1 Na ɗa akaka adama a̱ ka̱ra̱Ꞌa̱ ka tsalatani.

Yiɗa̱i yi o koꞋuso wu gogo na,

ali ɗa dem vu ɗa̱ i kumbai gaɗi vu kukpa̱ va asaka,

2 a̱ɗa̱ likuci i na yi tukpa n kacaꞋa,

likuci i na i shanai n yoroli i ma̱za̱nga̱ n a̱ra̱ɗi?

Aza a̱ ɗa̱ a na a̱ kuwa̱i ɗe va, a̱ kuwa̱ n ukpa̱ u kotokobi ba,

ko ukpa̱ wu ubuta̱ u kuvon ba.

3 Aza e kelime a̱ ɗa̱ dem a suma ta̱ ra̱ka̱,

e reme le ta̱ babu utawi.

Ra̱ka̱ vu ɗa̱ vu na a̱ ka̱na̱i a banka ɗa̱ ta̱ ugbashi,

ko a na wo okpoi a sumai ɗe daꞋin.

4 Adama a nannai ɗa n danai, <<Ɗenka̱i mu lo,

ka̱sukpa̱i mu n shika̱.

Ka̱ta̱ i leꞋeshe mu

adama a ula̱nga̱shi u na i yaꞋankai uma a̱ va̱ ba.>>

5 Vuzavaguɗu, Vuzavaguɗu MalaꞋimili wi ta̱ n kanna

ka wuya, n kanna ka atakaci, kanna ko wovon,

a̱ Ka̱ra̱Ꞌa̱ ka Tsalatani,

kanna ka̱ ma̱shi n kacaꞋa

a̱ kula̱nsa̱ uɓa̱nki a kusan.

6 Aza e Elim o woki njiki koɓolo

n ekeke o odoku n akumbi e le,

ɗa aza a Kiru e remei nra̱ga̱.

7 A̱ra̱Ꞌa̱ a̱ nu a na vu laꞋi n kuciga dem, a shana ta̱ n ekeke o odoku,

ɗa a zuwai akumbi o odoku a shamgbai a̱ utsutsu u likuci,

8 Ka̱shile ka takpai ka̱ɓa̱nka̱tsu ka Yahuda.

A kanna ka nanlo kaꞋa i kula̱nsa̱

ucanuku u kuvon u na wi usokongi a kakamba,

9 ye ene ta̱ nshilya n likuci i Dawuda

m ɓatsasa ta̱ n a̱bunda̱i,

ɗa i kenuki mini

a adaɓa a ɗaka.

10 I kecei imashi ya asaka a na i a Urushelima,

ɗa i ɓosoi asaka o yoku adama a na i maꞋasaka mashilya ma̱ ciya̱ mo doku utsura.

11 Ɗa kpamu i ga̱va̱i ubuta̱ u na i kukpada mini e mere ma nshilya n re

n likuci ma adama a kadaɓa ka̱ kuku,

ama i bonoko ma̱riki ma̱ ɗa̱ a kubana a̱ ubuta̱ u vuza na u yaꞋin mini ma,

ko kpamu i bonoko Vuza na u sheshei kuyaꞋan ili i nampa ya n tsumani ili ba.

12 A kanna ka nanlo, ɗa Vuzavaguɗu MalaꞋimili dem,

u ɗekei ɗa̱ adama a na

i shika̱ n una̱mgbuka̱tsuma̱,

i gbonduwo aci a̱ ɗa̱ ka̱ta̱ i uka akashi a una̱mgbi u ka̱tsuma̱.

13 Ama la̱na̱i, ma̱za̱nga̱ mi ta̱ lo n kupana ku uyoꞋo,

kukiɗa ka anaka nu nlala,

kutakuma ki inyama n kusoꞋo ku ma̱kya̱n,

<<YaꞋan ci lyaꞋa ka̱ta̱ tsu soꞋo,

adama a na mkpaꞋa ci ta̱ a̱ kukuwa̱.>>

14 Vuzavaguɗu MalaꞋimili u dansa ta̱ kadanshi ka nampa a atsuvu a̱ va̱, <<Mayun unushi u nampa a kucinukpa n u ɗa ba, ali sai kanna ka na vu kuwa̱i.>> Mpa Vuzavaguɗu MalaꞋimili n dansa ta̱.

15 Ili i na Vuzavaguɗu MalaꞋimili u danai mu i ɗaɗa na,

<<Bana gogoꞋo vu dana kagbashi ka nampa ka

Shebuna vuza na wi a̱ kula̱na̱ kefeku ko tsugono ka.

16 Yiɗa̱i vi a kuyaꞋan na, yayi kpamu vuza na u nekei nu katsura ka na

vu sheꞋweke ka̱ci ka̱ nu kasaun punu na,

avu na vu ga̱va̱i kasaun ka̱ nu zuva,

ɗa vu sheꞋwei ubuta̱ u kuvuka u nu a kakpanlai?

17 Yeve, Vuzavaguɗu u sheshe ta̱ an wa reme wu gbam-gbam,

ka̱ta̱ u vakangu wu daꞋin, avu vuma vu utsura.

18 Wi ta̱ a̱ kuka̱ta̱la̱ wu ka̱ta̱ u shiya wu gbam-gbam

ka̱ta̱ u taɗuku tsu kolo a kubana a iɗika i gbayin,

ta ɗe va̱ kukuwa̱

ka̱ta̱ kpamu ekeke o odoku a̱ nu a shama ɗe.

Vo okpo ta̱ ili i wono a kpaꞋa ku vuzagbayin vu nu.

19 Mi ta̱ a̱ kuta̱ka̱ wu a ubuta̱ wu ulinga u nu,

ka̱ta̱ m bonoko tsugbayin tsu nu a iɗika. 20 A kanna ka nanlo mi ta̱ a̱ kusuku e ɗekeke mu kagbashi ka̱ va̱ Eliyakimu kolobo ka Hilikiya. 21 Mi ta̱ a kuꞋuka yi motogu mu ulinga ma̱ nu ka̱ta̱ n shiya yi n kaɗambura ka̱ nu a̱ kuyun ku ni, ka̱ta̱ i neke yi tsugbayin tsu nu wa̱ ni. Wi ta̱ o kokpo esheku a aza a na i ida̱shi a Urishelima, n aza a kpaꞋa ku Yahuda. 22 Mi ta̱ e kuneke yi katsura ka kpaꞋa ku Dawuda, Ili i na baci u ɓa̱yuwa̱i babu vuza na u kuɓa̱ya̱ngu, i na kpamu u ɓa̱ya̱ngi babu ka̱ɓa̱yuwi. 23 Mi ta̱ a kukutangu yi tsu kaguta a̱ ubuta̱ wu utsura, ka̱ta̱ wo okpo kakuba ko tsugono ku ucikpi ka kpaꞋa ke esheku a̱ ni. 24 I ta̱ kpamu e kuneke yi tsugbayin tsu kpaꞋa tsu le ra̱ka̱, ka̱ta̱ kumaci ku kpaꞋa ku le ra̱ka̱ ku bono ku zuwaka yi a̱miki, tsu na a tsu saku ili yu ulinga, nvene, n edele a gaɗi vu kirukpa. 25 A kanna ka nanlo, Vuzavaguɗu MalaꞋimili u danai, kaguta ka na a̱ shikpa̱i a̱ ubuta̱ wu utsura wa, ki ta̱ o kukoɗo ka̱ta̱ ka̱ yikpa̱, ucanuku u na wi usaɓangi gaɗi vi ni u yikpa̱. Adama a na Vuzavaguɗu ɗa u danai.>>