1 Niigoodiimoos iidni tak Fariisi, Iyahuudi suurkinaayeeb gaal iiktiib iifi. 2 Baruuh Yasuuꞌii dehaay amas eeyaayt, "Seedna, baruuk Ukwaasana diigwataayook ikatiyi tak tikatiyeet toona nikteen. Ukwaasana geebook biihaayeek aree, timꞌuujisa baruuk tikwasiyeet ikwasi tak kiihaay." idi.

3 Yasuuꞌa bariiyooh dehaay, "Oosdik andi hook, malya door faraay baakaay Ukwaasanaayt tehadꞌaayi rhiini tak kiihaay." idi.

4 Niigoodiimoos raatiya, "Kak eegrim tak masi itfari? Shaawti na sidik toondeeti yaam shuumiit malya door itfari tak kiihaay." idi.

5 Yasuuꞌa igwibi, "Oosdik andi hook, yameewwwa Ishuukeewwa baafiraay, Ukwaasanaayt tehadꞌaayi gaal han adgiriit kashuumiya. 6 Ubashar bashar fanri, laakiin Aashuuk shuuk ifeerna. 7 Ani ‘Ibakii malya door titfariya’ andiyeeb ibhali shaawti baaꞌajjabsa. 8 Ubaraam toojha teharriiweetka beeti nanfi. Whissooh teemsiiwa, laakiin naaysooh yꞌaabu, tari naad eebi kitkana. Aflaay Ishuukee faraay oodehayi geeb han bak ikati." Yasuuꞌa idi.

9 Niigoodiimoos raatiya, "Tuun kak tikati?" idi.

10 Yasuuꞌa igwibi, "Baruuk Israaꞌiili bitik win koojaabwa, teen teena kaꞌafhamta han? 11 Oosdik andi hook: hinin tinikteeniyi bhaliinay, aree tirhinayi soonay, laakiin masi bareesookna gaal han hineet tibadeha agbilaab kiiki. 12 Ani toobuuti kehii eefeent tinaateeb hadiidan, aree baraakna aamanaab kitteen. Tibreeteeb eefeent tinaateeb hadiidaniyeek, aflaay kak aamaniheeb tiyadna? 13 Teebri tak reewaab kiiki, tibreetee yꞌaab nuun. Baruuh aree Wꞌaadami Oor ikati.

14 Muusa umingaayiib asti yꞌabkeeb ukwakwariit, aflaay Wꞌaadami Oor han ibakii asti yakami indi. 15 Shaawti barooh aamaniiniibka, daayim midhhan imaar indi.

16 Ukwaasana tuduniya winneet areeyiini akay Gaalꞌoorooh yhii. Aflaay barooh aamaniiniibka iiyyi kiidi, laakiin daayim midhhan imaar indi. 17 Ukwaasana Wꞌoorooh tuduniyaati kehii gaadiib iiktiyi jillaay diigwataab kiiki. Laakiin bariiyooh geebii tuduniya ishidhhiini jillaay diigwataabi. 18 Baliin Wꞌoor aamaneen hukwmami kiidiin. Laakiin baliin barooh aamanaab baakay suur akay hukwmamaaba. Usababu aree, baraah Ukwaasanaay Gaalꞌoor aamanaab kiikeen. 19 Whukwim aree bak daayiini: Uunuur tuduniya eeya, uudehay laakiin igwababaahna amagayt, unuuriika oothibin areeyaan. 20 Tumaagnaay shagaameen baliin kassaah oonuur eeribna, tumaagti shagaayuuhna biilawayi jillaay, oonuur beeti kaꞌeeyaan. 21 Laakiin usidkii sakeen baliin, Ukwaasanaayt sinaakrooytiib daayaaneeb ishaga lawseeni jillaay, oonuur beeti yꞌeen." idi.

22 Malya Yasuuꞌaawwa ikwiriyaatayaahwa Yahuudaay whaash ibeen. Beentooy shalik door yhagitna, aree baruuh oodehay imis. 23 Yuuhanna han Saaliim dawil mhiin Eenooneeb gwida yam iifiinayt, beentooy oodehay iimis. Uudehay bariiyooh dehaay yꞌiina, baruuh han oodehay iimis. 24 (Tuun tuuna aree Yuuhanna oosjin shuumaab baakaay tiikti.) 25 Yuuhannaayiib ikwiriyaatayee galibwa Yahuudiib gaalwa tutahaaraateet mishgweedhtiib imgwassaarna. 26 Aflaay baraah Yuuhannaab ibeeniit, "Seedna, Urduni daraag uraawiib geebook iifiib, beeb baruuk daayiib dehaay tibideheeb, oontꞌa baruuh inmiis, aree uudehay kassaah barooh eebiin." idiin.

27 Yuuhanna igwibi, "Ukwaasana hiiyyaab biikaayeena, gaal han naat kiimri. 28 Ani ‘Umasiih kaaki, laakiin ani bariiyooh suurii diigwatamaabu.’ adiyeet toona baraakna iknaayaakna badehiibaana. 29 Udooba ikatiib tudooba ibariibu. Laakiin udoobaay araaw oodar gadiit eemsiiw, udoobaay hiss eemsiiwihoob winneet itmadhiidh. Aniit tifirha han oontꞌa bak timmiimeen. 30 Baruuh ibakii inwiin, ani laakiin ibakii andhiim." idi.

31 Mhakwaliisii tikwiiniib kasseesoohka winkaab ikati. Tubuutii ikatiib toobuut kinaamiini, toobuutiib eefeent tinaatee sakanaayiini. Laakiin tibreetee yꞌiiniib kasseesoohka winkaabi. 32 Baruuh toona turhiyaneetwa tꞌimaasiweetwa sooyiini. Masi gaal han tudiigwattooh kaꞌagbiliya. 33 Laakiin bariitooh tudiigwat agbiliiniibka, Ukwaasana sidkiib ikatiyeet toona rhisiini. 34 Ukwaasana Eeshuuk adad anu iniiwayt, Ukwaasana diigwataab ikatiyi, Ukwaasanaay bhali hadiidiini. 35 Ubaaba Wꞌoorooh areeyiini, aree naatka bariiyeeh yꞌayeeb daasiya. 36 Wꞌoor aamaniiniibka umidhhan udaayim manri. Wꞌoor inriibka midhhan imaar kiidi. Laakiin Ukwaasanaay igadab bariiyooh kehii daayeen.