1 Vuzavaguɗu u danai, <<YaꞋan ishipa avu madari ma vuka,

avu na ka̱ta̱ vu saꞋwai kumatsa maku ba,

ɓosongu vishipa ka̱ta̱ vu orukpo adama a̱ ma̱za̱nga̱,

avu na vu saꞋwai a̱ga̱nda̱ a limata ba,

adama a na ka̱bunda̱i ka̱ muku n vuka vu na vi madari

ki ta̱ a kulaꞋa ka vuka vu na vi n vali.>>

2 <<Doku ka̱ba̱nga̱ ka̱ ma̱va̱li ka̱ nu,

ba̱rukpa̱ akashi a̱ utsutsu o doku a yaꞋan wanshi.

Ka̱ta̱ vu shikpa̱ aguta a a yaꞋan utsura mayin,

vu dokusu awin a yaꞋan ugaɗi,

vu dokusu le utsura.

3 Adama a na vi ta̱ a̱ kuka̱ra̱Ꞌa̱ a̱ ubuta̱ dem usingai n ugula̱ feu,

ka̱ta̱ ntsukaya n nu n ka̱na̱ iɗika kakau

ali a̱ da̱sa̱ngu punu a̱ likuci i na yo okpoi ɗe agali.

4 <<Ka̱ta̱ vu pana wovon ba, vi a kuyaꞋan feu wono ba.

Ka̱ta̱ vu pana wovon ba, babu ili i wono i na i kuta̱wa̱ wu kpamu.

Vo kudoku va ciɓa n ili i wono i na vi yaꞋansai a ayin a na vi ka̱ɗa̱nga̱ni ba,

koɓolo n una̱mgbuka̱tsuma̱ u na kpamu vi ishi n u ɗa a ayin a na vi ishi babu vali.

5 Adama a na Vuza na u yaꞋin nu a̱yi ɗa vali nu,

kula ku ni ku ɗa Vuzavaguɗu MalaꞋimili.

Vuza Ciɗa vi Isaraila a̱yi ɗa u shiba̱i nu,

a̱yi ɗa e ci ɗeke Ka̱shile ka aduniyan ra̱ka̱.

6 Vuzavaguɗu wi ta̱ e kuɗeke wu u bonoko,

tsu vuka vu na o lokoi ɗa a̱ ka̱sukpa̱i ni n una̱mgbuka̱tsuma̱

tsu vuka vu na vali vi ni vu lokoi,

a ayin o yolo i savu i ni,>>

7 <<M megeshe kenu n loko wu ta̱,

ama n asuvayali a gbayin mi ta̱ o kubonoko wu.

8 Vuzavaguɗu Ka̱shibi ka̱ ɗa̱ u danai,

a̱ ka̱tsuma̱ ka wupa wa̱ a̱bunda̱i ɗa m paɗai bini ali megeshe kenu,

ama n ucigi u babu kukotso

mi ta̱ a kupana asuvayali a̱ nu.>> Vuzavaguɗu ɗa u dansai vuza na u shiba̱i ɗa̱.

9 <<N tsu va̱ na wi ta̱ derere n tsu ayin a̱ Nufu,

ana n kucinai n danai, mini ma ayin a̱ Nufu mi o kudoku kupala aduniyan ba.

Adama a nannai gogo na n kucina ta̱ mi o kudoku kuyaꞋan wupa n avu ba,

mi kpamu o kudoku kudansaka wu ba.

10 Ko nsansa m puwa̱nka̱

ka̱ta̱ kpamu aginda a̱ muɗa̱,

ama ucigi u gbangam u va̱ wi o kukotso wa̱ nu ba,

uzuwakpani u ma̱ta̱na̱ u va̱ vuza wa kutakpa u ɗa ba,>>

Vuzavaguɗu vu na wi a kupana asuvayali a̱ nu u danai.

11 Vuzavaguɗu u danai, <<Avu Urushelima, likuci i na yi o kusoꞋo atakaci n wunla̱i u mini ma atali, babu vuza na u kuyaꞋanka wu kadanshi ku uremi u ka̱ɗu,

mi ta̱ a kuvarasaka kumaꞋa ku nu n atali a singai.

12 Mi ta̱ a kumaꞋa nshilya n nu n atali a langu-langu,

utsutsu u nu kpamu n atali a na i tsa̱ a̱ta̱mba̱,

nshilya m kpaꞋa kpamu n atali a na o yotsoi yaza.

13 Vuzavaguɗu wi ta̱ a kuyaꞋanka muku n nu ra̱ka̱ kuyotsongusu,

ma̱ta̱na̱ ma gbayin mi ta̱ a̱ kuta̱wa̱ u muku n nu.

14 N kasingai koɓolo n ka mayun ɗa vo ku yonko,

ka̱ta̱ kpamu kawuya ka yaꞋan daꞋangi n avu,

vi a kupana wovon wi ili ba,

i ta̱ a kutakpa ka kagbanigbani a banka daꞋangi,

ki a kuyawa ɗevu n avu ba.

15 Vuza na baci u kumbai nu n vishili, na lo kusheshe ku va̱ ku ɗa ba,

vuza na baci u kumbai nu wi ta̱ o kubono wo kokpo n wono.

16 <<La̱na̱, Mpa ɗa vuza na n yaꞋin kawakana

ka na ka̱ tsu fa̱la̱ akina ali a tasa,

ka̱ta̱ u yuma ucanuku u munuka adama a ulinga u le.

Mpa ɗa kpamu vuza na u yaꞋin ka̱la̱nga̱shi adama a na u la̱nga̱sa̱,

17 Vuzavaguɗu u danai, babu ucanuku u munuka u na a kuyaꞋan adama a̱ ɗa̱ ka̱ta̱ u ɗa u lyaꞋa ɗa̱,

ka̱ta̱ kpamu i ɓa̱ya̱ngu kelentsu dem ka na ka kubanka ɗa̱ nu nsata.

Na va ɗaɗa agadu a kagbashi ka Vuzavaguɗu,

ɗaɗa kpamu wishi u na wu uta̱i wa̱ va̱.>>