1 फिरी यहोवाए मूसे सेइं ज़ोवं, 2 "हारून ते तैसेरे मट्ठन सेइं ते सब इस्राएली लोकन सेइं ज़ो कि यहोवाए ई हुक्म दित्तोरोए: 3 इस्राएलेरे घराने मरां कोई मैन्हु दांत या गबड़ू, छ़ल्‍ली, चाहे डेरन मां चाहे डेरन करां बेइर मैरतां, 4 मिलापे बाले तेम्बेरे दारे पुड़, यहोवारे रानेरी ठारारे सामने यहोवा जो च़ाढ़नेरे लेई न ने, त तैस मैन्हु तैस खूनेरो दोष लग्गेलो; ते तै मैन्हु ज़ै खून बगाने बालो ठहरेलो, तै अपने लोकन मरां अलग कियो गाए। 5 इस विधरी ई वजा आहे कि इस्राएली अपने बलिदानां खुल्‍ले मैइदाने मां केरतन, तैना तैन्न मिलापे बाले तेम्बेरे दारे पुड़ याजके कां, यहोवारे लेई नेइतां तैसेरे लेई मेलबलि केरतां बलिदान केरन; 6 ते याजक खूने मिलापे बाले तेम्बेरे दारे पुड़ यहोवारे वेदी पुड़ छ़िड़के, ते चर्भी तैस पसंद एजनेबाली खुशबूअरे लेई फुक्‍के। 7 तैना ज़ैना थाव्वां केरि मूरती*17:7 थाव्वां केरि मूरती दुष्ट आत्मा पूज़ने बाले भोइतां व्यभिचार केरतन, तैना फिरी अपने बलि देनेरे जानबरन तैन केरे लेई बलिदान न केरन। तुश्शी पीढ़ी केरे लेई ईए हमेशारी विधि भोल्ही।

8 "तू तैन सेइं ज़ो कि इस्राएली लोकन मरां या तैन केरे दरमियाने मां रानेबाले परदेशन मरां कोई मैन्हु की न भोए ज़ै होमबलि या मेलबलि च़ाढ़े, 9 ते तैस मिलापे बाले तेम्बेरे दारे पुड़ यहोवारे लेई च़ाढ़ने जो न आने; तै मैन्हु अपने लोकन मरां अलग कियो गालो।

10 "फिरी इस्राएली लोकन मरां या तैन केरे दरमियाने मां रानेबाले परदेशन मरां कोई मैन्हु की न भोए ज़ै कोन्ची किसमेरो खून खाए, अवं तैस खून खाने बालेरे खलाफ भोइतां तैस तैसेरे लोकां केरे दरमियाने मरां नाश केरि छ़डेलो। 11 किजोकि जिसमेरो प्राण खूने मां रहते; ते तै मीं तुसन लोकन वेदी पुड़ च़ाढ़नेरे लेई दित्तोरोए कि तुश्शे प्राणां केरे लेई प्रायश्चित कियूं गाए; किजोकि प्राणेरे लेई खूने सेइं प्रायश्चित भोते। 12 इस वजाई सेइं अवं इस्राएली लोकन सेइं ज़ोताईं कि तुसन मरां कोई मैन्हु खून न खाए, ते ज़ै परदेशी तुश्शे दरमियाने मां रहतो भोए तै भी खून कधी न खाए।

13 "इस्राएली लोकन मरां या तैन केरे दरमियाने मां रानेबाले परदेशन मरां, कोई मैन्हु की न भोए, ज़ै शिकार केरतां खानेरे काबल जानबर या च़ुड़ोलन ट्लाए, तै तैसेरे खूने उलटेइतां धूड़ी मां ढक्‍के। 14 किजोकि जिसमेरो प्राण ज़ै आहे तै तैसेरो खूने आहे, ज़ै तैस साथी अक आहे; एल्हेरेलेइ अवं इस्राएली लोकन सेइं ज़ोताईं कि कोन्ची किसमेरे प्रैणेरो खूने तुस न खेइयथ, किजोकि सब प्राणी केरि जान तैन केरो खूने आहे; ज़ै कोई तैस खाए तै नाश कियो गालो। 15 ते चाहे तै देशी भोए या परदेशी भोए, ज़ै कोई कोन्ची मारोरे जानबरेरू पैनी ते मास खाए तै अपने लिगड़न धोइतां पैनी सेइं निहान दे, ते ड्लवझ़ी तगर अशुद्ध रालो; तैसेरां बाद तै शुद्ध भोल्हो। 16 पन अगर तै तैन्न न धोए ते न निहान दे, त तै अपने अधर्मेरो ज़िमेवार एप्पु भोल्हो।"