1 हे मेरे मट्ठा, मेरी अक्लरे गल्‍लन पुड़ ध्यान दे,

मेरी समझ़रे पासे कन ला;

2 ताके तेरो ज़मीर सुरक्षित बनोरो राए,

ते तू ज्ञानेरी हिफाज़त केरस।

3 किजोकि बेखली कौन्शरे ओठन सेइं माछ़ी ट्लिशड़ते,

ते तैसारी गल्‍लां तेले करां भी जादे मुलायम भोतिन;

4 पन इन कम्मां केरो नितीजो नागदौनारो ज़ेरो ट्लिठो

ते दूई धारण बाली तलवारारो ज़ेरो तिखो भोते।

5 तैसेरे पव मौतरे पासे उन्ढे गातन;

ते तैसेरे कदम पाताले तगर पुज़तन।

6 तै ज़िन्दगरे बत्तरे बारे मां खियाल न केरे;

तैसेरी बत्तां टैरी आन, पन तैन तै एप्पु न ज़ाने।

7 एल्हेरेलेइ हुनी हे मेरे मट्ठव, मेरी शुना,

ते मेरी गल्‍लन करां तुत्तर न फेर।

8 एरी कौन्शी करां दूरे रा,

ते तैसेरे घरेरे सामने भी नईं गानू;

9 कोन्च एरू न भोए कि तू ताकत

होरि केरे हथ्थे, ते अपनि बाकी ज़िन्दगी बेरहमहेरे कैबू मां केरि देस;

10 या बखले तेरी कमाई सेइं अपनु पेट भरन,

ते अनज़ान मैन्हु तेरे मेहनतरो फल अपने घरे मां रखन;

11 ते तू अपने आखरी वक्ते मां ज़ैखन तेरे जिसमेरी ताकत खतम भोइ गाए तैखन कर लास,

12 तू इन ज़ोलो, "मीं शिक्षा सेइं केरो बैर कियो,

ते डांटने बाले घटिया समझ़े!

13 मीं अपने गुरू केरि गल्‍लां न मेन्नी

ते अपने शिखालने बालां केरे पासे ध्यान नईं लेवरू।

14 अवं सभा ते मेण्डलरे मझ़ाटे मां

हर बुरैई मां शामल राव।"

15 तू अपने कुण्डे मरां पानी,

ते अपने खुहेरे नागे मरां पानी पी।

16 कुन तेरे नागां केरू पानी सड़की मां,

ते तेरे पैनेरी धारां चौकन मां बगन?

17 इन सिर्फ तेरे लेई राए,

ते तीं साथी बखलां केरे लेई न भोए।

18 तेरो नाग धन राए; ते अपने कौन्शी सेइं साथी खुश रह ज़ैस सेइं तीं ड्लाह बनेवरो थियो ज़ैखन तू जुवान थियो,

19 तै तेरे लेई ट्लारी हिरनी या खूबसूरत सांभेरनरी ज़ेरि भोए,

तैसारी छाती हमेशा तीं खुश रख्खे,

ते तैसेरो प्यार हमेशा तीं फिदा केरतो राए।

20 हे मेरे मट्ठा, तू बदचलन कौन्शी पुड़ किजो फिदा भोस,

ते बेखली कौन्शी किजो छैती सेइं लास?

21 किजोकि मैन्हेरी बत यहोवारी नज़री करां छ़पोरी नईं,

ते तै तैसेरे सब बत्तन पुड़ ध्यान देते।

22 दुष्ट अपने अधर्मेरे कम्मन सेइं फसेलो,

ते अपने पापेरे बन्धनन मां बन्धोरो रालो।

23 तै अनुशासन न मन्नेरे वजाई सेइं मेरि गालो,

ते अपने बेवकूफेरे वजाई सेइं भटकतो रालो।