1 Been oodoori harꞌii, Yasuuꞌa Iyahuudi wꞌiidii dehaay Algudus ibi. 2 Beentooy Algudus tꞌanooti dheefa dawil mhiin yami hoodh iifi. Yꞌaraami bhaliyee Beet Hisda iidna. Baruuh ay wawin gawaayee kwalaalu. 3 Been oomhiin gwida lha dehay bꞌiina hamashayaawwa, garbamaawwa, amꞌadhdhaawwa iifiin. 4 Doorka - doorka Wꞌankwanaay malak yꞌiit eeyam ifiidh. Aayam itfidhni harꞌii shuumi takka iibriyeet lhanaaytiika iinꞌir. 5 Been oomhiin tak gaal mhay tamuunwa asimhay hawla lhaab iifi. 6 Yasuuꞌa ootak been oomhiin bꞌee rhiyanihoob, oon whaaliib gwida doora dꞌiyaab iiktiyeet toona ikan. Malya "Mheelamtiib harriiwa han?" idi.

7 Uutak uulha igwibi, "Seedna, aayam itfadhiinihoob aneeb istoobiib gaal han kaabari. Ani tooy yꞌee, anii suurii weer gaal tikwiya." idi.

8 Yasuuꞌa bariiyooh dehaay, "Asti yakaa! Tumadhamtook yaksaat hiireera." idi. 9 Uutak igidiyeesooh inꞌir aree tumadhamtooh yakisiyaayt hiireeriya.

Beet tuuna hooy tiiktiyeeb uumbꞌi aree sabtu. 10 Aflaay Yahuudi suurkina ootak umheelamiyaanaay dehaay, "Amsi sabtu, tumadhamtiyook yaksiti ugaanuun yꞌanfi hook." idiin.

11 Uutak "Aneeb mheeliyaab uutak tumadhamti yaksiit andiifeet toona sooyiheeb." idi.

12 Baraah ootak raatiyaana, "Een sooyanuuk uutak aabu?" idiin.

13 Yasuuꞌa beentooy oodehay igwidaanaay tehooyteeb kwidhiya akay, uutak umheelamiya been ootak aab iiktiyeeb igam.

14 Malya Yasuuꞌa ootak Ukwaasanaay gawiib imriit bariiyooh dehaay, "Shibiba, baruuk masi tinꞌira. Toomaag singada tari weena amaagkaat dehook iikti tindi." idi. 15 Aflaay uutak Iyahuudi ibaayt, ootak barooh mheeliyaab Yasuuꞌaab ikatiyeet toona sooya.

16 Aflaay Yasuuꞌa toosab mheeliya akay, Iyahuudi barooh amaag waraatiib yhariwna. 17 Yasuuꞌa bareeyooh dehaay, "Aniib Ubaaba oon oombꞌi diimaab shagaamiini, ani han shagaamani." idi. 18 Een ibhaliyi sabbii Iyahuudi sidik Yasuuꞌi madar yhariwna. Baruuh toosabti gaanuun ikitꞌeet toona kitti, laakiin Ukwaasana han barooh ooknaay ubaabaayt waliikiya. Ugarooyooh Ukwaasanaay geeb nadiir ikwasi.

19 Yasuuꞌa bareeyooh dehaay bak igwibi, "Oosdik andi hookna: Wꞌoor uukna naati dꞌuuy kaꞌadgiriya, Baabooh dꞌiyee rhiiniyeet toona toobhaat danꞌi. Ubaaba sakiiniyeet toona aree Wꞌoor han sakiini. 20 Ubaaba Wꞌoorooh areeyiini, baruuh daayiiniyeet toona aree kastooh rhisiini. Bareekna ajjabsiiniyi jillaay teen tinaateeka han wawinkaat barooh rhisi indi. 21 Ubaaba yꞌayaab yaksiit ishidhhiineet toonaatiit, Wꞌoor han ishidhhin indiyeeb bak midhhan iniiw. 22 Ubaaba uukna gaal han kahaakamiya. Laakiin whaakamti hag kassooh Wꞌoorooh hiiyyaabi. 23 Aflaay uudehay kassaah Ubaaba hamooysiiniib Wꞌoor han bak hamooysi iyadna. Wꞌoor baahamooysii, Ubaaba barooh ifdig han kahamooyisiya.

24 Oosdik andi hookna: baliin aniib ibhali maasiwtiit beeb aneeb ifdig aamaneenka, umidhhan udaayim imaar iyadna. Baraah haakamami kiidiina, laakiin suur akay tooyatii umidhhan ookiik hasamiyaan. 25 Oosdik andi hookna: damaan yꞌiini aree oontꞌa suur akay yꞌaabu, yꞌaya Ukwaasanaay Oori hiss iimsaw iyadna. Baliin yꞌeemsiiw aree midhhan imaar iyadna. 26 Ubaaba uukna midhhani gwꞌad ikatiyeet toonaatiit, Wꞌoorooh han bak midhhani gwꞌad ikwaas.

27 Baruuh aree Wꞌaadami Oor ikatiyi sabbii, whaakamtiit hadꞌaayi barooh yhii. 28 Toon toonaatiib baaꞌajjabsaana, kassaah yꞌayaab bariiyooh whiss hooy iimsaw iyadneeb uudoor yꞌaabi. 29 Baraah imiimashaayee itfirꞌa iyadna. Baliin daayiina shagaamaab yakiit midhhan imaar iyadna, baliin toomaag shagaamaab aree yakiit ituurib iyadna. 30 Ani uknaayu naat han kaadꞌi. Ani tꞌeemsiiwi toobhaat haakamani, aree aniib whukwim adil ikati. Aflaay ani ugarooyu afirhistiib kaadꞌi, laakiin been aneeb diigwatiyaab harriiweet toona toobhaat sakani." idi.

31 Yasuuꞌa "Ani uknaayu kehii abandeheek, aniit tibadeha sidkiina kiiꞌakeen. 32 Laakiin anii dehaay badehiib ikati weer eefi. Baruuh aniib ikwasiyeet tibadeha aree sidik ikatiineet toona akteen.

33 Baraak Yuuhannaab beeti diigwatkinaab tifdigna, baruuh aree oosdik bidehaabu.

34 Ani ibakii aadamiit badeha harriiweet toona kitti. Laakiin baraakna midhhan timeerni jillaay toon andi. 35 Yuuhanna tulamba balooliit buubtiniit tꞌiiteebi. Aree baraakna middaat been oonuur haay afirhitiib tehariwna.

36 Laakiin Yuuhannaayt tibadehaateeka han wawinkaat badeha abari. Ani sakaniyeet toona, been ushaga Baabu faaysiti jillaay hiiyyaayu ikatiyeebu, aree baruuh Ubaaba diigwataayu ikatiyeet toona rhisiini. 37 Ubaaba aneeb diigwatiyaab han anii dehaay badehiib ikati. Baraak bariiyooh whiss maasiwaab han kitteena tari ifiireeh han rhaab kitteen. 38 Bariitooh tudiigwat han iginꞌaayeeb kitdibiina, aneeb diigwatiyaab han baraak haay kaꞌaamantaana. 39 Baraak eektab agriiteena, iktabeeb umidhhan udaayim timeerneeb hiisteena. Aan aaktab aree kassaah aniib hadiideen. 40 Laakiin baraak anii dehaay yꞌiit umidhhan timeerneet toona kitehariwna.

41 Ani dehayi hamaad kaꞌagbilan. 42 Laakiin ani baraak naa dehay tikatiineeb daayiib akteen hookna. Ukwaasanaay reer iginꞌaayeekna bitbariineet toona akteen. 43 Ani Baabiyu oosmii yꞌan, aree baraak aneeb agbilaab kitteena. Laakiin weer gaal ooknaay simii yꞌiiniyihoob, barooh agbili tiyadna. 44 Baraak taktak tehamidneet toona tehariwna. Laakiin been oodꞌooh Ukwaasana ikatiinaay hamaad rayiimteeneet toona kitehariwna. Aflaay kak aamanteenheeb?

45 Ani Baabiyu suurii amgariimeeyookna baahiisaana. Muusaab baraakna sꞌayaamteeni gariimiyookna iikti indi. 46 Baraak Muusaab sidik aamanaab tiiktiineek, baruuh aniib kitbaabuuyt, aneeb han aamantiina. 47 Baraak baruuh kitbaab iiktiyeet toona aamanaab kitteena, ani andiyeet toona kak aamanteena?" idi Yasuuꞌa.