1 Ɗa baci vu da̱sa̱ngi kulyaꞋa ilikulya n mogono,

la̱na̱ ka̱ta̱ vindana mayin i na yi e kelime ka̱ nu.

2 Avu vuza kalya ɗa baci,

to, reme ka̱cika̱nu,

3 Ka̱ta̱ vu yaꞋan mali mi ilikulya i ni ba,

adama ana i ɗaɗa cico tsu nu ba.

4 Ka̱ta̱ vu takacika ka̱cika̱nu adama a kula̱nsa̱ udukuyan ba,

gbojo ko ka̱cika̱nu adama ana vu suma kaꞋa,

5 adama ana, ayin ana baci de dem vu la̱na̱i u ɗa wi ta̱ o ku kotso,

adama ana sawu ɗa o tsu topo evelyu,

a tsu imkpi tsu shafu gaɗi a Ka̱shile.

6 Ka̱ta̱ vulya ilikulya i vuza vu ulyopi ba,

ka̱ta̱ vu yaꞋan mali mi ilikulya yu uyoꞋo i ni ba,

7 adama na a̱yi vuza cico ci na wa kuna ɗa.

Ka̱ta̱ u dana<<LyaꞋi n i soꞋi.>>Ama ka̱ɗu ka̱ ni ki lo koɓolo n a̱ɗa̱ ba.

8 Vi ta̱ a kushama i kenu i na vu lyaꞋi va,

ka̱ta̱ vu la̱nga̱sa̱ kadanshi ka singai ka̱ nu.

9 Ka̱ta̱ vu yaꞋan kadanshi atsuvu a kalau ba,

adama na wita̱ a kugoyo ugboji u kadanshi ka̱ nu.

10 Ka̱ta̱ vu muɗa̱ urotu u kureꞋe wi iɗika u tsumani ba

ko kpamu vu pasa visa ashina a mkpan ba,

11 adama ana kishi ke le, vuza vu utsura ɗa,

wita̱ a ku shamgba adama e le ka̱ta̱ u shilika̱ n na vu.

12 Zuwa asuvu, ka̱ta̱ vu pana kuyotsongu,

vu zuwa atsuvu a̱ nu kpamu ubuta̱ u kadanshi ku ugboji.

13 Ka̱ta̱ vu ka̱sukpa̱ ku gbara maku ba,

adama na ko niniɗai baci vu lapai ni wi a ku kuwa̱ ba.

14 Adama na ɗa baci vu lapai ni n kafabatsu,

vu ɓa̱nka̱ ta̱ wuma u ni ubuta̱ wa atakaci a munuka.

15 Maku ma̱va̱, ɗa baci vu gbojoi,

ka̱ɗu ka̱va̱ feu ki ta̱ o ku yokpo.

16 Wuma u va̱ u kuyaꞋan ta̱ ma̱za̱nga̱,

ɗa baci una̱u nu udanshi kasingai.

17 Ka̱ta̱ vu yaꞋan tsurala tsu vuza vu unushi ba,

ama ayin tutu vu yongo n tsurala tsu wovon u Ka̱shile.

18 Ɗa baci vu yaꞋan nanai, vi ta̱ a ku yaꞋan ma̱za̱nga̱ a ayin a kelime,

kpamu Ka̱shile ki ta̱ a ku yaꞋan kawu i na vu cigai u yaꞋan ka wu.

19 Maku ma̱va̱, zuwa atsuvu mayin vu pana adama na vu ciya̱ ugboji,

ka̱ta̱ vu zuwa ka̱ɗu ka nu uye u singai.

20 Ka̱ta̱ vu gbaɓa ka̱cika̱nu n osoꞋi ba,

ko kpamu aza kalya ba,

21 adama na osoꞋi koɓolo n aza kalya a i ta̱ o kokpo aza unambi,

ka̱ta̱ agbaɗiki a pala le n akashi.

22 Pana kadanshi ka eshevu a̱ yi na u neke nu wuma,

kpamu ka̱ta̱ vu goyo a̱na̱ku a̱ nu a ayin a na u kuci ba.

23 Tsula kamayun ka̱ ta̱ vu denge ba,

ka̱ta̱ kpamu vu ciya̱ ugboji n ugbari n kuyeve.

24 Muku mu usuɓi n tsu zuwa ta̱ i sheku e le ma̱za̱nga̱.

25 YaꞋan i na dada nu n a̱na̱kpa̱ nu a kuyaꞋan ma̱za̱nga̱,

ka̱ta̱ kpamu vu ka̱sukpa̱ a̱na̱kpa̱ nu a na a maci nu feu a yaꞋan ma̱za̱nga̱.

26 Maku ma̱ va̱, neke mu ka̱ɗu ka̱ nu,

ka̱ta̱ vu ka̱sukpa̱ a̱shi a̱ nu o tono uye u va̱.

27 Adama ana kashakanlai kpenle ku ɗa ku uga̱vi,

vuka vu vuza kpamu uye wa atakaci u ɗa.

28 U tsu vaku ta̱ a ku vana an vuza maga̱lka̱,

ka̱ta̱ u ka̱na̱ ku doku ka̱bunda̱i ka aza tsugbani.

29 Ya yi ɗa wi a malapa mu? Ya yi ɗa wi u na̱mgbi u ka̱tsuma̱?

Ya yi ɗa u tsu zama vishili babu unushi? Ya yi ɗa u tsu ka̱na̱ mololo an deꞋen ni?

Ya yi ɗa vuza na wi n muna babu munla̱i?

Ya yi ɗa tsu yongo n a̱shi a shili?

30 A̱yi ɗa vuza na u ci geshe ubuta̱ u kusoꞋo ku ma̱ra̱,

Aza na u tsu ka̱na̱ kusoꞋo ma̱ra̱ icuꞋu kakau.

31 Ka̱ta̱ vu ka̱sukpa̱ ma̱ra̱ ma la̱nga̱sa̱ wu ba,

ko ana mo okpoi ushili n ugaꞋin u kene,

nu uyoꞋo u kusoꞋo.

32 Ka̱ta̱ u koci u ka̱na̱ kuluma yi an koko,

a mataɗaka an kudyaɓu.

33 Ka̱ta̱ a̱shi a̱ nu a ka̱na̱ kene ili kakawu,

ka̱ta̱ vu ka̱na̱ kusheshe u kuna n kadanshi ka kavama.

34 Ka̱ta̱ vokpo an vuma na u vaki a mala,

ko an vuma na wi a̱ ka̱ta̱la̱la̱ gaɗi vu maɗanga ma kpantsu a mini.

35 Ka̱ta̱ vu dana, ai vuza yoku u lapa mu ta̱, <<Ama u foro mu ba,

a lapa mu ta̱ ama n pana n ɓa̱la̱ ba.

Wanai ɗa ma ku jimgba n soꞋo ma yoku.>>