1 Malya Biilaatoos Yasuuꞌaab iyhaayt kwirbaajii ithabꞌa.

2 Ikajar dantamaat naweetee taaj idꞌiiniit ugirmaay kehii daasiyaan. Malya adaarhamaash halak barooh istookwna. 3 Malya bariiyooh dehaay eeyaaniit, "Dabaaywa, yaa Iyahuudi hadꞌa!" idiin. Masi barooh idwilniit eefiir ithꞌana.

4 Biilaatoos oodehay masi ibaayt, "Shibibna, oon ootak haay atehimaniyi gwabab hooy miraab baakaayeet toona tikteenni jillaay, barooh tooy marookna haay yꞌi andi." idi. 5 Aflaay Yasuuꞌa tinaweeti taajwa adaarhamaash halakwa kehii haayee ifirꞌa eeya. Biilaatoos oodehayii dehaay, "Shibibna! Uutak uun ikati." idi.

6 Ifagiiriya isuurkinaawwa oodiini gawi gwꞌaadiigaawwa Yasuuꞌaab rhiyaanihoob, tageegi hissii waliikiyaaniit, "Sallabaa! Sallabaa!" idiin.

Biilaatoos bareeyooh dehaay, "Baraak ahaanaat malya sallabaana. Ani barooh gwabab hooy karhan." idi.

7 Iyahuudi masi bhaliiyaana, "Baruuh Ukwaasanaay Oor massalamaabuuyt, hineeb whaggiib baruuh ibakii itoodiir." idiin.

8 Biilaatoos een ibhali imaasiwihoob, masi winneet mirkwaay hooy daaya. 9 Baruuh oogaw yꞌagaraayt Yasuuꞌaab raatiya, "Naa mhiinii yꞌaabwa?" idi. Yasuuꞌa laakiin naat diyaab kiiki. 10 Biilaatoos bariiyooh dehaay, "Bhaliisamiheeb kitdiya han? Ani fiduugiitook hadꞌaayi abari, masi sallabtiyook han tehadꞌaayi abariyeet toona kana." idi.

11 Yasuuꞌa bariiyooh dehaay, "Ukwaasana hiiyyaayookuuyt, baruuk anii kehii oobhaat hadꞌaayeet tibariya. Aflaay uutak aneeb barook nuuniyaab akrakaat maagnaayt ibari." idi.

12 Biilaatoos een imaasiwihoob, Yasuuꞌi fiduug ibsir. Laakiin Iyahuudi masi waliikiyaana, "Oon barooh fandiigeek, shaawti Ugaysari araaw iikti kitdiya! Hadꞌaab massalamiiniibka, Ugaysar ashoosamaabu!" idiin.

13 Biilaatoos een ibhali imaasiwihoob, Yasuuꞌaab haay ifirꞌaayt ugaadi kwirsiib nꞌati isꞌa. Been oomhiin aree, "Yꞌaweeyi kirra" iidna, Yꞌaraami bhaliiyee aree "Gabbaata" iidna. 14 Beenhoob uudehir dawil iikti, Whasamti Wꞌiidi hankaay iikti.

Biilaatoos Iyahuudee dehaay, "Whadꞌaayuukna uun ikati!" idi.

15 Baraah waliikiyaana, "Barooh diraa! Barooh diraa! Barooh sallabaa!" idiin.

Biilaatoos "Whadꞌaayookna sallabtiib hoosu tehariwna han?" idi.

Ifagiiriya isuurkina, "Whadꞌa oongaal hinin nibariyeeb Ugaysaru." idiin.

16 Malya Biilaatoos Yasuuꞌaab sallabiini jillaay bareeh nuuniya.

Aflaay Yasuuꞌaab baraah kinaamiyaan. 17 Baruuh saliibooh yaksaa ifirꞌa, "Kalhoob" iidni mhiin iktim. Yꞌaraami bhaliiyee "Goolgoota" iidna. 18 Barooh beentooy sallabiyaan. Masi malu da dariibka aree tak gaal sallabiyaana, aree Yasuuꞌa eebtik iifi.

19 Biilaatoos bhaliib usaliibi kehii iktib, "Yasuuꞌa Unaasiraayi Iyahuudi hadꞌa" iid bhali kehii iktib. 20 Yasuuꞌa hooy sallabamiyaneeb uumhiin tumadiinaatii sagiib kiikuuyt, gwida dehay een ibhali agriiyaan. Baliin ikatab Yꞌaraami bhaliyeewwa, Laatiini bhaliyeewwa, Yoonaani bhaliyeewwa kataba. 21 Ifagiiriya isuurkina Biilaatoosii dehaay, "Iyahuudi hadꞌa miyaad baakatiiba, laakiin ‘Uun uutak ani Iyahuudi hadꞌa akati idi’ miyaad kitiba!" idiin.

22 Biilaatoos igwibi, "Ani aktibeet toona, ani kitbaabi." idi.

23 Ikajar Yasuuꞌaab sallabiyaanihoob, yhalakaayeeh iyheeniit fadhig mhiin yꞌadhidhna. Gaalka whalakii fardaat iyheen. Uun whalak mhakwaliisii eedhoom ookiik gaal hayuud hayaadi.

24 Baraah taktakee dehaay, "Whalak binshatiit, shirfiit thꞌiit gaalnaay dehaay dhibiiniib baꞌiikti." idiin.

Tuun tuuna aree uuktaab diyaab iiktiyeet toona sidik tiikwsi.

Uuktaab "Baraah yhalakaayi ibtikeehna yꞌadhidhna,

aree kinaameeni jillaay shirfiit eegidna." diyaabi.

Aflaay ikajar beet toona idꞌiin.

25 Yasuuꞌiib usaliibi dar tuundeewwa, tuduuraawwa, Maryam Kiloobaabiit tutakatwa, Maryam Majdaleenaabwa ingidna. 26 Yasuuꞌa toondeewwa ukwiriyaataayi wꞌareeyaab iiktiyeebwa beentooy gadee rhiya. Aflaay toondeetii dehaay, "Yaa takatay, wꞌooruuk uun ikati." idi. 27 Malya ukwiriyaataayii dehaay, "Batuuh deetookti." idi. Been udoorii fidnaab, uun ukwiriyaataayi batooh haay giigiyaayt ugawooh haay ibi.

28 Yasuuꞌa oontꞌa naatka timmiimtaneet toona ikan. Aflaay uktaabi bhali sidik iiktiina, Yasuuꞌa "Ani yaweebi." idi. 29 Beentooy rhasa ha ataab diwaan iifi. Aflaay asfoonjiib whaay tehooyteeb ishiyadhꞌaniit, been wꞌasfoonji hindiib yhakwirniit Yasuuꞌiib uyafiib yꞌabikna. 30 Yasuuꞌa wha gwꞌiyaayt, "Faayamaabu!" idi. Malya ugirmaayooh kuurisiyaayt eeshuuk sallamiya.

31 Malya Iyahuudi suurkina eenda isallabamiyaani ragadaayi katꞌiti Biilaatoos raatiyaan. Masi tikinaaja usaliibii tikwisitiib hooy yhariwna. Baraah beet toona haay yhiriwneeb usabab, uumbꞌi jimꞌaatu tulhaytooh aree tageegaat sabtuuyt, tikinaaja tusabtiit yint usaliibi kehii yhigitneet toona hariwaab kiikeen. 32 Aflaay ikajar giigiyaaniit ootak whankaaneeb iragada katꞌiyaan. Malya ootak ooraaw Yasuuꞌi geeb sallabamiyaab iragada katꞌiyaan. 33 Laakiin baraah Yasuuꞌii dehaay eeyaanihoob, baruuh suur akay ayaa rhiyaan. Aflaay bariiyeeh iragada katꞌaab kiikeen. 34 Ikajareeb gaal Yasuuꞌiib itarab finaatii ikwit, gaal door aree booywa yamwa hooy ifaf. 35 Uutak toon toona rhiyaab tibadehaateeh iyiw, taan tibadeha aree sidik iiktiin. Baruuh sidik hadiidiiniyeet toona ikteen. Aree baruuh tibadehaateeh iniiw shaawti baraak han aamaneen tikatiin. 36 Tuun tuuna aree ooktaabi bhali sidik tiikwsi. Uuktaab "Miitaattuuh gaat han itkitꞌa kitdi." diyaabi. 37 Weer kitaab aree, "Baraah itilꞌaneeb beeb iishbib iyadna." diyaabi.

38 Toon toonaati harꞌii, Yuusif tumadiina Raamaay iiktiib, Yasuuꞌiit tukinaaja Biilaatoos raatiya. Oontꞌa Yuusif Yasuuꞌi kwiriyaataayiibu, laakiin Iyahuudi iriikwuuyt wꞌiimaanooh iikwibis. Biilaatoos baruuh tukinaaja iniineet toona sooya. Aflaay Yuusif han idifaayt tukinaaja yakisiya. 39 Niigoodiimoos suur Yasuuꞌaab hawaad rheesamaab iiktiib, Yuusif iramaayt mhay tamuun kiiloot shakwiintiit haay eeya. Tishakwiintiib mirwa misikwtwa hooy amshawawiyaata. 40 Aanda mhallaahna Yasuuꞌiit tukinaaja yakisiyaaniit naaylooniib iksisna, aree shakwiint kehii ififna. Iyahuudiit aadaateeb tukinaajaati baas iitmarnihoob shakwiint kehii iififna, naaylooniib iiksisna. 41 Been oomhiin Yasuuꞌa hooy itoodaareeb dirꞌaat tiifi. Beentooy aree gayi miimash gaal han hooy atoobsaab biikaayeeb iifi. 42 Beet tuuyin tusabti hankaay tiikti, been umiimash aree dawiluuyt, baraah Yasuuꞌaab beentooy daasiyaan.