1 panai, ugboji wita̱ a̱ meɗevile,

kuyeve a ku ɗengusa̱ ka̱la̱ka̱tsu ka̱ ni.

2 A nsasan, n uye,

a uɓon u na nsanji n gasai, talo u shamgbai.

3 a̱ ka̱kina̱ ku utsutsu u na u uwai a likuci,

a utsutsu u likuci a̱ meɗevile n ka̱la̱ka̱tsu kagbayin.

4 <<A̱ɗa̱ ali, a̱ ɗa̱ ɗa mi a meɗevile,

meɗevile ma̱ va̱ a u yabadem ɗa.

5 A̱ɗa̱ aza unambi u kusheshe, piꞋisai kuyaꞋan ugboji,

a̱ ɗa̱ alau, la̱nsa̱i kuyeve.

6 Zuwai atsuvu i pana, adama ana mita̱ a kudana ɗa̱ ili singai,

ili i na baci de dem n dansai i singai i ɗa.

7 Kadanshi kana n dansai mayun ɗa,

kagbanigbani, ili yu unata i ɗa a una̱ u a̱va̱.

8 Kadanshi ku una̱ u va̱ ra̱ka̱ kasingai kaꞋa,

koyoku ki punu ka na ki usokongi ba, ko a uwa.

9 Ra̱ka̱ vu le i ta̱ gaɗi u vuza kuyeve,

derere ɗa kpamu a ubuta̱ wa aza ana i n kuyeve.

10 Zagba odoki a̱ va̱, una̱ wa azurufa,

kuyeve kpamu una̱ u kazanariya kasingai,

11 adama ana ugboji u lata̱ idolu i singai tsuloboi,

ili i na vu laꞋi n kuciga ra̱ka̱, wi ku gisanku n a̱yi ba.

12 <<Mpa, ugboji, mi ta̱ n ugboji,

mi ta̱ n kuyeve koɓolo n ma̱riki.

13 Wovon u Ka̱shile, u ɗaɗa vu iwan kagbanigbani,

ugbamukaci, n a̱ra̱ɗi, n uye u kagbanigbani.

n kadanshi ka kuya̱nsa̱, n iwan ta̱ kaꞋa.

14 Mita̱ n odoki n ugboji,

mi ta̱ n kuyeve, n utsura.

15 N ɓa̱nka̱ ta̱ ngono ubuta̱ u tsugono u le,

a yaꞋin a fada kpamu a zuwa odoki a singai.

16 N uɓa̱nki u va̱ uɗa ngono ra̱ka̱ mi a kulyaꞋa tsugono,

ta feu aza kelime n a yaꞋin afada i nanai.

17 N ciga ta̱ aza ana a cigai mu,

aza ana a̱ la̱nsa̱i mu ita̱ a̱ kuciya̱ mu.

18 Uciyi n tsugbayin wi ta̱ wa a̱va̱,

uciyi u babu uteku n wu usuɓi.mayun ɗa.

19 Ili i na vu ciya̱i wa̱ a̱ va̱ u laꞋa ta̱ kazanariya ka singai,

i laꞋa ta̱ azurufa a singai.

20 N wala ta̱ a uye wu usuɓi,

a uye u kamayun,

21 n neke uciyi wa aza ana a cigai mu,

n shatangu mpon le kpamu n uciyi.

22 <<Mpa ɗa vuza vu ugiti vuna Vuzavaguɗu u gita̱i kuyaꞋan,

kafu u yaꞋan ili dem.

23 A yaꞋan mu ta̱ ali n ayin ugiti,

kafu u gita̱ wa aduniya.

24 A matsa mu ta̱ mala mu uga̱vi,

makyan mana babu a̱shi a̱ mini.

25 Kafu a yaꞋan nsansa,

ɗa a yaꞋan mu a ginda,

26 kafu uyaꞋan aduniya n akamba

ko kafu na utuka̱ kayala ku ugiti.

27 Mpa mi ta̱ lo ayin ana u yaꞋin gaɗi,

a na u pecei uteku u mini,

28 a na u yaꞋin eleshu gaɗi,

ɗa kpamu u zuwai uga̱vi wa nɗolu,

29 a na u zuwakai malaꞋa u teku,

adama ana ka̱ta̱ mini ma laza ubuta̱ u na a zuwa ni ba,

kpamu, a na u zuwai u teku wu uduniya.

30 Mpa ugboji mi ta̱ koɓolo n a̱yi, tsu kafuɗi ku ulinga.

mpa ɗa makyan dem u tsu pana u yoꞋo,

a yin tutu n tsu yaꞋan ta̱ ma̱za̱nga̱ n a̱yi.

31 Mi ta̱ ma̱za̱nga̱ n aduniya a̱ni ra̱ka̱,

mi ta̱ kpamu a kupana u yoꞋo vuma lima̱.

32 <<Gogo na, a̱ɗa̱nga̱ni a va̱ panai kadanshi ka̱ va̱,

yaꞋin tsu na n danai, vi ta̱ tana a kuyaꞋan ma̱za̱nga̱.

33 Panai, odoki a̱ va̱ adama ana i gbojo,

ka̱ta̱ i iwan a ɗa ba.

34 Vuza vu una̱singai ɗa vuza na u panakai mu,

wi kashani utsutsu kanna dem,

a ku vana utsutsu u ku wala u va̱.

35 Adama ana vuza na baci dem u ciya̱i mu, u ciya̱ ta̱ wuma.

iyoci i kuciya̱ mapasa ma singai ubuta̱ u Vuzavaguɗu ɗa.

36 Ama vuza na baci dem u kpa̱ɗi kuciya̱ mu, u foro ta̱ ka̱cika̱ni,

vuza na baci de dem u iwain mu, u ciga ta̱ ukpa̱Ꞌa̱.>>