1 Oonaay harꞌii, Yasuuꞌa ikwiriyaatayeeh Tiibaaryaasi bhariib masi weer door dehaay lawiya. Tuun bak tiikti. 2 Siimoon Bitruswa, Toomaas Utiita atoosmaabwa, Naatnaaꞌeel Jaliileeb teefeet Gaanaay iiktiibwa, Sabadi arwa, wari Yasuuꞌi kwiriyaatay maloobwa kassaah hiddaab iifiin. 3 Siimoon Bitrus irawee dehaay, "Ani diftiit aashoob ibik andi." idi. Baraah "Geebook niibi niyad." idiin. Aflaay baraah bariiyooh geeb tufalluuka yꞌamniit giigiyaan. Laakiin been whawaad kassooh aashoob naat han aabkaab kiikeen.

4 Fajir tuuyin talawtiyihoob, Yasuuꞌa iyami dariib ingad. Laakiin ikwiriyaatay baruuh Yasuuꞌaab iiktiyeet toona kanaab kiikeen.

5 Malya Yasuuꞌa bareeh raatiya, "Yaa yhankwila, naat aabkaab kitteena han?" idi.

Baraah "Naat han aabkaab kinki." idiin.

6 Baruuh bareeyooh dehaay, "Tushabakaatookna tufalluukaati maygwadii dehaay gidnaa, naat ibik tiyadna." idi. Aflaay baraah tushabaka igidnihoob, gwida aashoob titabayt oosaakw adgiraab kiikeen.

7 Ukwiriyaataayi Yasuuꞌa areeyaab iiktiyeeb Bitrusii dehaay, "Uun baruuh Wꞌankwana ikati!" idi. Siimoon Bitrus Wꞌankwana oomiyaad imaasiwihoob, whalak hoosooh firꞌaab iiktiyeeb ikwaayt iyameeb dhibiya. 8 Ikwiriyaatay aaraw tufalluukaatiib iyami ginnaal beeti eeyaana, tushabaka aashoob tabaa sookwiin. Baraah uginnaalii sagiib kiikeenayt, sheeb mitraab eetiit masaafa whaashii iifiin. 9 Baraah ubhari ginnaal tikwiyaanihoob, balooliint dhhaliiti kehii aashoobwa hadhiibwa daasama rhiyaan.

10 Malya Yasuuꞌa bareeyooh dehaay, "Oontꞌa aabkaab tikatiineeb aashoob galib haay mꞌaana." idi.

11 Siimoon Bitrus tufalluuka reewiyaayt, tushabaka barraab irhif. Batuuh wawin aashu ataabtu, sheebwa ay tamuunwa mhay aashoob iiktiin. Laakiin yꞌaashu gwidaab iiktiineek han tushabaka masi shatatamaat kitti. 12 Yasuuꞌa bareeyooh dehaay, "Mꞌaanaat tamaana!" idi. Laakiin baruuh Wꞌankwana iiktiyeet toona ikannayt, baruuh aab iiktiyeet toona bareesooh gaal han barooh raataab kiiki. 13 Yasuuꞌa eeyaayt yhadhi yakisiyaayt bareeh yhii. Yꞌaashu han bak iweer. 14 Yasuuꞌa tooyat hooy yakiyaneekka, oontꞌa mhaya door ikwiriyaatayeeh dehaay lawiya.

15 Baraah tamiyaani harꞌii, Yasuuꞌa Siimoon Bitrusii dehaay, "Siimoon Yuuhannaayi oor, een bareeh iraweeka aneeb daayiib areetniyaheeba?" idi.

Baruuh "Awooh han Wꞌankwanaayu, ani areeyaniyeetook toona baruuk tikteena." idi.

Yasuuꞌa "Aniib yhu daayiib tamsaa." idi.

16 Yasuuꞌa malya door bariiyooh dehaay, "Siimoon Yuuhannaayi oor, sidik aneeb areetniyaheeba?" idi.

Baruuh "Awooh han Wꞌankwanaayu, ani areeyaniyeetook toona baruuk tikteena." idi.

Yasuuꞌa "Aniib yꞌargina daayiib shaakwa." idi.

17 Yasuuꞌa mhaya door bariiyooh dehaay, "Siimoon Yuuhannaayi oor, aneeb areetniyaheeba?" idi.

Yasuuꞌa mhaya door bariiyooh dehaay, "Areetniyaheeba?" idiit raatiyani sabbii, Bitrus yhasi. Baruuh "Wꞌankwanaay, baruuk naatka tikteena, ani areeyaniyeetook toona tikteena!" idi.

Yasuuꞌa bariiyooh dehaay, "Aniib yꞌargina tamsaa." idi. 18 Yasuuꞌa "Oosdik andi hook: Adhamiib tiiktiyihoob, martiit tehiriwi mhiinka tiibiya. Laakiin eegrimamtiniyihoob, yꞌayeek iibrir tindiya, aree weer gaal laabibtiit hook bitehariiwi mhiin istuub hook indi." idi. 19 Yasuuꞌa een ibhali haay iideet tuuna: Bitrus haay yaayi iideet tehayꞌaawwa, Ukwaasana matuun iniiweet toonaawwa tuuliya. Malya Yasuuꞌa bariiyooh dehaay, "Ramaheeb!" idi.

20 Bitrus nakamiyanihoob, ukwiriyaataayi Yasuuꞌa areeyaab iiktiyeeb bareeyooh harꞌii sakee rhiya. Ukwiriyaataayi oodraari door Yasuuꞌaab beeti ikilasaayt, "Wꞌankwanaay aaw iitil hook indi?" idiib iikti. 21 Bitrus barooh rhiyanihoob, Yasuuꞌaab raatiya, "Wꞌankwanaay, uun uutak aree kaku?" idi.

22 Yasuuꞌa igwibi, "Ani atꞌagiireeb ookiik barooh ishidhhin andiyeek, naan dehook iikti indi? Baruuk ibakii ramaheeb!" idi. 23 Tuun tuuna Yasuuꞌiib ikwiriyaatayi bitik hadiidamta. Uun ukwiriyaataayi iiyyi kiidi ittiyoodaay. Laakiin Yasuuꞌa baruuh iiyyi kiidi diyaab kiiki. Yasuuꞌa "Ani atꞌagiireeb ookiik barooh ishidhhin andiyeek, naan dehook iikti indi?" idi.

24 Uun ukwiriyaataayi teen teena hadiidiyaabi. Baruuh teen bateeh han iktib. Baruuh diyaab ikatiyeet taana sidik ikatiineet toona nikteen.

25 Yasuuꞌa gwidaat mꞌuujisa warit han ikwaas. Kastaah timꞌuujisa gaat gaanaatii itkatiibneek, kastuuh tuduniya kitab hooy ikatibneeb dehaay kiimriin.