1 Vuka vu ugboji vu tsu maꞋa ta̱ kpaꞋa ku ni,

ama kalau ka tsu fa̱da̱ ta̱ kpaꞋa ku ni n ekiye a̱ ni.

2 Vuza na u tsu yaꞋan kamayun a̱ yi ɗa u tsu pana wovon u Ka̱shile,

ama a̱ yi vuza vu modoruko kugoyo ku ɗa u tsu goyoi.

3 Kadanshi ka kalau mashashau ma a kucina̱ ku ni,

ama kadanshi ka vuza vu ugboji ka tsu ere yi ta̱.

4 Ubuta̱ u na wi babu anaka a vicimba, teɗai a̱ kuciya̱ ilikulyaꞋa?

Ama ubuta̱ u na wi n obomburon a vicimba, i ta̱ a̱ kuciya̱ ilikulya ya a̱bunda̱i.

5 Ngan n vuza vu usuɓi, mayun ɗa.

ama vuza vu ngan ma a uwa, u tsu ka̱ra̱ka̱ ta̱ n a uwa.

6 Vuza kugoyi u tsu la̱nsa̱ ta̱ ugboji ama u su ciya̱ ba,

ama kuyeve ki na atakaci u keyevi ba.

7 YaꞋan daꞋangi n kalau,

adama ana wi n ili i na wa ku yotsongu ba.

8 Ugboji u keyevi u ɗaɗa u yeve uye wa nwalu n ni,

ama tsulau tsu kalau tsu tsu vakangi ta̱.

9 Kalau ka tsu yaꞋan ta̱ ugulani n unushi,

ama vuza vu usuɓi n ka̱ɗu ka u tsu folono a cinukpa kai unushi.

10 Ka̱ɗu dem ke yeve ta̱ una̱mgbi u ka̱tsuma̱ u ni,

kpamu babu vuzana u kufuɗa ku yeve ma̱za̱nga̱ ma̱ ni.

11 KpaꞋa ku vuza gbani-gbani ki ta̱ a ku fa̱da̱,

ama kpaꞋa ku vuza vu usuɓi ki ta̱ o kutopo.

12 Ili i na vuma u sheshei ku dana i ɗa uye u singai,

wi ta̱ a kubanka yi ukpa̱.

13 Ko a ka̱tsuma̱ ki izoshi, gaꞋan ba una̱mgbi u ka̱tsuma̱ wi ta̱ punu.

ma̱za̱nga̱ ma laza baci, una̱mgbi u ka̱tsuma̱ wi ta̱ punu.

14 Vuma gbani-gbani a tsu tsupai ki ta̱ n ka gbani-gbani ka̱ ni,

vuza singai kpamu a tsu tsupai ki ta̱ n kasingai ka̱ ni.

15 Kalau ka tsu ushuku ta̱ n ili dem,

ama vuza vu ugboji u tsu indana ta̱ mayin kafu u yaꞋan ili i yoku.

16 Vuma vu ugboji, utsu pana ta̱ wovon u Ka̱shile,

ama kalau ka tsu yaꞋan ta̱ ili gogoꞋo babu cicoꞋo.

17 Vuza vu wupa u tsu yaꞋan ta̱ kakuna n tsulau,

ka̱ta̱ a iwan vuza kusheshe ku gbani-gbani.

18 Vuza vu unambi u kusheshe u tsu ciya̱ ta̱ ili u teku u tsulau u ni,

ama vuza vu usuɓi katsupu ka̱ni kuyeve ku ɗa.

19 Mayun vuza gbani-gbani wi ta̱ a̱ ku kuɗa̱ngu e kelime ka vuza vu usuɓi,

vuza ka gbani-gbani kpamu a utsutsu u vuza vu usuɓi.

20 Babu vuza na wi a kuciga vuza vu unambi,

ama vuza vu uciyi wi ta̱ n a̱ja̱Ꞌa̱ n a̱bunda̱i.

21 A̱yi vuzana u goyoi vutoku ni, u yaꞋan ta̱ unushi,

ama vuza vu una̱singai u ɗa vuzana u ɓa̱nka̱i vuza vu unambi.

22 Vuza na u tsu foɓuso ka gbani-gbani, uye u ɗa wi a̱ ku ka̱sukpa̱ ba?

Ama ucigi n usuɓi wi ta̱ o ku okpo u vuzana wi o kufoɓuso ili i singai.

23 YaꞋan ulinga vi ta̱ ili i wuma,

ama vu da̱sa̱ngu baci a kadanshi vi ta̱ o ku okpo vuza vu unambi.

24 Katsupu ka vuza vu ugboji udukuyan u ɗa,

ama katsupu ka kalau tsulau tsu ɗa.

25 Vuza kamayun u ciꞋisa ta̱ wuma,

ama ka yaꞋan ka uwa za modoruko ɗa.

26 A̱yi vuzana wi n wovon u u Vuzavaguɗu wi ta̱ a̱ kuciya̱ ida̱shi i ma̱ta̱na̱,

kpamu Vuzavaguɗu wi ta̱ o ku okpo ubuta̱ u kusheɗeku u muku n ni.

27 Wovon u Vuzavaguɗu u ɗaɗa ubuta̱ u wuma,

u ɗa u ku zuwa vuma u pasa maza mu u kpa̱.

28 Tsugbayin tsu mogono tsu ɗaɗa ka̱bunda̱i ka uma a na wi na a ɗa,

ama uma i lo baci ba, tsugono gbani ɗa.

29 Vuma na u tsu na̱mgba̱ ka̱tsuma̱ ba, wi ta̱ n kuyeve,

ama vuza vu una̱mgbi u ka̱tsuma̱ u tsu tuka̱ ta̱ tsulau tsu ni e keteshe.

30 Ka̱ɗu ki ida̱shi ka̱ tsu neke ta̱ wuma i kyamba,

ama cisheꞋe tsu tsu shamatangu ta̱ etele.

31 A̱yi vuza na u doroi vuza vu unambi, u goyo ta̱ Vuzavaguɗu,

ama vuza na baci de dem u ɓa̱nka̱i vuza vu unambi, u cikpa ta̱ Ka̱shile.

32 A za gbani-gbani, e le ɗa a tsu vakangu ka̱cikele n ka gbani-gbani ke le,

ama aza usuɓi a tsu ere ta̱ ka̱cikele n ka singai ke le.

33 Ugboji wi ta̱ ida̱shi u vuza kuyeve dem,

a li a̱ ka̱tsa̱ma̱ ka wuma u alau feu u tsu yotsongu ta̱ ka̱cika̱ni.

34 Usuɓi u tsu neke ta̱ uduniya tsugbayin,

ama u nushi u tsu neke ta̱ uduniya wono.

35 Mogono ma tsu pana ta̱ u yoꞋo u kagbashi ku ugboji,

ama wupa u ni wi ta̱ ubuta̱ u vuza na u tsu yaꞋan ili wono.