1 ते मूसा अपने शेरहे यित्रो नंव्वेरे मिद्यान मुल्खेरे याजकेरां गब्बां च़ारतो थियो, ते तैने तैना सुनसान ठारारे पश्चिमेरे पासे परमेशरेरे पहाड़* होरेब पहाड़ेरे नेड़े नेआं। 2 ते परमेशरेरे दूते एक्‍की झ़ल्‍लोंए मां अग्गरे लप्पी मां तैस दर्शन दित्तू, ते तैनी लावं कि एक्‍की झ़ल्‍लोंए अग लग्गोरीए, पन तैन झ़ल्‍लोवं फुकोए न। 3 तैखन मूसे ज़ोवं, "अवं नेड़े गेइतां ऐह नज़ारो हेरी कि एन झ़ल्‍लोवं फुकोए की नन्ना।" 4 ज़ैखन यहोवाए हेरू कि ऐह तकनेरे लेई नेड़े एवरोए, तैखन तैने झ़ल्‍लोंए मरां हक देइतां ज़ोवं, "हे मूसा, हे मूसा!" मूसे ज़ोवं, "हाँजी अवं इड़ी आईं।" 5 तैखन परमेशरे ज़ोवं, "नेड़े न एई, ते अपने पव्वां केरि जुट्टी खोल्‍ल, ज़ैस ठैरी तू खड़ोस, तै पवित्र ठारे।" 6 फिरी परमेशरे मूसा सेइं ज़ोवं, "अवं तेरे सियानां केरो परमेशर, यानी अब्राहमेरो परमेशर, ते इसहाकेरो परमेशर, ते याकूबेरो परमेशर आईं।" तैखन मूसा परमेशरे तकने करां डरो ते तैनी अपनु तुत्तर छ़ुपाव।

7 फिरी यहोवा ज़ोवं, "मीं अपने लोकां केरि तकलीफ हेरी, ज़ैना मिस्र मुल्खे मां आन, ते तैन केरि चिन्डां ज़ैना निगरानी केरनेबालां केरे हथ्थे मरां छुटनेरे लेई आन मीं शुनी, मीं तैन केरे दुखे पुड़ ध्यान दित्तेरूए। 8 एल्हेरेलेइ अवं उन्ढो एवरोईं, किजोकि तैन मिस्री केरे हथ्थेरां छुटेईं ते तैस मुल्खे मरां केढतां तैन एक्‍की रोड़े मुल्खे मां ज़ैड़ी दुद्ध ते मैछ़ेरी गड्डां* बेगतिन, मतलब कनानी, हित्ती, एमोरी, परिज्जी, हिब्बी ते यबूसी लोकां केरे मुल्खे मां पुज़ेई। 9 एल्हेरेलेइ हुनी शुन, इस्राएली लोकां केरि चिन्डां मीं शुनोरिन, मीं तै ज़ुलम भी लाहोरोए ज़ै मिस्री लोकेईं तैन पुड़ कियोरोए। 10 एल्हेरेलेइ एई, अवं तीं फ़िरौने कां भेज़ताईं कि तू मेरे इस्राएली लोकन मिस्र मुल्खे मरां केढतां आनस।" 11 तैखन मूसा परमेशरे सेइं ज़ोवं, "अवं कौन आईं कि ज़ै फ़िरौने कां गेईं, ते इस्राएली लोकन मिस्रे मरां केढतां एन्हीं?" 12 परमेशरे जुवाब दित्तो, "अवं तीं सेइं साथी आईं, तीं भेज़ने बालो अव्वें आईं, ते तेरे लेई ऐह निशान भोल्हो, कि ज़ैखन तू तैन लोकन मिस्रे मरां केढतां आनेलो तैखन तू ते एना लोक इस पहाड़े पुड़ मेरी आराधना केरेले।"

13 मूसे परमेशरे सेइं ज़ोवं, "ज़ैखन अवं इस्राएली लोकन कां गेइतां तैन ज़ोईं, कि तुश्शे सियानां केरे परमेशरे अवं तुसन कां भेज़ोरोईं: तैखन अगर तैना पुछ़न कि तैसेरू नवं कुने, त अवं कुन जुवाब देइलो?" 14 परमेशरे मूसे सेइं ज़ोवं: "अवं ज़ै आईं त आईं।" फिरी परमेशरे ज़ोवं, "तू इस्राएली लोकन कां गेइतां एन ज़ोइयां कि, ज़ेसेरू इन नंव्वे, ‘अवं आईं’ तैने अवं तुसन कां भेज़ोरोईं।" 15 फिरी परमेशरे मूसे सेइं एन भी ज़ोवं कि, "तू इस्राएली लोकन सेइं एन्च़रे ज़ोइयां, ‘परमेशरे तुश्शे सियानां केरे परमेशरे यानी अब्राहम इसहाक ते याकूबेरे परमेशर यहोवा अवं तुसन कां भेज़ोरोईं। हेरा आखरी तगर मेरू एन्ने नंव्वे, पीढ़ी-पीढ़ी तगर इस्से नंव्वे सेइं अवं याद कियो गालो।’ 16 एल्हेरेलेइ गेइतां इस्राएली बुज़ुर्गन एक्‍की ठैरी जम्हां केर, ते तैन सेइं ज़ो, ‘कि तुश्शे सियाना केरे परमेशरे यानी अब्राहम, इसहाक ते याकूबेरे परमेशर, यहोवा मीं दर्शन देइतां एन ज़ोवरूए, कि तुसन पुड़ ज़ै बर्ताव मिस्री लोक केरि राहोरेन तैस पुड़ मीं ध्यान दित्तोरूए। 17 ते मीं फैसलो कियोरोए कि अवं तुसन मिस्रेरे दुखन मरां केढतां कनानी, हित्ती, एमोरी, परिज्जी हिब्बी ते यबूसी लोकां केरे मुल्खे मां पुज़ेइलो ज़ैड़ी दुद्ध ते माछ़ी बगते।’ 18 ते तैखन तैना इस्राएली बुज़ुर्ग तेरी गल मन्नेले, ते तू तैन्न साथी नेइतां मिस्रेरे राज़े कां गेइतां तैस सेइं इन ज़ोइयां कि, ‘इब्रानी केरे परमेशरेरी असन सेइं मुलाकात भोवरीए; ते हुनी तू ट्लेइ दिहाड़ां केरि पैदल बत च़ेलतां असन सुनसान ठैरी मां गाने दे, ताके अस परमेशर यहोवारे लेई बलिदान च़ाढ़म।’ 19 ते अवं ज़ानताईं कि मिस्र मुल्खेरो राज़ो तुसन तांतगर न गाने देलो, ज़ांतगर परमेशरेरो शेक्तिबाले हथ्थे हेरे ते अवं बड़े ज़ोरे दबावे सेइं तैस मजबूर न केरि। 20 एल्हेरेलेइ अवं अपनो हथ अग्रोवं केरतां मिस्र मुल्खे मां चमत्कारेरां कम्मां केरतां तैन सज़ाह देइलो; तैसेरां बाद तै तुसन गाने देलो। 21 तैखन अवं तैन मिस्री लोकन करां इन इस्राएली लोकन पुड़ एरहो अनुग्रह करेइलो, कि तैन निसते बार खाली हथ्थे गाने न देले। 22 हर अक कौन्श एपनी-एपनी मिस्री पड़ोसी कौन्शी करां, ते कने ज़ै तैसेरे घरे मां मेहमान भोए तैस करां सोन्ने चैंदरो गेहनो ते लानेरां लिगड़ां मग्गे, ते तैना तुस अपने मट्ठन कुइयन लुवेइयथ, एन्च़रे सेइं तुस मिस्रन लुटेले।"