɗa̱

ka̱ta̱ o folono ɗa̱ a̱ ka̱na̱ kudana,

<Mayun Ka̱shile ki ta̱ koɓolo n a̱ɗa̱, babu kpamu vuza yoku,

Ka̱shile ko yoku ki lo ba.> >>

15 Mayun, avu Ka̱shile kaꞋa ka na ko tsu sokongu ka̱ci ka̱ ni,

avu Ka̱shile ki Isaraila n Kishi.

16 A yaꞋin a̱ a̱ma̱li ra̱ka̱ i ta̱ a kuyaꞋan wono, ka̱ta̱ o okpo n kugoyi,

i ta̱ a̱ kuyikpa̱ o wono ra̱ka̱.

17 Ama aza a Isaraila i ta̱ a̱ kuciya̱ wishi a̱ ubuta̱ u Vuzavaguɗu

n wishi babu kukotso,

a̱ɗa̱ ya kuyaꞋan wono ba,

ko ta na i ciya̱ kugoyi ku na ka̱ kukpa̱ɗa̱ kukotso.

18 Ili i na Vuzavaguɗu u danai i ɗa na,

a̱yi na u yaꞋin gaɗi,

a̱yi ɗa Ka̱shile.

A̱yi ɗa u foɓusoi tsu na u kuyaꞋan aduniyan,

a̱yi ɗa u yaꞋin a ɗa,

u yaꞋan a ɗa tsu na a ɗa o kokpo lekeɗi ba,

ama u yaꞋin a ɗa adama a na uma o yongo punu.

Ɗa u danai,

<<Mpa ɗa Vuzavagɗu

vuza yoku wi lo kpamu ba.

19 N yaꞋan kadanshi ka̱ va̱ usokongi

a̱ ubuta̱ u ka̱yimbi ba.

Mpa mi ishi a kudana ntsukaya n Yakubu,

<Ka̱ta̱ i la̱nsa̱ mu gbani ba, ishi baci a̱ kuciya̱ mu ba,

Mpa Vuzavaguɗu n tsu dansa ta̱ ili i na yi i mayun,

ka̱ta̱ kpamu n sala ukuna u na wi derere.

20 <<Ɓolongi ka̱ci ka̱ ɗa̱ ka̱ta̱ i ta̱wa̱,

yawai ɗevu, a̱ɗa̱ vu na i laꞋakai n wuma a aduniyan.

Umici u ɗa wi o kuforo aza a na a ci ɗika a̱ma̱li a na a yaꞋin nu nɗanga a̱ kuka̱ra̱ka̱,

ele vu na a tsu vasa u ka̱ma̱li ka na ka ci isa vuza ba.

21 Dansai ili i na yi lo, tuka̱i n ukuna wa,

yaꞋan o goɗumo u ɗa koɓolo.

Yayi u yaꞋin kene adama a ukuna u nampa n ayin a cau a ɗe,

yayi u dansai kaꞋa m megeshe ma ɗe?

Mpa ɗa ba, mpa Vuzavaguɗu?

Babu Ka̱shile ko yoku ka na ki lo,

Ka̱shile ku usuɓi n Kishi,

vuza yoku wi lo ba sai mpa koci.

22 <<Bonoi wa̱ va̱ ka̱ta̱ i ciya̱ wishi,

a̱ɗa̱ vu na yi dadaꞋin dem a aduniyan.

Adama a na mpa ɗa Ka̱shile, vuza yoku wi lo kpamu ba.

23 N kucuna ta̱ n kula ku va̱,

n dansa ta̱ ukuna u mayun,

mi o kubono ma̱ sa̱da̱kpa̱ kadanshi ka nanlo ba.

A̱ka̱nga̱tsu dem i ta̱ a̱ kukuɗa̱nku mu,

kelentsu ka yaba dem ki ta̱ a kudansa ukuna u singai.

24 I ta̱ a kudana adama a̱ va̱,

<Usuɓi n utsura u Vuzavaguɗu u ɗa wi koci.> >>

Aza a na a yaꞋin wupa n a̱yi

i ta̱ a̱ kubana wa̱ ni ra̱ka̱ ka̱ta̱ okpo n wono.

25 Ama u Vuzavaguɗu u ɗa ntsukaya mi Isaraila ra̱ka̱

n kuciya̱ kasingai koɓolo n tsugbayin.