1 Akaka a Agu kolobo ka Yake.

Vuma va u danai, Vuzavaguɗu Ka̱shile moꞋuta̱

Mpa moꞋuta̱, Vuzavaguɗu, utsura u va̱ u kotso ta̱.

2 Mayun mpa n lata̱ ya ba dem tsulau.

mi n kuyeve tsu uma.

3 Mpa n la̱nsa̱ kuyeve ku ugboji ba,

mpa kpamu n yeve vuza ciɗa vu nanlo ba.

4 Ya yi u sawai ku kumba gaɗi ɗa u cipa̱i?

Ya yi u sawai kureme wunla̱ a kataka ka kukiye ka ni?

Ya yi u sawai ku ka̱ta̱la̱ mini a kuminya ku ni?

Ya yi kpamu u shikpa̱i uteku wu uduniya?

Ya yi a ci ɗeke kula ku ni, kpamu ya yi a ci ɗeke kula ku maku ma̱ ni?

Dana mu, vu yeve ba ci.

5 Kadanshi ka Ka̱shile ra̱ka̱ mayun ɗa,

ma̱ra̱ga̱ ma a, wa aza na a̱ la̱nsa̱i kusheɗeku wa̱ a̱ ni.

6 Ka̱ta̱ vu doku kadanshi ka̱ ni ba,

ta lo wa ku dansuka wu ka̱ta̱ vokpo kayan ka uwa.

7 Vuzavaguɗu i li ire i ɗa n la̱nsa̱i wa̱ nu,

yaꞋan ka mu i ɗa kafu n kuwa̱.

8 Takpa ukuna wa uwa u bana dangi n mpa,

ka̱ta̱ vu neke mu uciyi ko unambi ba,

ama neke mu ilikulya derere n ucigi u va̱,

9 ta lo ma cuwa̱ ka̱ta̱ n cinukpa n a̱vu,

ka̱ta̱ n dana <<Ya yi Vuzavaguɗu>>

ko kpamu n namba ka̱ta̱ n boko,

ka̱ta̱ n la̱nga̱sa̱ kula ku ka Ka̱shile ka̱ va̱.

10 Ka̱ta̱ vu la̱nga̱sa̱ kagbashi kula ubuta̱ u vuzagbayin vu ni ba,

ta lo va yaꞋan unushi u na a kila̱kpa̱ wu.

11 N kukece ta̱ ili gbaniꞋgbani i na̱shi i na uma a ci yaꞋan,

aza yoku a ci shika ta̱ ishekpu i le

ka̱ta̱ a̱ kpa̱ɗa̱ ku cikpa ina̱kpu i le.

12 Aza yoku a ce ene ta̱ ka̱cika̱le i ta̱ ciɗa,

ashe tana i ta̱ nu unata.

13 Aza yoku i ta̱ na a̱ra̱ɗi,

a ci ɗika ta̱ ka̱cika̱le e le va ili yoku i ɗa.

14 Aza yoku anga e le otokobi a ɗa,

atakpamkpatsu e le kpamu mawun ɗa,

adama na okotsotongu aza unambi uduniya ra̱ka̱,

n ofoloni ra̱ka̱ a ka̱tsuma̱ ka uma.

15 Kutsa̱n ki ta̱ n nkere nre. A ci ɗeke le ta̱.

Nemu koɓolo n Nemu.

Ili tatsu yi ta̱ lo i na i ci cuwa̱ ba,

Ali i na̱shi i na i ci dana <<U yawa mu ta̱ ba.>>

16 E le ɗa, asaun, n ka̱tsa̱ma̱ ka madari ma na ma maci ba,

n iɗika i na ka̱ta̱ i cuwa̱i n mini ba,

n akina a na a sawai ku dana, <<U yawa mu ta̱ ba,>>

17 A̱shi a na o goyoi dada

ɗa a iwain kucikpa mma

agawun a kuyene i ta̱ a kuta̱sa̱ a ɗa

ka̱ta̱ asakali a takuma le.

18 I li itatsu ɗa yi a ku neke mu mereve,

a li i na̱shi i na n yeve ba

19 u teku tsu na kajimba ka tsu wala gaɗi,

u teku tsu na koko ka tsu wala a katali,

u teku tsu na kpantsu ku tsu wala a mini,

n uteku tsu na mavali ma tsu yaꞋan n mekere.

20 Na ɗa u teku tsu na kashakanlai ki

u lyaꞋa ba ci ka̱ta̱ u gboro una̱

ka̱ta̱ u dana, <<Mpa n yaꞋan u nushi ba.>>

21 I li yi ta̱ lo i na̱shi

i na vuza u duniya u ku fuɗa ku yaꞋan ahankuri i ɗa ba,

22 kagbashi ɗa baci kokpoi mogono,

n kalau a yaꞋan na baci ka̱cuwa̱i n ilikulya,

23 ɗa baci vuka vu unambi u mapasa u ciya̱i vali,

n kagbashi ka na ka gadai a̱na̱ku a̱ ni.

24 I li i kenu i na̱shi feu yi ta̱ lo u duniya,

ama i ta̱ n ugboji ka̱u,

25 Ojuno i nu utsura ba,

ama a tsu la̱nsa̱ ta̱ ilikulya i le n lyushi

26 Rema nnama n ɗa n na mi babu utsura,

ama dem n nanai a ci maꞋa ta̱ i uwa i le a tali,

27 Akyun i n mogono ba,

ama dem n nanai a tsu wala ta̱ magaba,

28 Karagba, vi ta̱ a kufuɗa vu ka̱na̱i n ekiye,

dem n nanai a tsu uwa ta̱ a kefeku ka mogono.

29 Ili i tatsu yi ta̱ lo,

ali i na̱shi i na i tsu wala n atankama.

30 E le ɗa kawu, a̱ yi na ulai ya ba dem mgbayin a ka̱tsuma̱ ka nnama,

a̱ yi na u tsu kpatala adama a vu toku ba,

31 n kepen ki isali n ma̱ga̱ji,

koɓolo n mogono ma na mi koɓolo n osoji a̱ ni.

32 Ɗa baci vi ɗe a tsulau, a ku yaꞋanka ka̱cika̱ nu a̱ra̱ɗi

ko kpamu a fama an foɓo adama kagbani-gbani,

to pala una̱ u nu n kukiye.

33 tsu na kukuciwa ku mani ku tsu tuka̱ n maniꞋin,

u pinda̱ri u vunu kpamu u zuwa mpasa mu uta̱ a vunu,

ta feu wupa u tsu tuka̱ n vishili nanai.