1 Kula ku usingai ku laꞋa ta̱ udukuyan wa a̱bunda̱i,

mapasa ma singai ma laꞋa ta̱ uciyi wa azurufa n wa azanariya.

2 Vuza vu uciyi n vuza vu unambi ili i te i ɗa,

adama a na Ka̱shile kaꞋa ka yaꞋin le dem.

3 Vuza vu usuɓi u ce ene ta̱ kawuya ka̱ta̱ u sheɗeku,

ama kalau ka tsu uka ta̱ ka̱ci ka̱ ni ka̱ta̱ ta na u takacika.

4 U ka̱ni u kaci n wovon u Ka̱shile,

udukuyan u ɗa n tsugbayin n wuma.

5 Awana n maza i ta̱ uye wa aza a gbani-gbani,

vuza na dem u foɓusoi ka̱ɗu ka̱ ni wi ta̱ a ku yaꞋan daꞋangi n a̱ le.

6 Yotsongu maku uye u na wa ku tono,

ko u kutsa ba ci wi a kucinukpa nu ɗa ba.

7 Vuza vu uciyi u tsu lyaꞋaka ta̱ vuza vu unambi tsugono,

vuza kutan kpamu kagbashi kaꞋa e kiye a ka nekei.

8 Ya ba dem vu na uca̱Ꞌi ka agbanigbani, wi ta̱ ku kyaꞋa kagbanigbani,

kpamu kalangu ka modoruko ka ni ki ta̱ o ku koɗo.

9 Ya ba dem na u tsu neke ba̱ri wita̱ a ku ciya̱ una̱singai,

adama ana ilikulya i ni i ɗa u tsu pece ke aza unambi.

10 Utuka̱ vuza kugoyi, yeve ka̱ta̱ vishili vu kotso,

ka̱ta̱ vishili n ishikushi i kotso.

11 A̱yi na u tsuyaꞋan kasingai ka̱ta̱ u dansa mayin,

wita̱ o ku okpo ka̱ja̱Ꞌa̱ ko mogono.

12 A̱shi a̱ Ka̱shile i ta̱ a kinda kuyeve,

ama u tsu taɗuku ta̱ kadanshi ka gbanigbani.

13 Korogo ka tsu dana ta̱, <<Kawu wita̱ lo pulai.

muꞋuta̱ baci wita̱ a ku una mu uye.>>

14 Una̱ u kashakanlai kpenle ku uga̱vi ku ɗa,

vuza na Ka̱shile ki a wupa n a̱yi wita̱ a ku yikpa̱ a ku ɗa.

15 Tsulau cita̱ ugbaɓurangi n ka̱ɗu ka maku,

ama mashashau mu ugbari mi ta̱ o ku lokoi u ɗa.

16 Vuza na de dem u takacikai vuza vu unambi adama ana u doku udukuyan u ni,

ko kpamu u nekei vuza vu udukuyan ili, wi ta̱ a ku okpo n unambi.

17 Zuwa atsuvu vu pana kadanshi ka vuza vu ugboji,

ka̱ta̱ vu yaꞋan cicoꞋo a̱ ka̱ɗu ka̱ nu,

18 adama ana, wita̱ a kugaꞋan, ɗa baci vu zuwai le a̱ nu,

ɗa dem vu le a̱ ciya̱i ida̱shi una̱ u nu.

19 Adama ana kamayun ka̱ nu ko yongo u Vuzavaguɗu,

n yotsongu wu ta̱ e le anana.

20 Kadanshi ka kamangankupa kaꞋa na kana n ɗana kai nu,

kadanshi ko odoki n kuyeve ba,

21 adama ana n yotsongu wu ili i na yi kamayun,

adama ana vu neke wushuki u mayun.

22 Ka̱ta̱ vu ya̱nsa̱ vuza vu unambi, adama ana wi nu unambi ba,

ko kpamu vu doro aza unambi ubuta̱ wa afada,

23 adama ana Vuzavaguɗu u tsu shamgba ta̱ adama e le,

ka̱ta̱ wu una wuma u vuza na u ya̱nsa̱i le.

24 Ka̱ta̱ vu yaꞋan cija̱Ꞌa̱ n vuza wupa ba,

ka̱ta̱ vu gbaɓa ka̱cika̱nu n ka yaꞋin ka̱ vishili ba,

25 Talo va tono uye u ni

ka̱ta̱ vu uka ka̱cika̱nu a maza.

26 Ka̱ta̱ vu ushuku ku tsupa ka vuza kutan ba,

ko kpamu vu okpo magan adama vuza kutan ba,

27 adama ana ɗa baci vi n ili i na vu kutsupaka ba,

i ta̱ a ku ɗika kajiba ki ivaꞋin ka nu a laza ka.

28 Ka̱ta̱ vu takpa katali ka kureꞋe ka aza a cau,

kana ikaya i nu i shikpa̱i ba.

29 Vu tsu e ene ta̱ kafuɗi ku ulinga ubuta̱ wu ulinga u ni?

U tsu shamgba ta̱ e kelime ko ngono,

ama wa ku shamgba u yaꞋanka aza ana e yevei ni ulinga ba.