1 Ka̱ɗu ko mogono ki ta̱ tsu mini mo kuɗolu

a kukiye ku Vuzavaguɗu,

Vuzavaguɗu tsu vadalukpai ta̱ ubuta̱ una wi a kuciga dem.

2 Vuma wi ta̱ a kusheshe uye u ni mayin ɗa wi,

ama Vuzavaguɗu utsu gisanku ta̱ ka̱ɗu.

3 KuyaꞋan kamayun n usuɓi,

u laꞋa ta̱ alyuka wishi ubuta̱ u Vuzavaguɗu.

4 Ugbamukaci n a̱ra̱ɗi,

ɗaɗa ma̱kuni ma aza gbanigbani.

na lo va tana unushi uɗa.

5 Kusheshe ku ma̱riki kpamu ku tsu neke ta̱ uciyi wa a̱bunda̱i,

ama vuza na u sheshe gogoꞋo u tsu okpo ta̱ n unambi.

6 Uciyi u na uma a ciya̱i ubuta̱ wa elentsu a uwa,

u tsu kotso ta̱ an ka̱nga̱,

kpamu u tsu banka ta̱ vuma ubuta̱ wu ukpa̱.

7 Unambi wu usuɓi wa a za gbanigbani wi ta̱ a ku pura̱ngu le u lazaka,

a dama na a iwain ta̱ kuyaꞋan ili i na yi i ma̱riki.

8 Uye u vuza vu u nushi u tsu yongo ta̱ n o kondo,

ama ka̱ɗu ka vuza vu babu unushi ka ci yaꞋan ta̱ kamayun.

9 U kulaꞋa ta̱ n kugaꞋan vu da̱sa̱ngu a kunu ku kenu pulai,

ana va kuda̱sa̱ngu asuvu a kpaꞋa ku gbayin n vuka vu vishili.

10 Ka̱ɗu ka vuza gbanigbani ka ci sheshe ta̱ kuyaꞋan kagbanigbani,

u tsu pana asuvayali a vuza na i a ida̱shi ɗeɗevu ba.

11 Makyan mana baci a takacikai aza a kugoyi,

vuza vu unambi u kusheshe feu u ci ciya̱ ta̱ ugboji.

makyan ma na a yaꞋankai vuza vu ugboji kadanshi,

utsu doku ta̱ n kuyeve.

12 Ka̱shile, vuza vu usuɓi, u tsu zuwa ta̱ a̱shi a kpaꞋa ku vuza ka gbani-gbani,

utsu goyo ta̱ aza gbani-gbani ali a̱ na̱mgba̱.

13 Vuma u kpanduku baci atsuvu a̱ ni adama a̱ ma̱shi ma vuza vu unambi,

a̱yi feu wita̱ a kuyaꞋan ma̱shi ma̱ kula̱nsa̱ uɓa̱nki,

ama wi tana feu a̱ kuciya̱ wushiki ba.

14 KuneꞋe ku usokongi ku tsu loko ta̱ wupa,

kalya kpamu ka vaꞋanku ta̱ wupa u gbayin.

15 Ukuna u ma̱za̱nga̱ uɗa u vuza vu usuɓi,

a yaꞋan afada a mayun,

ama u vuza gbani-gbani, ili yi una̱mgbi u ka̱tsuma̱ i ɗa.

16 Vuma na u puwa̱nka̱i a ubuta̱ u cicoꞋo,

wi ta̱ a kuvuka o koɓolo ka a̱kpisa̱.

17 Vuza na de dem u cigai kupana ku uyoꞋo, wi ta̱ o ku okpo vuza vu unambi,

vuza na de dem u cigai ma̱kya̱n n maniꞋin,

wi a ku saꞋawa ku okpo vuza vu udukuyan ba.

18 A tsu takacika ta̱ vuza gbanigbani adama na isa vuza vu usuɓi,

vuza vu babu kamayun kpamu

adama ana isa vuza kamayun a̱ ka̱ɗu.

19 U lata̱ n kugaꞋan vu da̱sa̱ngu a ka kamba,

ana va kuda̱sa̱ngu n vuka vu wupa n vishili.

20 A kpaꞋa ku vuza vu cicoꞋo ubuta̱ u kufoɓo ilikulya m mani ma singai u ɗa.

ama kalau ka tsu lyaꞋa ta̱ ili i ni i na wi n i ɗa ra̱ka̱.

21 Ya ba dem vu na u la̱nsa̱i usuɓi koɓolo n ucigi,

u ci ciya̱ ta̱ wuma, n uciyi n tsugbayin.

22 Vuza vu cicoꞋo vi te u tsu lyaꞋa ta̱ likuci i gbangam,

vuna a fuɗi o kuvon i a kpaꞋa ku ni,

ali u ɓoso mashilya mana i a kukeɗeke a̱pa̱.

23 Vuza na de dem u ka̱na̱i una̱ u ni n kelentsu ka̱ ni,

u tsu ere ta̱ ka̱cika̱ni a ubuta̱ wa atakaci.

24 Vuza vu ugbamukaci n vuza va a̱ra̱ɗi,

vuza ku kugoyi ɗa kula kuni,

u tsuyaꞋan ta̱ ili n kugoyi n a̱ra̱ɗi.

25 Mali ma vuza wono mi ta̱ o ku okpo ukpa̱ uni,

adama ana ekiye a̱ ni a iwan ta̱ ku yaꞋan u linga.

26 Kanna lakam uma a gbanigbani a tsu dakaka ta̱ adama a na a yaꞋan modoruko,

ama vuza vu usuɓi u tsu dakaka ta̱ adama na u neke ba̱ri.

27 Alyuka a vuza gbanigbani ili yu unata i ɗa,

be le kuneꞋe ku na a̱ tuka̱i n kusheshe ku gbanigbani.

28 MagaꞋan ma uwa mita̱ a ku takacika,

ama i ta̱ a ku ɗesukpa̱ vuza na u tsu dansa kasingai.

29 Uma a gbanigbani a tsu ɗika ta̱ ka̱cika̱le e yeve ta̱ ili ra̱ka̱,

ama a za usuɓi a tsu sheshe ta̱ u kuna wi na a kuyaꞋan.

30 Babu ugboji, ko kuyeve, ko odoki

a na a kulaꞋa Ka̱shile.

31 A tsu foɓo so ta̱ ko odoku adama a kanna ka kuvon,

ama ulyai u Ka̱shile u ɗa.