1 Ka̱ta̱ vu yaꞋanka uma a kavama tsurala ba,

ko vu yaꞋan mali ma kuyongo n a̱ le ba,

2 adama na ka̱ɗu ke le, ka ci sheshe i yoku ba, sai vishili,

una̱u u le kpamu sai kavama.

3 N ugboji u ɗa a maꞋin kpaꞋa,

n ubuta̱ u kuyeve u ɗa kpamu ɗa kushamgba yi,

4 n ubuta̱ u kuyeve u ɗa a shatangi unu

n ucanuku u singai ra̱ka̱ n uciyi.

5 Vuza vu ugboji u tsu yaꞋan ta̱ n utsura,

keyevi kpamu ka tsu lyaꞋa ta̱ kelime n kudoku n utsura,

6 adama na ubuta̱ wu ugboji u uma u ɗa a tsuyaꞋan kuvon,

kpamu ubuta̱ wa odoki u uma u ɗa a ci ciya̱ u lyaꞋi.

7 Ugboji wi ta̱ n atakaci a kuyeve ubuta̱ u kalau,

a u ubuta̱ u kadanshi uma a tsu fuɗa a dansa u kuna u ma̱riki ba.

8 Ya ba dem na u tsu sheshe kuyaꞋan ka gbani-gbani,

a ku ɗekei ta̱, mogono ma vishili.

9 Kusheshe kuyaꞋan ka gbani-gbani, u nushi u ɗa,

vuza kugoyi kpamu ili yu unata i ɗa ubuta̱ u uma.

10 Ɗa baci vu oꞋoi a kanna ka atakaci,

mayun ɗa an vi nu utsura ba.

11 Isa aza na i a kurono a ku banka ubuta̱ u munuka,

Geshe aza na i a katambalusa a ku bana u kpiꞋisa̱.

12 Ɗa baci vu danai, <<Mpa n yeve ili nampa ya ba,

adama nanai mpa, ili i bura mu ba.>> Ciɓai an Ka̱shile ka yevei i na ci yaꞋan, kpamu u yeve ta̱ i na ci a kusheshe,

ashe wa ku tsupa ka tsu derere vi na tsuyaꞋan va ba?

13 Maku ma̱va̱, lyaꞋa ishigi, adama i ɗa yi ta̱ n ugain.

kpamu kuɗa̱kpa̱ ku kabashi ki ishigi ko tsu yokpo ta̱ una̱.

14 Yeve an ta ugboji wi a̱ ka̱ɗu ka̱ nu nanai,

ɗa ba ci vu ciya̱i u ɗa, vi ta̱ a kuyongo n a̱pa̱ kelime,

kpamu a̱pa̱ a̱ nu i a ku puwa̱nka̱ ba.

15 Ka̱ta̱ vu vaꞋanku a kavaꞋawan tsu vuma gbanigbani, a kpaꞋa ku vuza vu usuɓi,

ka̱ta̱ vu la̱nga̱sa̱ kpaꞋa ku vuza vu usuɓi ba,

16 adama na vuza vu usuɓi u su yikpa̱ ta̱ ku cindere ka̱ta̱ u ɗa̱nga̱ kpamu,

ama u na̱mgbi u te u tsuna ta̱ aza gbanigbani.

17 Ka̱ta̱ vu yaꞋan ma̱za̱nga̱, adama ili gbanigbani i na i ciya̱i vu rala nu ba,

kpamu ka̱ta̱ vu yaꞋan ma̱za̱nga̱ a ayin ana u fa̱ta̱tsa̱i u yikpa̱i ba,

18 talo, Vuzavaguɗu wa kene, ka̱ta̱ u na̱mgba̱ ka̱tsuma̱,

ka̱ta̱ kucikpa u vadalukpa wupa u ni.

19 Ka̱ta̱ vu takacika ka̱cika̱nu adama vuza gbanigbani ba,

kpamu ka̱ta̱ vu yaꞋan tsura tsa aza gbanigbani ba,

20 adama na vuma gbanigbani wi n a̱pa̱m kelime ba,

kutashi ku vuza gbanigbani ki ta̱ a ku kima̱.

21 Maku ma̱ va̱ pana wovon u Ka̱shile n mogono,

kpamu ka̱ta̱ vu gbaɓa ka̱cika̱nu n a̱ka̱ra̱shi ba,

22 adama ana kawuya ki ta̱ a̱ ku ɗa̱nga̱ n moloko we le,

ya yi u yevei uteku u munuka ma na dem vu le a ku tuka̱?

23 Nava feu kadanshi ka aza ugboji ka.

24 Ya ba dem vu na baci de dem u danai vuza gbanigbani, <<Avu vu nusa ba,>>

uma i ta̱ a kuyaꞋan kai una̱, ka̱ta̱ uduniya kpamu e ne unata u ni,

25 Ama aza na de dem u tsu dansuka vuma gbanigbani wita̱ a kuciya̱ una̱u usingai,

una̱u usingai wa a̱bunda̱i wi ta̱ a ku cipa̱ wa̱ le.

26 Vuza dem u danshi kamayun

u yotsongu ta̱ cija̱Ꞌa̱ ci singai.

27 Lapula biꞋi ulinga u nu ra̱ka̱ pulai,

kotso ku lapula ili ya ashina i nu ra̱ka̱,

ka̱ta̱ yeve a ukocishi vu maꞋa kpaꞋa ku nu.

28 Ka̱ta̱ vu neke ngaꞋan adama vu toku nu babu ili ba,

ka̱ta̱ vu dansa a uwa ba.

29 Ka̱ta̱ vu dana <<Mpa sai n tsupa u teku tsu na u yaꞋan kai mu ba,

n ku tsupa ta̱ i na u yaꞋankai mu.>>

30 N wala ta̱ n kashina ka korogo,

n kashina ka vuza vu babu ugboji,

31 ɗa menei ka ka shana ta̱ na a wana,

i ɗika ya kpamu i shanai n mita̱,

kpamu nshilya n ni n ɓosoi a li iɗika.

32 A na menei, ɗa n sheshei u kuna wa,

ɗa n ciya̱i odoki a nampa.

33 Ɗa baci alavu n agbaɗiki a laꞋi nu gan,

ayin kenu, vo oɓongu ekiye nu adama na vu vuka,

34 nanai ɗa unambi wa kufa̱ba̱na̱ wu i li, an vuza ma̱ga̱la̱ka̱,

ka̱ta̱ kpamu u ɗa u ka̱na̱ wu an koboki.