1 Ama gogo na, ili i na Vuzavaguɗu u dansai i ɗaɗa na,

a̱yi na u yaꞋin nu, avu Yakubu,

a̱yi na u ta̱wa̱i n avu, avu Isaraila.

<<Ka̱ta̱ vu pana wovon ba, adama a na mpa ɗa n shiba̱i ɗa̱, ɗa n ɗekei ɗa̱ yaba dem n kula kuni, a̱ɗa̱ uma a̱ va̱ a ɗa yi.

2 Ayin a na baci vu pasai kuyene,

mpa n kuyongo ta̱ koɓolo n avu,

ayin na baci kpamu vu pasai kuɗolu,

ma mi a kupura̱ wu ba.

I wala baci a̱ ka̱tsuma̱ ka akina,

yi a̱ kukula̱ ba,

nlentsu ma akina ma mo kusongu ɗa̱ ba.

3 Adama a na mpa ɗa Vuzavaguɗu, Ka̱shile ka̱ nu,

vuza Ciɗa vi Isaraila, Kishi ka̱ nu.

N neke ta̱ Masar adama a̱ wishi u nu,

Ɗa n sabaꞋi Itopiya n Sheba o okpoi una̱ u nu.

4 A na wo okpoi avu vi ta̱ n ugaꞋin n tsugbayin wa̱ va̱,

ɗa kpamu mpa n cigai nu,

mi ta̱ a kuneke uma kasabaꞋa a una̱ u nu,

koɓolo n uma a aduniyan adama kasabaꞋa n wuma u nu.

5 Ka̱ta̱ vu pana wovon ba, adama a na mpa mi ta̱ koɓolo n avu,

mi ta̱ a̱ kutuka̱ m muku n nu a uɓon u kasana,

ka̱ta̱ m ɓolongu ɗa̱ ɗe n uɓon u ka̱livi.

6 Ka̱ta̱ n dana aza a uɓon u gaɗi, <Ka̱sukpa̱i le>

aza ɗaka tamkpamu, <Ka̱ta̱ i bonoko le ba.>

Bonokoi Olobo a̱va̱ a na i daꞋangi,

ni nkere n va̱ n na mi a uteku wa aduniyan.

7 Yaba dem vu na e ɗekei n kula ku va̱,

vuza na n yaꞋin adama a tsugbayin tsu va̱,

vuza na n foɓusoi ɗa n tuka̱i.>>

8 Uta̱ka̱i n uma a na i n a̱shi ama a̱yimba̱ a ɗa,

n aza a na kpamu i n atsuvu ama agulani a ɗa.

9 Aduniyan ra̱ka̱ a gasai a̱ ubuta̱ u te,

ɗa uma o ɓolongi.

Yayi a̱ ka̱tsuma̱ ke le wa kufuɗa kudansa ukuna u nampa,

ka̱ta̱ u yotsongu tsu ili i cau?

YaꞋan a̱ tuka̱ nu nga n le ka̱ta̱ a dansa kaꞋa mayun adama e le,

adama a na uma o yoku a pana kaꞋa ka̱ta̱ feu a dana, mayun ɗa.

10 Ɗa Vuzavaguɗu u danai, <<A̱ɗa̱ nga n va̱,>>

<<A̱ɗa̱ kpamu agbashi a̱ va̱ a na n zagbai,

adama a na i yeve ka̱ta̱ i neke a̱ɗu wa̱ va̱,

ka̱ta̱ kpamu i coꞋoko a na mpa ɗa.

A saꞋwa kuciya̱ Ka̱shile ko yoku kafu mpa ba, i ta na feu a̱ kuciya̱ ko yoku na kelime ba.

11 Mpa, mpa ɗa Vuzavaguɗu,

kishi ko yoku ki lo ba.

12 Mpa Vuzavaguɗu n danai,

n yaꞋin uzuwakpani n kisa ɗa̱, ɗa ta na n ka̱na̱i uzuwakpani wa,

a̱ɗa̱ ɗa nga n va̱ n na n yevei an babu Ka̱shile ko yoku, ka na ka yaꞋin ili i nampa.

13 Mayun ɗa, ali n ayin a̱ ugiti sai a kubana ko wanai mpa ɗa Ka̱shile.

Babu vuza na u kufa̱ba̱na̱ vuma e ekiye a̱ va̱.

N yaꞋan baci ili yayi u kuyaꞋansuka i ɗa?>>

14 Ili i na Vuzavaguɗu u dansai i ɗa na,

ka̱shibi ka̱ ɗa̱, Vuza Ciɗa vi Isaraila,

<<Adama a̱ ɗa̱ mi ta̱ a̱ kusuꞋuku Babila uma,

adama a na a una aza a Babila ra̱ka̱,

ciya̱ m bonoko yoroli i ma̱za̱nga̱ i le yo okpo ma̱shi.

15 Mpa ɗa Vuzavaguɗu, Vuza Ciɗa vu ɗa̱,

a̱yi na u yaꞋin aza a Isaraila, mogono ma̱ ɗa̱.>>

16 Ili i na Vuzavaguɗu u danai i ɗaɗa na

a̱yi ɗa u yaꞋin uye a mala,

ɗa kpamu u ɓatsai uye e kuyene ku gbayin,

17 a̱yi vu na wu utuka̱i n ekeke o odoku koɓolo n odoku,

osoji koɓolo n ovonshi,

ɗa a vaki a iɗika ya a fuɗa ta na a̱ ɗa̱nga̱ ba,

a̱ kuwa̱i tsa akina a̱ ma̱kuni a na a̱ kimsa̱i.

18 <<Ama cinukpa n ili i cau,

ka̱ta̱ vu ciɓa n ili i kuku ba.

19 La̱na̱, mpa mi ta̱ a kuciga kuyaꞋan ili i savu,

Gogo na i ɗa yuta̱ ta̱, ka̱ta̱ ye ene i ɗa ba?

Mpa mi ta̱ a kuyaꞋan uye e meremune

n kuyene a iɗika yu ɗekpu

20 Nnama n kakamba ra̱ka̱ mi ta̱ a kucikpa mu,

nsheꞋe n kakamba koɓolo n a̱da̱la̱ dem,

adama a na n neke le ta̱ mini e meremune, ka̱ta̱ kpamu n ta̱sa̱

nyeneke a iɗika i ɗekpu,

n neke uma a na n zagbai mini mo kusoꞋo,

21 uma a na n yaꞋin adama a̱ ka̱ci ka̱ va̱

adama a na a sala ucikpi u va̱ e keteshe.

22 <<Ama Yakubu, mpa ɗa vuza na vu cikpai ba,

avu oꞋuso ka̱ci ka̱ nu adama a̱ va̱ ba, avu Isaraila.

23 I tuka̱ mu m mokyon adama e kuneꞋe ku kusongu ba,

ko kpamu i cikpa mu n alyuka a̱ ɗa̱ ba.

Mpa n takacika ɗa̱ n adama e kuneꞋe ki ili i kashina ba,

n damusa ɗa̱ kpamu adama a ili i ma̱gula̱ni ba.

24 A̱ɗa̱ i tuka̱ n ili i ma̱gula̱ni yi uyo wa̱ va̱ ba,

ko i neke mu ushuma wa alyuka u ɗa̱ ba.

Ama ɗa yi a kutakacika mu nu unushi u ɗa̱,

ɗa kpamu yi o ko oꞋuso mu n kawuya ka̱ ɗa̱.

25 <<Mpa, mpa ɗa, vuza na u takpai

ugbamukaci u ɗa̱, adama a ka̱ci ka̱ va̱,

ɗa n cinukpai n unushi u ɗa̱ ra̱ka̱-ra̱ka̱.

26 Ciɓakai mu n ili i gbani-gbani i na n yaꞋankai ɗa̱,

yaꞋan ci yaꞋin kanananai ka kadanshi ka koɓolo,

dansai e keteshe ukuna wu unushi u ɗa̱ wa.

27 Ikaya i ɗa̱ yu ugiti i nusa ta̱,

ɗa kpamu aza kelime a̱ ɗa̱ a yaꞋankai mu ugbamukaci.

28 Adama a nannai mpa n kuneke ta̱ tsugbayin tsa̱ a̱Ꞌisa̱ wono,

ɗa n nekei Yakubu adama munuka

aza Isaraila kpamu adama ishikushi.