1 Lꞌaasir iidni tak Beetaanyaay ikwiir lhaa iifi. Beetaanya Maryamwa tuukwa Maartaawwa hooy ikwiirneet gariyaati. 2 Beet tishakwiin Yasuuꞌiib iragadaayi kehii tifif tidꞌiit malya tehamooteesooh tiysis batuuh Maryamtu. Uun Lꞌaasir uulhaab aree batiiyooh san iikti. 3 Bariitaah taakwa Yasuuꞌii dehaay diigwatiyaaniit, "Wꞌankwanaay, wꞌaraawuuk wꞌareetiniyi lhaabi." idiin.

4 Yasuuꞌa toon imaasiwihoob, "Toon tulhanaay wꞌaakharuuh Lꞌaasiriit yat bitkaayeet toonaati. Tuun aree Ukwaasana matuun tiniiwi jillaay iikti tindi. Masi aree Ukwaasanaay Oor matuun imaar miyaadiib iikti tindi." idi.

5 Yasuuꞌa Maartaawwa tukwaatoohwa, Lꞌaasirwa areeya. 6 Lꞌaasiriit tulhanaayti sakana imaasiwihoob, oomhiin baruuh iifiyeeb masi maloot yina hooy yhagit.

7 Malya ikwiriyaatayeeh dehaay, "Yakaana, Yahuudaab beeti nitꞌigir!" idi.

8 Baraah "Seedna, shalik doori hankaay uudehay beentooy rajamootiyook yhariwna. Baruuk beentooy mꞌageert niyaamtiniya han?" idiin.

9 Yasuuꞌa "Oombꞌi tamna maloot saaꞌaat hooy kiihaayna han? Aflaay oombꞌii hiireeriiniibka iigaf kiidi. Baruuh toon tuduniyaati nuur rhiini. 10 Laakiin baruuh whawaad hiireeriiniyihoob, thibintuuyt eetgiif." idi.

11 Malya een ibhali idiit harꞌii, masi "Wꞌaraawuun Lꞌaasir nꞌariitiib dhibaabu, laakiin ani difiit isibꞌir andi." idi.

12 Ikwiriyaatayaah igwibiina, "Wꞌankwanaay, baruuh diwiiniyeek, shabhami indi." idiin. 13 Yasuuꞌa Lꞌaasiriit tooyat mitiyaaya. Laakiin baraah sidkiit nꞌari hiisiyaan.

14 Aflaay malya Yasuuꞌa oosdik ugwꞌagwaab bareeh sooya, "Lꞌaasir ayaabu, 15 laakiin bareeyookna jillaay ani bariiyooh geeb daayaab baakaayeet toonaatiib afirhaabi. Aflaay baraak aamani tiyadna. Yakaana barooh niibi." idi.

16 Toomaas, "Utiita" iidni, ikwiriyaatay irawee dehaay, "Yakaana hinin han niidif, aflaay bariiyooh geeb niiyyi!" idi.

17 Yasuuꞌa eeyanihoob, Lꞌaasir fadhigt yinaati suurii atoobsa yhagit. 18 Beetaanya Algudusee mhay kiiloomitir kitꞌaki. 19 Gwida Yahuudi dehay Maartaawwa Maryamii dehaay oosaniit yattiib allaayrahamooyiini jillaay yꞌaaba. 20 Maarta Yasuuꞌiib wꞌaay timaasiwihoob, bariiyooh ashuushi jillaay tifirꞌa. Laakiin Maryam ugawiib timhi.

21 Maarta Yasuuꞌii dehaay, "Wꞌankwanaay, baruuk tooy tiifiyeek, usanuun yaayi kiidi! 22 Laakiin oontꞌa han Ukwaasana raattiniyeenaaka iniiweetook toona akteen." tidi.

23 Yasuuꞌa batiiyooh dehaay, "Usanuuk tooyat hooy iidhhan indi." idi.

24 Batuuh "Baruuh tꞌaakharaatiit yin masi yaki indiyeet toona akteen." tidi.

25 Yasuuꞌa batiiyooh dehaay, "Ani ooyaku, ani umidhhanu. Aneeb aamaneen baliin iyaayiineek han, iidhhan iyadna. 26 Baliin aneeb aamaniit eedhhaniin, door han iiyyi kiidiin. Toon toona aamantinii?" idi.

27 Maarta "Awooh han Wꞌankwanaay! Baruuk Umasiih tikatiyeet toona aamanani. Ukwaasanaay Oor oodehayii dehaay yꞌiiniib barook tikatiyeet toona aamanani." tidi.

28 Maarta een ibhali tidiit harꞌii, tꞌagaraayt tookwa Maryam waliiktaayt haay titfal. Malya "Seedna tooy eefi, aree batiisook raatiini." tidi. 29 Maryam een ibhali timaasiwihoob, asti yaktaayt willa barooh ashuush tehariw. 30 Oontꞌa Yasuuꞌa masi tugariya shuumaab kiiki, laakiin masi Maarta hooy tꞌashsheeb oomhiin iifi. 31 Iyahuudi Maryami geeb ugawiib iifiin baliin, batooh allaayrahamootiib yꞌaa iifiin. Batooh ashshigee rhiyaanihoob, iramna. Baraah batuuh waawtii dehaay umiimash tiibiyeeb hiisiyaan.

32 Maryam Yasuuꞌa iifiyeeb oomhiin tiktim, aree barooh rhita. Batuuh bariiyeeh iragadaayi whii dhibtaayt, "Wꞌankwanaay, baruuk tooy tiifiyeek, usanu yaayi kiidi!" tidi.

33 Yasuuꞌa batooh waawee rhiya, masi uudehay batiiyooh geeb iifiin han kak waawiineeb rhiya. Barooh uginꞌuuh iribaayt winneet gadabiya. 34 Yasuuꞌa "Barooh naad tibisna?" idi.

Baraah "Wꞌankwanaay, mꞌaa shibiba" idiin.

35 Yasuuꞌa milootiya.

36 Malya Iyahuudi, "Kak barooh areeyaneeb shibibna!" idiin.

37 Laakiin gwadi bareesooh, "Ootak whamashay rhisiya. Lꞌaasir tooyatii naanhooy habiyaab kiiki?" idiin.

38 Yasuuꞌa masi tꞌa han winneet gadabiyaayt, umiimash ibi. Umiimashi dheefaay aweeb amar iikti iifi. 39 Yasuuꞌa "Wꞌawi hooy giigsaana!" idi.

Maarta ootak wꞌayaanaayt tuukwa "Wꞌankwanaay, baruuh itoobaaseekka fadhigt yina dꞌiyaabuuyt, dhimiyaayt hoon baraami tindi!" tidi.

40 Yasuuꞌa batiiyooh dehaay, "Batuuk aamantiniyeek Ukwaasanaay umatuun rhi tindii diyaayook kaaki han?" idi.

41 Wꞌawi hooy giigisiyaan. Yasuuꞌa asti ishbibaayt, "Ahammiid hook Baabu, tisnaakirheeba. 42 Baruuk diimaab tisnaakiireetu toona akteen. Laakiin een ibhali tooy oon oodehayi jillaay adi. Shaawti baruuk diigwataayu tikatiyeet toona aamani iyadna." idi.

43 Yasuuꞌa een ibhali idiit harꞌii, win hissii, "Lꞌaasir, firꞌa mꞌaa!" idi. 44 Uutak wꞌaya ifrꞌa eeya, iragadaayaahwa yꞌayaahwa kafani halakii amhakwiraaba, eefiir han halak kehii iifi.

Yasuuꞌa "Ootak umiimashi halaka hooy giigsaana, aree bagiigi." idi.

45 Gwida dehay Maryami rheesamtiib yꞌaa iifiin, Yasuuꞌa idꞌiyeet toona rhiyaaniit barooh aamaniyaan. 46 Laakiin gwadi bareesooh Ifariisi ibeeniit Yasuuꞌa idꞌiyeet toona sooyaan. 47 Malya Ifariisiiwwa ifagiiriya isuurkinaawwa Iyahuudi majlis waliikiyaaniit, "Kak niwari? Uun uutak ikwaaseet timꞌuujisa kasteeh shibibna! 48 Barooh bak neeꞌisheek, kassuuh uudehay barooh aamani iyadna. Iroomaani yꞌiit udiiniyoon gawwa whaashoonwa katꞌi iyadna." idiin.

49 Gaal bareesooh Kayaafaas iidna, been whawliib baruuh ufagiiri oowin iiktiib hadiidiya, "Baraak naat kitkanna! 50 Kassooh whaashi kwidhiika, oodehayi jillaay gaal takiit yat hanyiiseet toona kitkanna han?" idi.

51 Kayaafaas een ibhali uukna diyaab kiiki. Laakiin baruuh been whawil ufagiiri oowinnayt, Yasuuꞌa Iyahuudi dehayi jillaay iiyyi indiyeet toona iisrid. 52 Laakiin bareeh eebhat kiikeena, masi kassooh Ukwaasanaay dehay ibarar gaal garooy shaawawiyooyti jillaay ikati. 53 Beet tooyintii fidnaab Iyahuudi suurkina bariiyeeh madar niyaamiyaan.

54 Aflaay Yasuuꞌa Yahuudaay bitik gwꞌagwuuyt hiireeraab kiiki. Laakiin idifaayt umingaay dawil mhiin, Afraayim iidneet tumadiina ibi. Beentooy aree ikwiriyaatayi geeb isꞌa.

55 Whasamti iid iidwilihoob, gwida dehay wꞌiidi hankaay nhisuuyti jillaay whaash Algudus ibeen. 56 Baraah Yasuuꞌaab yhiriwna. Ukwaasanaay gawiib immarraayniit gaal uraawii dehaay, "Naan teekwinna? Baruuh sidik wꞌiidii dehaay yꞌi kiidi, bak kiiki?" idiin. 57 Laakiin ifagiiriya isuurkinaawwa Ifariisiiwwa amir hassiyaan. Yasuuꞌaab naad eefiyeeb marriibka beet toona ibakii sooyiiniyeet toonaati. Aflaay baraah bariiyooh abuuk yhariwna.