1 Tehadti bꞌi karuumaab, masi thibnama door, Maryam Majdaleena umiimash tibi. Wꞌawi umiimashi kehii daasamaab aree yakamaa rhita. 2 Batuuh dhaabee Siimoon Bitruswa weer kwiriyaataayi Yasuuꞌa areeyaab iiktiyeebwa tibaayt soota. Batuuh "Wꞌankwana umiimashii yakisiyaana, aree naad daasiyaaneeb kinkan!" tidi.

3 Malya Bitruswa ukwiriyaataayi uuraawwa umiimash ibeen. 4 Baraah mhallaahna dhaabiina, laakiin ukwiriyaataayi uuraaw Bitrusiika dhaabanakaab iikti aree bariiyooh dabaay umiimash iiktim. 5 Baruuh nꞌati hooy kuuramiyaayt ishbibihoob, unaaylooni halak beentooy rhiya. Laakiin umiimash tehooy shuumaab kiiki. 6 Bariiyooh harꞌii Siimoon Bitrus eeyaayt, umiimash shuumiya. Unaaylooni halak beentooy dhibaa rhiya. 7 Umandiil Yasuuꞌiib ugirmaay kehii iifiib han dhibaa rhiya. Laakiin unaaylooni halakii oodꞌooh tafaal akay rhiya. 8 Malya ukwiriyaataayi uuraaw umiimash hankaab iktim masi umiimash tehooy shuumiya. Baruuh rhiyaayt aamaniya. 9 Baraah Yasuuꞌa ibakii tooyat hooy yakiiniyeet toona uktaabii masi afhamaab kiikeen.

10 Malya ikwiriyaatay igawaayeehna yꞌagarna.

11 Maryam waawee umiimashii barraab tingad. Batuuh masi waawee, kuuramtaayt umiimash tishbib. 12 Batuuh beentooy malu malak eera halaka akway rhita. Imalak Yasuuꞌa hooy iifiyeeb oomhiin gaal ugirmaay geeb, ooraaw aree iragadaayi geeb sꞌee rhita.

13 Imalak batooh raatiyaana, "Yaa takatay, naanhooy waawtinii?" idiin.

Batuuh "Baraah Wꞌankwanaayu yakisiyaana, aree naad daasiyaaneeb kanaat kaaki." tidi. 14 Malya batuuh nakamtanihoob, Yasuuꞌaab beentooy gadee rhita. Laakiin baruuh Yasuuꞌaab iiktiyeet toona kanaat kitti.

15 Yasuuꞌa batooh raatiya, "Yaa takatay, naanhooy waawtinii? Aab harriiwii?" idi.

Batuuh barooh dirꞌaat gwꞌaadiigaab hiistaayt, "Duuruun, barooh baruuk yaksaab tikatiyeek, naad daastaneeb sooyaaheeb, aree ani diftiit barooh imaar andi." tidi.

16 Yasuuꞌa batiiyooh dehaay, "Maryam!" idi.

Batuuh barooh beeti nakamtaayt Yꞌaraami bhaliiyee, "Rabbooni!" tidi. Yꞌaraami bhaliyeeb "Rabbooni!" seedna miyaadi.

17 Yasuuꞌa batiiyooh dehaay, "Hoosu biiꞌamꞌabaakii! Ani masi Ubaaba beeti agaar kaaki. Laakiin batuuk aniib isana bayiit ani Baaboowwa bareeyooh Ubaabaawwa, Ukwaasanaayoowwa Ukwaasanaayoohnaawwa ikatiib beeti atꞌagiir." idi.

18 Aflaay Maryam Majdaleena giigtaayt ikwiriyaatay usakana soota: "Ani Wꞌankwana rhan!" tidi. Teen teena batooh sooyaneet aree bareeh soota.

19 Beet tehadtiit himni, ikwiriyaatay assama gawaayeeb hiddaab idbalna. Baraah Iyahuudi iriikwna. Malya Yasuuꞌa eeyaayt bareeyooh bitik ingadaayt, "Mꞌasig geebookna badaayi!" idi. 20 Yasuuꞌa een ibhali idiit harꞌii, yꞌayeehwa itarabeehwa bareeh rhisiya. Ikwiriyaatay Wꞌankwanaay irhitiib winneet afirhiyaan.

21 Yasuuꞌa masi bareeyooh dehaay, "Mꞌasig geebookna badaayi. Ubaaba aneeb diigwatiyaneet toonaatiit, ani han bareekna diigwatani." idi. 22 Malya baruuh bareeyooh kehii hamshuukiyaayt, "Eeshuuk Imugaddasa ahaana! 23 Baraak udehayiit maagnaay afooteeneek, afoomeen. Baraak bitꞌafooyayneek, kaꞌafoomiyaan." idi.

24 Ikwiriyaatay itamna malooyeeb gaal Toomaas, "Utiita" iidna. Baruuh Yasuuꞌa eeyanihoob ikwiriyaatayi geeb kiihaay. 25 Aflaay ikwiriyaatay aaraw barooh sooyaana, "Wꞌankwana rhina!" idiin.

Laakiin baruuh bareeyooh dehaay, "Ani imismaraayi mꞌat rhi baadiyeek, baliin imismaraayi mꞌati kehii giibalaaytu baadaasayeek, wꞌayu bariiyooh wꞌayi kehii baadaasayeek, aamani kaadi." idi.

26 Asaramaati harꞌii masi ikwiriyaatay igawaayi tehooyteeb immarraayna, Toomaas han bareeyooh geeb iifi. Idheefa hakwar iiktiineek han, Yasuuꞌa eeyaayt bareeyooh bitik ingadaayt, "Mꞌasig geebookna badaayi." idi. 27 Malya baruuh Toomaasii dehaay, "Giibalaaytook tooy daasa, aniib yꞌayi aree shibiba, malya wꞌayook fidhidha aree aniib itarabi kehii daasa. Shaawti baaꞌeetehaka, aamana!" idi.

28 Toomaas bariiyooh dehaay, "Wꞌankwanaayuuwwa, Ukwaasanaayuuwwa!" idi.

29 Yasuuꞌa barooh sooya, "Aneeb rhitani jillaay aamanta han? Baliin aneeb rhaab baakaay aamaniyaan kak afirhaaba!" idi.

30 Ikwiriyaatayaah haayee Yasuuꞌa gwidaat mꞌuujisa ikwaas. Taan timꞌuujisa oon ooktaabiib katabt kiikeen. 31 Laakiin baraak aamanteeni jillaay taan bataah tooy katabta. Yasuuꞌa Umasiih ikatiyeet toonaawwa, Ukwaasanaay Oor ikatiyeet toonaawwa aamanteenihoob, bariiyooh oosmii umidhhan timeerna.