1 Maku mu ugboji ma tsu isa ta̱ ugbari u Dada ni,

ama maku ma kugoyi ma tsu pana kadanshi ba.

2 Vuma vu usuɓi u ci lyaꞋa ta̱ ili a u tsura wu una̱ u ni,

ama vuma vu unambi wu usuɓi u tsu bonoko ta̱ a̱pa̱ a̱ ni a ubuta̱ u vishili.

3 YaꞋan ci coꞋo n ili i na vi a kudansa, adama ana vu isa wuma u nu.

Vuma vu na u kpa̱ɗa̱i kuyaꞋan cicoꞋo n kadanshi ka̱ ni ba,

u tsu uka ta̱ ka̱cika̱ni muna.

4 Vuza vu ukpa̱ɗi u tsu ciga ta̱ udukuyan,

ama u ci ciya̱ ili i yoku ba.

ama kayaꞋin ku ulinga

ki ta̱ a kuciya̱ ili i na wi a kuciga ba̱ri.

5 Vuza vu usuɓi u tsu iwan ta̱ ukuna wa a uwa,

ama vuza gbani-gbani u tsu yaꞋan ta̱ ili i wono n i kugoyi.

6 Usuɓi u tsu ere ta̱ vuza vu babu unushi,

ama ka gbani-gbani ka tsu vakangu ta̱ vuza vu u nushi.

7 Vuza yoku utsu ɗika ta̱ ka̱cika̱ni vuza vu uciyi ɗa, kpamu tana wi n ili ba,

vuza yoku u ɗika ta̱ ka̱cika̱ni a̱yi vuza vu unambi ɗa,

kpamu tana a̱yi vuza vu uciyi ɗa ka̱u.

8 Uciyi u vuma wita̱ a kufuɗa ku isa wuma u ni,

ama vuza vu unambi babu vuza na u tsu gbandarasa yi.

9 Kutashi ka aza usuɓi ku tsu akana ta̱ ka̱u,

ama kutashi ka aza gbani-gbani u kimushi u ɗa u ci yaꞋan.

10 Ugbamukaci vishili vuɗa utsu tuka̱ koci,

ama a̱ tsu ciya̱ ta̱ ugboji ubuta̱ wa aza ana a tsu pana odoki.

11 Udukuyan u na a̱ ciya̱i n uye usingai ba, u tsu puwa̱nka̱ ta̱ gogoꞋo,

ama vuza na de dem u ɓolongi ikebe kenu kenu i tsu ka̱na̱ ta̱ kudokusu.

12 Ku zuwa ku ka̱ɗu kuna a takpai a kubana kelime ku tsu zuwa ta̱ ka̱ɗu ka̱ ka̱na̱ mɓa̱la̱.

ama mali mana a̱ ciwa̱ta̱ngi mita̱ tsu maɗanga ma wuma.

13 Vuza na baci de dem u goyoi odoki wita̱ a ku saꞋawa odoki a̱ni,

ama vuzana baci de dem u tonoi odoki a wita̱ a̱ kuciya̱ katsupu.

14 Kuyotsongu ku vuza vu ugboji, kuɗolu ku mini ma wuma ma a,

vuza na utsu bonoko vuma a ubuta̱ u maza mu ukpa̱.

15 Kuyeve ku singai kutsu tuka̱ ka̱ ta̱ mapasa ma singai,

ama uye wa a za gbani-gbani wi ta̱ n utsura.

16 Vuza vu ugboji u ci yeve ta̱ ili i na wi a kuyaꞋan,

ama kalau ka tsu yotsongu ta̱ tsulau cini e keteshe.

17 Kalingata ka gbani-gbani ka tsu uwa ta̱ atakaci,

ama kalingata ka mayun ka tsu tuka̱ ta̱ n ma̱ta̱na̱.

18 Vuza na baci de dem u iwain kushuku n odoki, u tsu okpo ta̱ n wono n unambi,

ama vuzana baci dem wu ushuki n odoki utsu ciya̱ ta̱ tsugbayin.

19 Ili i singai i ɗa vuma u ciya̱ ili i na u kuɓa̱nka̱ ka̱cika̱ni,

alau a tsu iwan ta̱ ku ka̱sukpa̱ ka gbani-gbani.

20 A̱ yi na wi nwalu koɓolo n aza ugboji

utsu doku ta̱ n ugboji,

ama ka̱ja̱Ꞌa̱ ka a lau wita̱ a kulyaꞋa kelime n ku na̱mgba̱.

21 Ka gbani-gbani ko tsu tono ta̱ aza unushi,

ama una̱singai u ɗa katsupu ka vuza vu usuɓi.

22 Vuma vu usuɓi wita̱ a̱ kuciya̱ udukuyan, ali u ka̱sukpa̱ka̱ ntsukaya n ni,

ama udukuyan wa aza unushi wita̱ o ku okpo wa aza usuɓi.

23 Kashina ka vuza vu unambi i ta̱ a kufuɗa kuneke ilikulya n a̱bunda̱i,

ama unambi u kamayun ka tsu pura̱ngu ta̱ uɗa ra̱ka̱.

24 A̱ yi na utsu gbara maku ma̱ ni ba, u ciga ma ba,

ama a̱yi na u cigai maku ma̱ ni u tsu gbara ta̱ maku ma̱ ni mayin.

25 Vuma vu usuɓi u tsu lyaꞋa ta̱ ilikulya ali u cuwa̱,

ama vuma gbani-gbani, n kambulu kaꞋa utsu yongo ayin tutu.