2 Reis 4

एलीशा नबी गरीब कौन्शरी मद्दत केरते

1 एक्सां नेबी केरे टोली मरां एक्‍केरी कौन्शां एलीशा नेबी कां बिनती केरतां ज़ोवं, "तेरो दास मेरो मुन्श मेरि जेवरोए, ते तीं पतोए कि तै यहोवारो डर मन्ने बालो थियो, ते ज़ेसेरो तैस कर्ज़ो देने जो थियो तै एवरोए कि तै मेरे दूईये मट्ठन अपने गुलाम बनानेरे लेई ने।" 2 तैखन एलीशा तैस कौन्शी पुछ़ू, "अवं तेरे लेई कुन केरीं? मीं सेइं ज़ो कि तेरे घरे मां कुने?" तैसा जुवाब दित्तो, "तेरी दैसरे घरे मां एक्‍की भांडे मां तेलेरे अलावा होरू किछ भी नईं।" 3 एलीशा ज़ोवं, "तू बेइर गेइतां अपने सैरी पड़ोसी लोकन करां खाली भांडां मग, ते थोड़ां ज़ेरां भांडां न एना। 4 फिरी तू अपने मट्ठन समेत अपने घरे मां गा, ते दार बंद केरतां तैन सेभी भांडन मां तेल उलटेइयां, ते ज़ैना भेरोई गान तैन अलग रेखां।" 5 तैखन तै एलीशा नेबी करां च़ली जेई, ते अपने मट्ठन सेइं साथी अपने घरे गेइतां दार बंद कियूं; तैखन तैसेरां मट्ठां तैस कां भांडां आनतां जेआं ते तै तैन मांजो तेल भरती जेई। 6 ज़ैखन भांडां भेरोई जेआं, तैखन तैसा अपने मट्ठे सेइं ज़ोवं, "मीं कां अक होरू भांड भी आन;" तैनी तैस सेइं ज़ोवं, "होरां भांडां त नईं हुनी।" तैखन तेल रुकी जेव। 7 तैखन तैस कौन्शां गेइतां परमेशरेरे नेबी सेइं ई गल ज़ोई। ते तैनी ज़ोवं, "गा तेल बेच़तां कर्ज़ो मुका; ते ज़ै तेल रेई गाए, तैस सेइं तू अपने मट्ठन सेइं साथी अपनो गुज़ारो केरां।"