1 Oontꞌa Whasamti Wꞌiid lhayt iikti. Yasuuꞌa toon tuduniya ishtiit Ubaaba hooy iibiyeet tuusꞌa yꞌaat tiiktiyeet toona iktiin. Baliib barooh ooknaay iiktiin, toon tuduniyaatiib iifiin, diimaab areeya. Winneet ureerooh aree rhisiya.

2 Yasuuꞌaawwa ikwiriyaatayaahwa diraari kehii isꞌana. Aree uubliis suur akay Yahuudaab Wꞌiskaaryuuti Siimooni oori ginꞌiib shuumaa iifi. Barooh Yasuuꞌi nuunti isookwin. 3 Yasuuꞌa Ubaaba timmiima akrir hiiyyaab iiktiyeet toona iktiin. Baruuh Ukwaasanaay yꞌaab iiktiyeet toona iktiin, Ukwaasana eebiyeet toona han iktiin, 4 aflaay baruuh oodraar hooy yakiyaayt, ugamiisooh ifrꞌa, aree bashkiir ilbab. 5 Beenaay harꞌii, baruuh shalik yam tashiib idꞌiit ikwiriyaatayi ragada ishaagwidhaayt, ubashkiir ulabaab iiktiyeeb iyhaayt bareeh iragada dehaay balamisiya.

6 Malya Yasuuꞌa Siimoon Bitrusii dehaay eeya. Bitrus "Wꞌankwanaay, aniib iragada iishgwidh tindiya han?" idi.

7 Yasuuꞌa bariiyooh dehaay, "Ani adanꞌiyeet toona oontꞌa kaꞌafhamta, laakiin malya afhami tindiya." idi.

8 Bitrus "Abadan, aniib iragada iishgwidh kitdiya!" idi.

Yasuuꞌa igwibi, "Iragadaayeek baashaagwiidheek, shaawti anii kwiriyaataayi iikti kitdiya." idi.

9 Siimoon Bitrus, "Wꞌankwanaay, aflaay aniib iragada eebhat baashaagwiidha, laakiin aniib yꞌayeewwa ugirmaawwa han shaagwidha!" idi.

10 Yasuuꞌa "Uutak ishagwaadh iragadaayeeh eebhat shangwiidh, kassuuh ugarooyuuh nhas ikati. Aree baraakna nhasaana, gaal nuun." idi. 11 Yasuuꞌa barooh tiltiit nuuni indiib ootak iktiinayt een ibhali hadiidiya, "Kassaakna nhasaana gaal nuun." iid.

12 Yasuuꞌa bareeh iragada ishaagwidhaayt harꞌii, ugamiisooh ikwaayt oodraari kehii umhiinooh beeti yꞌagar. Bareeh raatiya, "Oontꞌa dehookna adꞌiyeet toona afhamtaana? 13 Seednaab waliikteenheeb, Wꞌankwana waliikteenheeb, bak aree daayiib teefeena. Ani aree bak akati. 14 Ani Wꞌankwanaayuukna, Seednaayuukna, hallaay iragadaayeekna ashaagwidh. Baraak aree gaal uraawi ragada tishagwidhneet toonaati. 15 Toon toona ani sakaneet tꞌiiteena baraak han sakteeneet toona hookna aharriiw. 16 Oosdik andi hookna: ikishiya wꞌankwanaayiisoohka winkaab kiikeen. Udiigwatama han barooh diigwataanaayka winkaab kiiki. 17 Oontꞌa baraak teen teena tikteenna, bateeh haay shagaamteeneek baarakami tiyadna.

18 Ani kasseekna kaadi, ani waasaab akatiyeeb baliib akteen. Laakiin uuktaab ibakii sidik ikati, ‘Uutak timꞌariitu geebu tamiyaab ashoosamiyaheeb.’ indi.

19 Tuun tuuna baaꞌakaay ani oontꞌa sooyani hookna, aflaay tikatiyihoob, Ani Barooh akatiyeet toona aamani tiyadna. 20 Oosdik andi hookna: ani diigwataniyeeb agbiliiniibka, aneeb han agbiliini. Aneeb agbiliiniibka aree, aneeb diigwatiyaab han agbiliini." idi.

21 Yasuuꞌa een ibhali idiit harꞌii, winneet gwirhaayeeb daayaayt gwꞌagwuuyt hadiidiya, "Oosdik andi hookna: bareesookna gaal nuuniheeb indi." idi.

22 Ikwiriyaatay taktakeeb nakamiyaana, aree aab isehiriweeb igamna. 23 Gaal ikwiriyaatayee Yasuuꞌa areeyaab iiktiyi, baruuh Yasuuꞌi daraag iistꞌa. 24 Siimoon Bitrus barooh beeti tuuliyaayt, "Aab haay isehariiweeb barooh raata?" idi.

25 Uun ukwiriyaataayi Yasuuꞌaab beeti ikilasaayt, "Wꞌankwanaay, uun baruuh aabu?" idi.

26 Yasuuꞌa "Ani hadhiib gaal tulamtiib amistiit aniiweeb been barooh ikati." idi. Malya hadhiib yakisiyaayt yꞌamis, aree barooh Yahuudaab Siimoon Wꞌiskaaryuuti oor yhii. 27 Yahuuda willa yhadhi yakisiyanihoob, uubliis barooh shuumiya.

Yasuuꞌa bariiyooh dehaay, "Toona iidꞌa tindiyeet willa dꞌiya!" idi. 28 Oodraari kehii iifiin aaraw een ibhali Yasuuꞌa bariiyooh dehaay iideeb gaal han afhamaab kiikeen. 29 Laakiin imhallaga Yahuudaay geeb iifiinayt, Yasuuꞌa barooh difiit wꞌiidii dehaay yhariwneet toona haay dilibti miyaay sooyaneeb hiisiyaan. Tari oodehay yꞌaniw naat iniiweet toona sooyaneeb hiisiyaan. 30 Yahuuda yhadhi iyhaayt gaal door barraab ifrꞌa. Aree uudoor hawaadamaab iikti.

31 Yahuuda ifirꞌat harꞌii, Yasuuꞌa "Oontꞌa Wꞌaadami Oori matuun lawi indi, aree Ukwaasanaay matuun bariiyooh lawi indi. 32 Ukwaasanaay matuun bariiyooh lawiiniyeek, Ukwaasana aree Wꞌaadami Oori matuun barooh ooknaay lawsi indi. Toon toona aree gaal door saki indi. 33 Yꞌaraan, ani shalikt midda geebookna daayi andi. Baraak aneeb tehariwna, laakiin Iyahuudi sooyaneet toonaatiit, aflaay oontꞌa bareek sooyani: Ani eebiyeeb oomhiin baraak kitbeena.

34 Oontꞌa bareek gayiit wasi aniiw hookna: taktak areeyaana. Ani bareekna areeyaneet toonaatiit, aflaay baraakna han ibakii taktak areeyaana. 35 Baraak taktak areeteeneek, aflaay uudehay kassaah anii kwiriyaatay tikatiineet toona iikan iyadna." idi.

36 Siimoon Bitrus barooh raatiya, "Wꞌankwanaay, naad iibi tindiya?" idi.

Yasuuꞌa "Oontꞌa ani eebiyeeb oomhiin beeti aneeb teetriimeet toona kaꞌadgirta. Laakiin malya iitramheeb tindiya!" idi.

37 Bitrus raatiya, "Wꞌankwanaay, oontꞌa naanhooy kaaram hook? Ani bariiyook jillaay tooyatii dehaay amaaru." idi.

38 Yasuuꞌa "Anii jillaay tooyat sidik dehaay amaarwa? Ani oosdik andi hook: baruuk uujiik baakuukillaayi mhay doora ittiwheeb tindiya." idi.