1 Muku n va̱, panai odoki ana Dada ɗa̱ u piꞋisakai ɗa̱.

zuwa ugboji, vi ta̱ kpamu a̱ kuciya̱ ku yeve.

2 Adama ana n mi ta̱ e kuneke ɗa̱ odoki a singai, ka̱ta̱ i ka̱sukpa̱ ku piꞋisa ku va̱ ba.

3 A ayin ana mi ishi maku a kpaꞋa ku Dada va̱,

mpa maku mo mogono maꞋan, maku mu ucigi maꞋa wa̱ a̱na̱ku a̱va̱,

4 u piꞋisakai mu ɗa udanai mu,

<<Reme kadanshi ka̱va̱ n ka̱ɗu ka̱ nu,

tono wila̱ u va̱ vi ta̱ a̱ kuciya̱ wuma.

5 La̱nsa̱ cicoꞋo, la̱nsa̱ kuyeve,

ka̱ta̱ vu cinukpa ko vu iwan kaꞋa,

6 Ka̱ta̱ vu ka̱sukpa̱ cicoꞋo ba, ci ta̱ tana e ku ere wu,

ciga tsu ɗa, tsu ɗa ci ta̱ tana feu a kula̱na̱ wu.

7 Ugiti u cicoꞋo u ɗanna, ciya̱ cicoꞋo, n ili i na vu ciya̱i dem,

ciya̱ ku yeve.

8 Ciga tsu ɗa, ci ta̱ a kuneke wu tsugbayin.

oɓongu tsu ɗa, ci ta̱ tana kpamu a kuneke wu tsugbayin.

9 Wi ta̱ a ku okpo wu ma̱kuꞋun ma tsugbayin a kaci ka̱ nu,

ma̱kuꞋun ma singai ma ku cikpa kpamu.>>

10 Pana, maku ma̱va̱, ushuku n ili i na n danai,

a̱ya̱ a wuma a̱ nu kpamu i ta̱ o ko okpo a̱ ka̱bunda̱i.

11 N piꞋisa ka wu ta̱ ɗe, uye u cicoꞋo,

n tonoi n avu a uye u na wi mejege.

12 Vu yaꞋan baci nwalu n cicoꞋo, babu ili i na ya ku kpada wu uye,

a makyan mana vi a ilaɗi, vi a kuta̱ɗa̱tsa̱ ba.

13 Reme odoki a nanlo a n utsura, ka̱ta̱ vu ka̱sukpa̱ a ɗa ba,

reme a ɗa mayin, adama ana wuma uɗa wa̱ nu.

14 Ka̱ta̱ vu uwa a uye wa aza gbani-gbani ba,

ka̱ta̱ kpamu vu yaꞋan nwalu a uye wa aza a na a kuyaꞋan gbani-gbani ba.

15 Katsukpa, ka̱ta̱ vu wala a uɗa ba,

kpatala vu ka̱sukpa̱ u ɗa, ka̱ta̱ vu yaꞋan nwalu n nu kau.

16 Adama ana aza a gbani-gbani a nanlo a tsu lata ba,

sai a yaꞋan kagbanigbani, alavu a tsu ka̱na̱ a̱shi e le ba,

sai a zuwa vuza yoku u ta̱ɗa̱tsa̱.

17 Kagbanigbani ka ɗaɗa ilikulya i le,

vishili kpamu vu ɗaɗa ili i kusoꞋo i le.

18 Uye wa aza a usuɓi wita̱ uteku tsu ku uta̱ ku kutashi ku kanna ku ɗa,

kutashi kuna ku tsu ka̱na̱ kudokusu ali wa akana kanna a kaci mayin.

19 Uye wa aza gbani-gbani wita̱ u teku tsu ka̱yimbi ka kpaɓam,

a̱ tsu yeve i na i tsu zuwa le ku ta̱ɗa̱tsa̱ ba.

20 Maku ma̱va̱, pana i na mi a kudansa,

zuwa atsuvu mayin vu pana kadanshi ka̱ va̱.

21 PiꞋisa kaꞋa ka̱ta̱ vu ka̱sukpa̱ ka ka̱ uta̱ a kusheshe ku nu ba,

zuwa kaꞋa a ka̱ɗu ka̱ nu,

22 adama ana wuma u ɗa, wa aza ana i a̱ kula̱nsa̱ le.

n upoci wi ikyamba i vuma ra̱ka̱.

23 Ere ka̱ɗu ka̱ nu n utsura u nu ra̱ka̱,

adama ana a̱ ka̱tsa̱ma̱ ka̱ ni ka wuma u tsu uta̱ tsu mini.

24 Vu ka̱sukpa̱ kadanshi ka a uwa,

ka̱ta̱ kpamu vu yaꞋan daꞋin n kadanshi ku una̱ ure, ure.

25 Ka̱sukpa̱ a̱shi a̱ nu a inda magaba mayin,

a ukuna u kadanshi ka̱ nu mayun ɗa.

26 Vu yeve ana vu yeve ta̱ ili i na vi a kuyaꞋan,

ili i na vi a kuyaꞋan ra̱ka̱ kpamu yi ta̱ o ku okpo mayin.

27 Ka̱ta̱ vu katsukpa usingai ko u gula̱ ba,

takpa kune ku nu a uye u ka gbani-gbani.