1 Whasamti Wꞌiidii asagwit yina hooy mhiyaat iiktiini door, Yasuuꞌa Beetaanyaab Lꞌaasiriib indhiwa ibi. Lꞌaasir ootak baruuh tooyatii ishidhhaneebi. 2 Baraah bariiyooh dehaay beentooy diraar isoomirna. Oodraar Maarta shagaamta. Lꞌaasir baliin tumꞌariitiit tarabeesaati kehii Yasuuꞌi geeb iistꞌa oodehayiib gaal iikti. 3 Malya Maryam shakwiintiit karoora winneet alyaat naradii shagaamamaat Yasuuꞌiib iragadaayi kehii tifif tidꞌi. Malya tehamooteesooh tiysis. Tushakwiinti baraam oogaw kassooh itib.

4 Yasuuꞌiib ikwiriyaatayee gaal Yahuuda Wꞌiskaaryuuti iidneeb, malya Yasuuꞌaab nuuni iid, 5 "Tuun tushakwiin mhay shi ashteeti mhallagaayeeb naanhooy dalaabt kitti? Imhallaga aree oodehay yꞌaniw naanhooy attiyeewiyaab kiikeen?" idi. 6 Baruuh een ibhali haay iideeb usabab, oodehay yꞌaniwnaayee dehaay nꞌakwmanaatiib kiiki. Laakiin baruuh gwiharaabuuyt bak iid. Imhallagaayeet nafi itfiyik, laakiin baruuh uukna batiisooh igwihar.

7 Laakiin Yasuuꞌa, "Batooh isha dꞌiya, tushakwiintiib mhiyaat toona aree ani atoobiiseet tooyintii dehaay danbiyeet toonaati. 8 Uudehay yꞌaniw diimaab geebookna daayi iyadna. Laakiin ani diimaab geebookna daayi kaadi." idi.

9 Gwida dehay Yasuuꞌa Beetaanyaay eefiyeet toona imaasiwna. Aflaay baraah beentooy ibeen. Yasuuꞌi sabab oobhaat kiiki, laakiin Yasuuꞌa tooyatii ishidhhaneeb Lꞌaasiri shibuub yhiriwna. 10 Aflaay ifagiiriya isuurkina Lꞌaasir han madar hooy niyaamiyaana, 11 bariiyooh sabbii aree gwida Yahuudi bareeh iribniit, Yasuuꞌaab aamaniyaan.

12 Tooyin tumalya gwida dehay Whasamti Wꞌiidii dehaay yꞌaab iiktiin, Yasuuꞌa Algudus beeti yꞌiini diyee imaasiwna. 13 Baraah akaay biir yakisiyaaniit bariiyooh ashuushi jillaay ifrꞌana.

Baraah "Hoosaana! Hoosaana!

Wꞌankwanaay oosmii yꞌiiniib been baarakamaabu!

Israaꞌiileeb Whadꞌa baarakamaabu!" idiin.

14 Yasuuꞌa halkwiib imriit kehii yꞌam, uuktaab diyaab ikatiyeet toonaatiit,

15 "Yaa Sihiyooniit oot biirakwii!

Shibibii, whadꞌaayuuk

halkwi kehii amaa yꞌiini." indi.

16 Been oodoor ikwiriyaatayaah een ibhali afhamaab kiikeen. Laakiin Yasuuꞌa umatuunii dehaay yakamiyanihoob, uuktaab bariiyooh diyaab iiktiyeet toona shꞌiyaan. Aree bariiyooh jillaay baraah dꞌiyaab ikatiineet toona shꞌiyaan.

17 Lꞌaasir umiimashii waliikiyaayt tooyatii yakisiyanihoob rhiyaan uudehay Yasuuꞌi geeb iifiin, toona tutikeet kastooh hadiidiyaan. 18 Been uudehay igwida aree beet tumꞌuujisa kwaasaabuuyt barooh yꞌashishna. 19 Aflaay Ifariisi taktakee dehaay, "Shibibna, hinin ansirami kindi! Kassaah uudehay barooh eetriimna." idiin.

20 Yoonaani gwadi wꞌiidi door yꞌibidni jillaay Algudus bayaa iifiin, been oodehayi bitik iifiin. 21 Baraah Fiilibus ibeeniit, "Duuruun, Yasuuꞌi shibuub nhariw." idiin. Fiilibus Jaliileeb teefeet Beetsaydaay iikti. 22 Fiilibus giigiyaayt Andaraawoos toon toona sooya. Mhallaah aree giigiyaaniit Yasuuꞌaab sooyaan.

23 Yasuuꞌa igwibi, "Wꞌaadami Oor umatuun hooy iiwin indiyeet tuusꞌa tꞌa yꞌaati. 24 Oosdik andi hookna: gamhi harrooyt habba whaashiib dhibeetiit iyyi bitdiiyeek, harrooyt habba akeetiit tingadi. Laakiin tiyaayyeek, gwidaat habba fanri. 25 Eeknaayi midhhan areeyeen baliin imaar kiidiin. Baliin toon tuduniyaatiib umidhhanoohna eerib umidhhan udaayim imaar iyadna. 26 Aneeb shagaamiiniibka ibakii eetriimheeb. Aflaay aniib ushagaamana han ani daayi andiyeeb oomhiin daayi indi. Baabu aree aneeb shagaamiiniibka areeyi indi.

27 Oontꞌa uginꞌu gwirhaayeeb eefi, naan iyaad andi? Baabu, toon toosꞌa haay baamꞌaaheeb? Laakiin ani oon usabbii yꞌaabi. Shaawti toon igwirhaayeet toosꞌa ibakii haay hasami andi. 28 Baabu, oosmook soowina!" idi.

Malya tibreetee hiss hadiidiya, "Ani matuun haay yꞌan, aree toon masi iiwari andi." idi. 29 Uudehay beentooy iifiin whiss imaasiwna. Gwadi bareesooh, "Thiwtu" iidna, wari aree "Malak bariiyooh geeb hadiidiya!" idiin.

30 Laakiin Yasuuꞌa bareeyooh dehaay, "Uun whiss anii jillaay hadiidaab kiiki, laakiin bareeyookna jillaay hadiidiya. 31 Oontꞌa toon tuduniyaati haakamti door ikati. Oontꞌa toon tuduniyaati haakim fidnaab ituugid indi. 32 Ani tubuutii asti yakamaniyihoob, oodehay kasseeh aneeb beeti iisikw andi." idi. 33 Baruuh een ibhali hooy lhamaa iideet tooyat haay mitiyaayi.

34 Uudehay hadiidiyaana, "Whagguun Umasiih diimaab ikwaar indiyeet toona sooyiini hoon. Aflaay baruuk Wꞌaadami Oor ibakii asti yakami indi kak tindiya? Uun Wꞌaadami Oor aree aabu?" idiin.

35 Yasuuꞌa bareeyooh dehaay, "Uunuur masi shalik door geebookna daayi indi. Aflaay uuthibin dehookna akaab baakaay, unuuri door usalalookna soorarimna. Uthibniib sakiiniib nhooh eebiyeeb kiikan. 36 Oonuur masi tibariinihoob, bariiyooh aamanaana. Shaawti nuuri dehay iikti tiyadna." idi. Een ibhali idiit harꞌii, Yasuuꞌa giigiyaayt bareesooh ugarooyooh ikwibis.

37 Yasuuꞌa teen timꞌuujisa kasteeh suurii ikwaaseek han, baraah barooh aamanaab kiikeen. 38 Aflaay Unabi Isyaas diyaab iiktiyeet tuuna sidik tiikti, "Yaa Wꞌankwanaay, tudiigwattoon aaw aamaniya? Wꞌankwana yꞌakrireeh aab rhisiya?" idi.

39 Baraah Yasuuꞌiib wꞌaamanti adgiraab kiikeena, Isyaas han bak diyaabuuyt:

40 "Ukwaasana igwꞌadeehna hamasheesiya,

aree iginꞌaayeehna assiya,

shaawti igwꞌadaahna karhiyaana,

tari iginꞌaayaahna kaꞌafhamiyaana,

aflaay baraah anii dehaay agartiit mheelami kiidiin." diyaabi.

41 Isyaas een ibhali haay iideeb usabab, Yasuuꞌiib umatuun rhiyaayt bariiyooh hadiidiya.

42 Beenhoob han Iyahuudi suurkinaayee gwida barooh aamaniyaan. Laakiin Ifariisi sabbii wꞌiimaanoohna lawsaab kiikeen. Baraah Ifariisi Iyahuudi diini gawii ifarꞌaneet toona irkwiin. 43 Baraah Ukwaasanaay hamaadiika dehayi hamaad areeyaan.

44 Malya Yasuuꞌa win hissii, "Aneeb aamaniiniib, aneeb oobhaat aamanaab kiiki, laakiin aneeb diigwatiyaab han aamaniini. 45 Aneeb rhiiniib, aneeb diigwatiyaab han rhiini. 46 Tuduniya oonuur tꞌiiteeb akay yꞌan. Aflaay aneeb aamaniiniib thibniib daayi kiidi.

47 Aniit tudiigwat maasiwtiit baaraamka, ani barooh haakami kaadi. Ani tuduniya haakamti jillaay yꞌaab kaaki, laakiin ashidhhiini jillaay yꞌaabi. 48 Baliin aneeb eerib, tudiigwattu agbilaab baakay aree bareeh gaal haakami indi. Ani hadiidaneet tikalma tꞌaakharaatiib bareeh gaadiyoohna iikti iyadna. 49 Uun baruuh sidiku, ani uknaayiitu hadꞌaayeetii hadiidaab kaaki. Laakiin Ubaaba aneeb diigwatiyaab sooyaneetu toona ibakii andiyeet toonaatu, hadiidaniyeet toonaati. 50 Bariiyaah ibhali aree umidhhan udaayim haay yꞌeeneet toona akteen. Ani andiyeet toona, Ubaaba sooyaa diyaayu ikatiyeet toonaati." idi.