नहेम्याह 2

नहेम्याह रा यरूशलेम शईरो खे जाणा

1 अर्तक्षत्र राजे रे राज करदे ऊए बीए साले नीसान नाओं रे मीन्ने दे, जेबे तेस सामणे शराब थी, तेबे मैं शराब चकी की राजे खे दित्ती। इजी ते पईले आऊँ कदी तेस सामणे उदास नि ऊआ था। 2 तेबे राजे मांते पूछेया, "तूँ बमार तो नि ए, तेबे तेरा मूँ कऊँ उतरी रा? ये मनो री ई उदासी ए।" तेबे आऊँ थोड़ा जा डरीगा।

3 तेबे मैं राजे खे बोलेया, "राजा सदा जिऊँदा रओ! जेबे से शईर जिदे मेरे बुजुर्गा री कब्रा ए, उजाड़ पड़ी रा ओर तेतेरे द्वार फूखे दे ए, तो मेरा मूँ कऊँ नि उतरना?"

4 राजे मांते पूछेया, तो तूँ क्या चाएया?, तेबे मैं स्वर्गो रे परमेशरो ते मनो दे प्रार्थना करी की राजे खे बोलेया, 5 "अगर राजे खे ठीक लगो ओर तूँ आपणे दासो ते खुश ए, तो माखे यहूदा रे प्रदेशो दे जेती मेरे बुजुर्गा री कब्रा ए तेते शईरो खे पेजी दे, ताकि आऊँ तिजी खे फेर बणाऊँ।"

6 जेबे राजे गे राणी बैठी री थी, मांते पूछेया, "ताखे तेथी जाणे खे कितणे दिन लगणे? ओर वापस कदी आऊणा?" जेबे मैं तेसगे वापस आऊणे रा सई बखत दसेया तो राजा माखे पेजणे खे खुश ऊआ।

7 तेबे मैं राजे खे बोलेया, "जे राजे खे ठीक लगो, तो फरात नदिया रिया पच्छमा रिया जगा दे राज्यपाला खे ये लिखी की मांगे चिट्ठी देयो कि जदुओ तक आऊँ यहूदा दे नि पऊँचू, तदुओ तक सेयो माखे आपणे-आपणे देशो रिये ऊई की जाणे देयो। 8 ओर सरकारी बणो रे रखवाल़े आसापो खे बी ये लिखी की चिट्ठी माखे देई दे, ताकि सेयो माखे परमेशरो रे मन्दरो साथे लगदे ऊए बणो दे लकड़िया री कड़िया खे, दवाला खे ओर तेस कअरो खे, जिदे आऊँ जाई की रणा, लकड़ी देयो।" मेरे परमेशरो री दया-दृष्टि मां पाँदे थी, इजी री खातर राजे मेरी ये प्रार्थना मानी ली। 9 तेबे मैं फरात नदिया रिया पच्छमा रिया जगा दे परदाना गे जाईकी राजे रिया चिट्ठिया दित्तिया, राजे मां साथे सेनापति ओर कोड़े सवारा समेत पेजे थे। 10 ये सुणी की कि एक माणूं इस्राएली लोका रा कल्याण करने खे आई रा, होरोनो रा रणे वाल़ा सम्बल्लत ओर तोबियाह नाओं रा अम्मोनो रा कर्मचारी, इना दुँईं खे बऊत बुरा लगेया। 11 जेबे आऊँ यरूशलेम शईरो दे पऊँचेया, तेबे आऊँ तेथी तीऊँ दिना तक रया।

नहेम्याह रा शईरो री दवाला खे देखणा

12 तेबे आऊँ थोड़े जे यहूदी मर्दा खे लई की राती उठेया; मैं केसी गे नि दशेया कि मेरे परमेशरे यरूशलेम शईरो रे कल्याणो खे मेरे मनो दे क्या परी राखेया। आऊँ आपणी सवारिया रे डांगरो खे छाडी की ओरी केसी बी डांगरो खे आपू साथे नि लईगा। 13 आऊँ राती तराईया रे बड़े द्वारो रिये ऊई की निकल़ेया ओर अजगरो री सूबल़ा रिये ऊई की कूड़े रे बड़े द्वारो गे गया ओर यरूशलेम शईरो री टूटी री दवाल ओर फूखेया रा द्वार बी देखेया। 14 तेबे आऊँ आगे चली की सूबल़ा रे बड़े द्वार ओर राजे रे कुण्डो गे गया; पर मेरी सवारिया रे डांगरो खे आगे जाणे खे जगा नि थी। 15 तेबे आऊँ रातो-रात नाल़े रिये ऊई की दवाला खे देखदा ऊआ चढ़ीगा; तेबे कूमी की तराईया रे बड़े द्वारो ते पीतरे आया ओर ईंयाँ आऊँ वापस आया। 16 ओर परदान नि जाणो थे कि आऊँ केई गया ओर क्या करुँ था; बल्कि मैं तदुओ तक ना तो यहूदिया खे कुछ बताया था, ओर ना पुरोईता खे ओर ना अमीरा खे ओर ना परदाना खे ओर ना ई दूजे काम करने वाल़ेया खे कुछ दशेया। 17 तेबे मैं तिना खे बोलेया, "तुसे तो आपू देखणे लगी रे कि आसे केड़ी बुरी दशा दे ए कि यरूशलेम शईर उजाड़ पड़ी रा ओर तेतेरे द्वार फूखे रे ए। तो आओ, आसे यरूशलेम शईरो री दवाला खे बणाऊँए, ताकि आऊणे वाल़े बखतो दे म्हारी बेज्जती नि ओ।" 18 तेबे मैं तिना गे बताया कि मेरे परमेशरो री दया-दृष्टि मां पाँदे केड़ी ऊई ओर राजे मां साथे क्या-क्या गल्ला बोली राखिया, तेबे तिने बोलेया, "आओ आसे इजी खे बनाणे री त्यारी करूँए।" ओर तिने एस खरे काम करने खे ईम्मत कित्ती। 19 पर ये सुणी की होरोनो रा रणे वाल़ा सम्बल्लत ओर तोबियाह नाओं रा अम्मोनो रा कर्मचारी ओर गेशेम नाओं रा एक अरबी, म्हारा मजाक ड्वाणे लगे ओर आसा खे छोटा जाणी की बोलणे लगे, "तुसे ये क्या काम करने लगी रे। क्या तुसा राजे रे खलाफ बगावत करनी?" 20 तेबे मैं तिना खे ज्वाब दित्तेया, "स्वर्गो रे न्यायी परमेशरो म्हारा काम सफल करना, इजी री खातर आसा जो तेसरे दास ए तनो-मनो ते ये बनाणा; पर यरूशलेम शईरो दे ना तो तुसा रा कोई इस्सा, ना कोई अक्क ओर ना कोई नशाणी ए।"