1 इन गल्‍लां केरे बाद एरू भोवं, कि मिस्र मुल्खेरे राज़ेरे खलाफ दूई मैन्हेइं रोट्टी बनानेबाले ते दाछ़रो रस पियाने बाले कोई पाप कियोरो थियो। 2 तैखन फ़िरौने अपने तैना दूईयने हाकिमन मतलब पियाने बालां केरे प्रधान, ते रोट्टी बनाने बालां केरे प्रधाने पुड़ क्रोधे भोइ जेव। 3 तैना कैद करेइतां, मेहलेरे पहरेदारां केरो प्रधानेरे घरेरे तैस्से कैदखाने मां बन्द कराए, ज़ैड़ी यूसुफ भी कैदी थियो। 4 तैखन मेहलेरे पहरेदारां केरे प्रधाने तैना यूसुफेरे हवाले किये, ते तै तैन केरि सेवा केरने लगो: ते किछ दिहाड़न तगर तैना कैदखाने मां राए। 5 मिस्रेरे राज़ेरे रोट्टी बनानेबालो ते दाछ़रो रस पियाने बालो ज़ैना कैदखाने मां बन्द थिये, तैन दूईयेईं एक्‍की राती मां अक-अक सुपनु लावं। 6 झ़ेझ़ां ज़ैखन यूसुफ तैन कां अन्तर जेव, तैखन तैनी तैन केरे पासे तक्‍कू, त कुन हेरते, कि तैना बड़े उदास भेवरेन। 7 एल्हेरेलेइ तैनी फ़िरौनेरे तैन हाकिमन सेइं, ज़ैना तैसेरे मालिकेरे घरेरे कैदखाने मां बन्द थिये पुछ़ू, "अज़ तुस एत्रे उदास किजो भोवरेथ?" 8 तैनेईं तैस जुवाब दित्तो, "असेईं दूईयेईं सुपनु लाहेरूए, ते तैसेरो मतलब ज़ोने बालो कोई भी नईं।" यूसुफे तैन सेइं ज़ोवं, "कुन सुपनेरो मतलब ज़ोनू परमेशरेरू कम नईं? मीं सेइं अपनु-अपनु सुपनु ज़ोथ।"

9 तैखन दाछ़रो रस पियाने बालां केरो प्रधान अपनु सुपनु यूसुफे सेइं ज़ोने लगो: "मीं सुपने मां लावं, कि मेरे सामने अक दाछ़रो बूटोए। 10 ते तैस दाछ़रे बूटे पुड़ ट्लाई डालन; ते तैस मां ज़ेन्च़रे मुन्केरे लगोरेन, ते तै दाछ़ फुल्‍ली ते घोन्छ़न मां दाछ़ लेगतां पेक्‍की जेवरीए। 11 ते फ़िरौनेरो कुटोरो मेरे हथ्थे मां थियो; ते मीं तै दाछ़ निच़ोड़तां फ़िरौनेरे कुटोरे मां भेरतां फ़िरौनेरे हथ्थे मां दित्तो।" 12 यूसुफे तैस सेइं ज़ोवं, "एसेरो मतलब ईए: ट्लाई डैलड़ी केरो मतलब ट्लाई दिहाड़ेन। 13 एल्हेरेलेइ अज़्ज़ेरे बाद ट्लाई दिहाड़ां केरे अन्तर फ़िरौन तीं तेरी ठारी पुड़ बहाल केरेलो, ते तू पेइलेरो ज़ेरो फ़िरौनेरो कुटोरो तैसेरे हथ्थे मां देइयां केरेलो। 14 ते ज़ैखन तेरू भलू भोइ गाए तैखन मीं याद केरां, ते मीं पुड़ महरबानी केरतां फ़िरौने सेइं मेरी गल लेइयां, ते मीं इस घरे मरां छुटेइयां। 15 किजोकि सच़्च़े अवं इब्रानी केरे मुल्खेरां च़ोरतां आनोरो आईं, ते इड़ी भी मीं कोई एरू कम नईं कियोरू, ज़ेसेरे वजाई सेइं अवं इस कैदखाने मां छ़डोरोइं।"

16 एन हेरतां कि तैसेरे सुपनेरो मतलब रोड़ो निस्सो, रोट्टी बनाने बालां केरो प्रधान भी यूसुफे सेइं ज़ोने लगो, "मीं भी अक सुपनु लाहेरूए, तैन इने: कि मेरे दोग्गे पुड़ छ़ित्ती सुफेद रोट्टी केरि ट्लाई टोकरिन। 17 ते बेहीं टोकरी मां फ़िरौनेरे लेई हर किसमेरी पेकोरी चीज़न; ते च़ुड़ोलू मेरे दोग्गे पुड़ां टोकरी मरां तैन चीज़न खाने लगोरेन।" 18 यूसुफे ज़ोवं, "एसेरो मतलब ईहीए: ट्लाई टोकरी मतलब ट्लाई दिहाड़े आन। 19 अज़्ज़ेरे बाद ट्लाई दिहाड़ां केरे अन्तर फ़िरौन तेरी क्रोड़ी कटेइतां तीं एक्‍की बुट्टे पुड़ टंगालो, ते च़ुड़ोलू तेरू मास छ़िन्दतां खालां।"

20 ते ट्लेइयोवं दिहाड़े फ़िरौनेरी ज़र्म दिहाड़ी थी, ते तैनी अक बड़ी धाम दित्ती, ते तैनी अपने सब नौकर भेज़े, ते तैनी रोट्टी बनाने बालां केरो प्रधान कैदखाने मरां आज़ाद कराव। 21 तैनी दाछ़रो रस पियाने बालां केरो प्रधान तैसेरी पेइली ठारी पुड़ बहाल कियो, ते तै फिरी फ़िरौनेरे हथ्थे मां कुटोरो देने लगो। 22 पन तैनी रोट्टी बनाने बालां केरे प्रधाने फांसी दित्ती, ते यूसुफेरू ज़ोवरू सच़ निस्सू। 23 पन दाछ़रो पियाने बालां केरे प्रधाने यूसुफ याद न रख्खो, बल्के तैस बिसरी जेव।