1 Tooyin tumhaya Jaliili haashiib Gaanaay doob iiktiin. Yasuuꞌiit tuundi beentooy tiifi. 2 Yasuuꞌaawwa ikwiriyaatayaahwa han been idoobaani mhiin waliikamaa iifiin. 3 Wha faayamiyanihoob, Yasuuꞌiit tuundi bariiyooh dehaay, "Baraah shaawti haab kiibariin." tidi.

4 Yasuuꞌa "Yaa takatay, naan tindii, aniib uudoor masi yꞌaab kiiki." idi.

5 Yasuuꞌiit tuundi ishagaamanaayee dehaay, "Baruuh indiyeetookna toonaaka dꞌiina." tidi.

6 Iyahuudi diini tahaaraatiit aada iibriina, beet toonaatii dehaay aree asagwir aweeyi diwan yam toobamaab iifiin. Diwaanka sheeb litraab yꞌibik.

7 Yasuuꞌa ishagaamanaayee dehaay, "Eedwan yam toobaana." idi. Aflaay baraah eedwan iyafa ookiik yam itibna.

8 Malya baruuh bareeh sooya, "Oontꞌa shalik yam hooy ahaanaat ootak tꞌaduuma abkaab hiina." idi.

Baraah han beet toona idꞌiin. 9 Oontꞌa aayam haab ikeena, aree uutak tꞌaduuma abkaab eeyam dꞌamisiya. Baruuh wha keeya mhiinii eeyaneeb kiikan, laakiin ishagaamana beet toona iktiinna. Malya udooba waliikiyaayt, 10 "Uudehay gaalka wha udaayiib hankaab iyawna, aree malya yꞌamna gwꞌeetiit eelꞌanihoob wha iyameemaab iyawna. Laakiin baruuk oontꞌa hadiit wha udaayiib tidibiya." idi.

11 Yasuuꞌa teen timꞌuujisa Jaliileeb Gaanaay ikwaas. Beentooy umatuunooh rhisiya, aree ikwiriyaatayaah barooh haay aamaniyaan.

12 Toon toonaati harꞌii, Yasuuꞌaawwa tuundeehwa, isanaayaahwa, ikwiriyaatayaahwa Kafarnaahuum ibeen. Baraah beentooy shalikt yina yhagitna.

13 Iyahuudi Whasamti Wꞌiid idwilihoob, Yasuuꞌa Algudus ookiik giigiya. 14 Beentooy Ukwaasanaay gawiib dehay shꞌaabwa, anootwa, kilaywa iidlib rhiya. Masi warib tarabeesaati kehii sꞌee mhallagaab iibdil rhiya. 15 Aflaay baruuh kwirbaaj lilee idꞌiit, kasseeh eeshꞌaawwa tꞌanoowwa Ukwaasanaay gawii mhaliya. Imhallaga iibdil eendee titarabeesa hooy bꞌoosiya idꞌi, aree eegrish hooy ibrir idꞌi. 16 Eekilay iidlib oodehayii dehaay, "Tooysii haay firꞌana! Baabiyu oogaw bꞌiishraay mhiin baakwaasna!" idi.

17 Ikwiriyaatayaah uuktaab iideeb ibhali shꞌiyaan. Uuktaab "Ugawiyuuk reer tunꞌeetiit iiliwheeb indi." indi.

18 Malya Iyahuudi suurkina barooh raatiyaana, "Baruuk toon toona kastooh haay tikwasiyeet tehadꞌaayeetook dehoon akkadtiniyee dehaay, mꞌuujisaateet alaama naan rhistiniya hoon?" idiin.

19 Yasuuꞌa bareeyooh dehaay igwibi, "Oon Ukwaasanaay oogaw katꞌaana, aree ani mhayt yinaateeb masi iidꞌir andi." idi.

20 Baraah "Oon oogawi dꞌuur fadhig tamuunwa asagwir hawla iyhi, aree baruuk barooh mhayt yinaateeb masi iidꞌir tindiya han?" idiiniit raatiyaan. 21 Laakiin Yasuuꞌa haay hadiidiyeeb Ukwaasanaay oogaw barooh ooknaay ugaru iikti. 22 Aflaay baruuh tuyatii yakiyani harꞌii, ikwiriyaatayaah een baruuh diyaab iiktiyeeb ibhali shꞌiyaan. Malya baraah ooktaab aamaniyaana, aree Yasuuꞌa iideeb ibhali han aamaniyaan.

23 Whasamti Wꞌiidiib Yasuuꞌa Alguduseeb iifiyi door, baruuh iikwisiyeet timꞌuujisa rhiyaan uudehay gwida barooh aamaniyaan. 24 Laakiin Yasuuꞌa bareeh kasseeh iktiin akay, bareeh ugarooyooh bareeyooh dehaay aamanaab kiiki. 25 Bareeh iginꞌaayeeb tiifiit toona iktiin akay, baruuh dehayiit badeha shanha kiiki.