1 Oonaay harꞌii, Yasuuꞌa Jaliiliib oobhar Tiibaaryaas iidneeb beeti idif. 2 Timꞌuujisa been oodehay eelhaab haay mheeliyaneet rhiyaan akay, barooh gwida dehay iramna. 3 Yasuuꞌa ribaab reewiyaayt ikwiriyaatayeeh geeb nꞌati isꞌa. 4 Been oodoor Iyahuudi Whasamti Wꞌiid dawil iikti.

5 Yasuuꞌa asti ishbibaayt gwida dehay barooh ookiik yꞌee rhiyanihoob, Fiilibus raatiya, "Een oodehay kasseeh haay tamsinayi hadhiib naad nimeer?" idi. 6 Yasuuꞌa een ibhali Fiilibusi jarrabti haay yhiriw nuun, kak weeri iideeb suur akay iktiin.

7 Fiilibus "Gaalka hadhiyi firkaak marriyee dehaay, malu shi diinaar han kamhiyaan." idi.

8 Bariiyeeh ikwiriyaatayee weer Siimoon Bitrusi san Andaraawoos hadiidiya, 9 "Tooy oor gaal ay shaꞌiiri hadhiiwwa malu aashoob dadiswa ibariib eefi. Laakiin een oodehay kasseeh sidik kamhiyaan." idi.

10 Yasuuꞌa ikwiriyaatayee dehaay, "Oodehay nꞌati soosꞌana." idi. Been oomhiin gwida siyaam iifi, aree uudehay kassaah nꞌati isꞌana. Baraah ay alfa da iiktiin. 11 Yasuuꞌa yhadhi yakisiyaayt Ukwaasana yhamid, malya oodehay beentooy iifiinaay dehaay yhadhi yꞌaadhidh. Yꞌaashu han bak iweer, uudehay kassaah aree gabiyaaneeb ookiik tamiyaan.

12 Kassaah gabiyaanihoob, baruuh ikwiriyaatayeeh dehaay, "Toodhikw dibilna, naat han bangiideet toonaati." idi. 13 Aflaay toodhikw kastooh ishaawawiiniit, tamna malu biileeb hooy toobiyaan. Tuun tuudhikw kastuuh aree ishaꞌiiri yꞌay hadhi uudehay tamiyaaniit isimhaneeba.

14 Uudehay toon tumꞌuujisaatiit alaama Yasuuꞌa ikwaaseet rhiyaaniit harꞌii, "Uun baruuh sidik Unabi tuduniyaatii dehaay yꞌiini attiyoodiyaab ikati." idiin. 15 Yasuuꞌa baraah yꞌiit barooh abkiit akruurii hadꞌaab iikwsiineet toona ikanaayt, masi uukna oorba reewiya.

16 Whawaad eeyani door, ikwiriyaatayaah oobhar tikwiyaan. 17 Falluukaat yꞌamniit oobhar oodar ooraaw beeti Kafarnaahuum ookiik idifna. Bareeh hawaad dehaay iki. Yasuuꞌa aree bareeh masi dehaay yꞌaa kiihaay. 18 Winneet akra baraam eeyaayt, eeyam irgis. 19 Ikwiriyaatay ay tari asagwir kiiloomitra isiignihoob, Yasuuꞌaab iyami kehii hiireeree tufalluuka diwlee rhiyaani door irkwiin. 20 Laakiin Yasuuꞌa bareeyooh dehaay, "Baarakwiina, uun aneebu!" idi. 21 Baraah barooh tufalluuka reewistiib yhariwna, aree tufalluuka willa baraah iibiineeb oodar tiktim.

22 Tooyin tumalya, iyami dar uraawiib yhigit uudehay falluukaat gaat beentooy tehiyeet toona rhiyaan. Yasuuꞌa aree ikwiriyaatayi geeb tufalluuka amaab biikaayeet toonaawwa, laakiin baraah oodꞌoohna giigiyaaneet toonaawwa rhiyaan. 23 Malya been Wꞌankwana yhamidaayt harꞌii uudehay yhadhi hooy tamiyaaneeb oomhiini daraag falluukaat gwadit Tiibaaryaasii eeyaan. 24 Uudehay Yasuuꞌa beentooy biihaayeet toona rhiyaan. Ikwiriyaatayeeh han rhaab kiikeen. Malya baliit tifalluuka yꞌamniit bariiyooh harawaay Kafarnaahuum ibeen.

25 Barooh iyami dar uraawiib imriinihoob raatiyaana, "Seedna, nhoob tooy tiktima?" idiin.

26 Yasuuꞌa igwibi, "Oosdik andi hookna: baraakna aneeb haay tehariwneeb usabab mꞌuujisaat rhitaaneet toonaatii kiiki. Laakiin yhadhi gabtaaneeb ookiik tamtaani sabbii aneeb tehariwna. 27 Amaagt mꞌariitii dehaay baashagaamaana. Laakiin tumꞌari umidhhan udaayim tiniiwtookna batiiyooh dehaay shagaamaana. Ukwaasana Ubaaba gabbalamtiit tꞌalaamaatooh Wꞌaadami Oori kehii daasaabuuyt, tuun batuuh aree tumꞌari baruuh iyaaw hookna indiyeet tikati." idi.

28 Malya uudehay barooh raatiyaana, "Ukwaasana harriiweet toona nidꞌee dehaay ibakii naan nidꞌeet toonaatu?" idiin.

29 Yasuuꞌa igwibi, "Ukwaasana harriiweet tuuna bak teefi: baruuh dehookna ifdigeeb oongaal aamanaana." idi.

30 Aflaay baraah barooh raatiyaana, "Shibibtiit aamannayi jillaay, aflaay baruuk naat mꞌuujisa iikwasi tindiya? Naan saki tindiya? 31 Hinin hoobaan umingaayiib mannaab tamiyaan. Uuktaab bak indi: ‘Baruuh bareeh tibreetee tameeni hadhi yhii.’ indi." idiin.

32 Yasuuꞌa bareeyooh dehaay, "Oosdik andi hookna: tibreetee bareekna yhadhi hiiyyaab Muusaab kiiki, laakiin tibreetee usidki hadhi bareekna iniiw Baabu ikati. 33 Ukwaasanaay hadhi ikatiib, beeb tibreetee nꞌati yꞌiit tuduniya midhhan iniiwu." idi.

34 Uudehay "Seedna, een yhadhi diimaab hiiyya hoon." idiin.

35 Yasuuꞌa bareeh sooya, "Ani umidhhani hadhi akati. Baliin aneeb beeti yꞌeen door han itehirigw kiidiina, baliin aneeb aamaneen door han ityiw kiidiin. 36 Laakiin ani sooyaneetookna toonaatiit, baraak rhitaanheeb masi aamanaab kitteena. 37 Baabu iniiweetu tuuna kastuuh yꞌiheeb tindi, aneeb beeti yꞌiiniibka aree door han fidnaab giigsi kaadi. 38 Ani tibreetee yꞌanihoob, ani aharriiweet toonaati saktii dehaay yꞌaab kaaki. Laakiin aneeb diigwatiyaab harriiweet toona atankwiikwi jillaay yꞌaabi. 39 Aneeb diigwatiyaab hoosu harriiweet toona aree: baruuh hiiyyaayu ikatiyeeb kasseeh gaal han baakwidhsaayeet toonaati. Laakiin tꞌaakharaati bꞌi bareeh asti yaksi andi. 40 Baabu harriiweet toona: Wꞌoor shibibtiit barooh aamaniiniibka umidhhan udaayim imaar indi. Tꞌaakharaati bꞌi aree barooh asti yaksi andi." idi.

41 Yasuuꞌa "Yhadhi tibreetee nꞌati eeyaan aneeb akati." diyaabuuyt, Iyahuudi Yasuuꞌii ashkiimiyaan. 42 Baraah "Uun baruuh Yasuuꞌaab Yuusifi oor kiiki han? Ubaabaawwa toondeewwa nikteeniyeek, aflaay baruuh ‘Tibreetee nꞌati yꞌan’ kak indi?" idiin.

43 Yasuuꞌa igwibi, "Taktakee dehaay wꞌashkiimti singadna. 44 Baabu aneeb diigwatiyaab insiikweeb nuun, gaal han aneeb beeti wꞌaay kaꞌadgiriya. Barooh aree tꞌaakharaati bꞌi asti yaksi andi. 45 Tuun batuuh Inabiyaayi kitabeeb kataabtu: ‘Bareeh kasseeh Ukwaasana allami indi.’ diyaaba. Ubaaba sinaakriit bariisooh allamamiiniibka anii dehaay yꞌiini. 46 Ukwaasanaay ikatiib beeb nuun, gaal han Ubaaba rhaab kiiki. Baruuh uubhaat Ubaaba rhaab ikati. 47 Oosdik andi hookna: aamaniiniibka umidhhan udaayim imaar indi. 48 Ani umidhhani hadhi akati. 49 Hoobaakna umingaayiib mannaab tamiyaana, laakiin iiyaan. 50 Laakiin hadhiib tibreetee nꞌati yꞌeen tooy eefeen. Een bareeh tamiiniib uutak iiyyi kiidi. 51 Tibreetee yꞌaab yhadhi idhhaniib aneeb akati. Een yhadhiyee tamiiniibka diimaab midhhan imaar indi. Aan yhadhi aniib ubasharu, aree barooh ani tuduniyaati midhhani jillaay iyaaw andi." idi.

52 Malya Iyahuudi winneet taktak imgwassaarniit, "Uun uutak tamnayi jillaay ubasharooh kak iniiw hoon?" idiin.

53 Yasuuꞌa bareeyooh dehaay, "Oosdik andi hookna: Wꞌaadami Oori bashar tamiit ubooyooh gwꞌi bitdiineek, abiiyaakna midhhan imaar kitdiina. 54 Baliin aniib ubashar tameenwa, aniib oobooy gwꞌeenwa umidhhan udaayim imaar iyadna. Tꞌaakharaati bꞌi aree ani bareeh asti yaksi andi. 55 Aniib ubashar sidkiit mꞌariitu, aree aniib uubooy sidki gwꞌastiibi. 56 Aniib ubashar tameenwa, aniib oobooy gwꞌeenwa baliin aniib ikweerna, ani han bareeyooh akwarri. 57 Ubaaba udhhani diigwatiyaheeb, ani han bariiyooh sabbii akwarri. Oontꞌaaneet aneeb tamiiniibka han bak anii sabbii ikwaar indi. 58 Aan yhadhi tibreetee tikwaaba. Hoobaakna mannaab tamiyaaniit iyaana, laakiin een yhadhi tamiiniibka diimaab ikwaar indi." idi. 59 Yasuuꞌa een ibhali hadiidiyanihoob, baruuh Iyahuudi diini gawiib Kafarnaahuumiib allami.

60 Gwida ikwiriyaatayeesooh barooh een diyee imaasiwna, "Uun akra tꞌaliimu, aaw barooh agbiliini?" idiin.

61 Yasuuꞌa ikwiriyaatayaah een ibhaliyee ashkiimiineet toona iktiin. Aflaay baruuh bareeyooh dehaay, "Aan baraah gallabeen hookna han? 62 Wꞌaadami Oor suur hooy iifiyeeb oomhiin ookiik reewee rhiteeneek aree! 63 Aashuuk midhhan iyawna. Oodehayi taad naat han kiidꞌi. Ibhali ani dehookna hadiidaneeb shuuk ikatiina aree midhhan ikatiin. 64 Masi bareesookna gali aamanaab kiikeen." idi. Yasuuꞌa baliib yꞌaamanaab baakay whankaay iktiin, barooh iitil iyad han iktiin. 65 Malya Yasuuꞌa masi, "Ubaaba adgirsaab biikaayeeb ootak nuun, gaal han aneeb beeti yꞌiiniib kiihaay haay adiyeeb usabab aree bak ikati." idi.

66 Been udoorii gwida ikwiriyaatayeesooh fidnaab yꞌagarna aree shaawti barooh aram kiikeen.

67 Yasuuꞌa itamna malu raatiya, "Baraak han giigi kitdiina, bak kiiki?" idi.

68 Siimoon Bitrus bariiyooh dehaay igwibi, "Wꞌankwanaay, aab beeti neebi? Baruuk umidhhan udaayimi bhali tibariya. 69 Oontꞌa aamannay, aree baruuk Ukwaasanaay Oongaal Umugaddas tikatiyeet toona nikteen." idi.

70 Malya Yasuuꞌa igwibi, "Bareek itamna malu waasaayookna kaaki han? Laakiin bareesookna gaal oobliis ikati." idi. 71 Yasuuꞌa tuuliyeeb, Yahuudaab Siimoon Wꞌiskaaryuuti ooru, baruuh itamna malooyeeb gaalu, malya Yasuuꞌaab itilaayt nuuniyaab iikti.