João 20

Yezu eezɛtel Toma nyel

24 Ghuna ngɔt tɔ bɛdjekel kam nɛ bɛbá, Toma mot nagetaa din ɛ Ɛwas ɔ, nabɛ ààdi tak é ghɛŋ Yezu natel bɛ nyel ɛ. 25 Tin, bɛdhiiti bɛdjekel zokazɛlɛɛ nyɛ náá: «Bis eebee Ghɛŋ!» Wɔ gwaa, Toma zɛbɔɔza nɛ nɔɔ náá: «Mɛ di ààbee ebam e mɛpyoŋ mɛ epɔndi tɔ mɛmbɔ mɛ ɔɔ, mɛ di ààwa djin tɔ ebam e mɛpyoŋ mɛ tak ɔɔ, mɛ di ààwa mbɔ tɔ bam bɛ nalum nyɛ ɛkɔɔ é ebhaaz ɔɔ, yɛ di ààbɛ deenek ɔɔ, mɛ tok nɛ ghwyil ɛmyaal.»

26 Yenga wat bhii tak, bɛdjekel nabaadi ɛ́ zɛɛga é di wat tɔ ndjaa. Toma nadi ɛ́ tin, bɛ nɛ bɛnɔɔ. Mɛbɛ mɛ ndjaa nadi ɛ́ ekɔɔla ghiŋ. Tin, Yezu eezɛtuula, nyɛ eezɛtyaa tetel kuku ɛbwak ɛ lɔɔ. Nyɛy nɛ nɔɔ náá: «Egwyem di nɛ nen!» 27 Bhii tak, nyɛ eezɛke nɛ Toma náá: «Wa djin’ɔ wak, da wɔ ɛ́ bee mɛmbɔ mam. Sɛɛba mbɔ’ɔ, da wɔ ɛ́ zɛwa tɔ ebhaaz bam. Kata ɛswonal, da wɔ ɛ́ dum koŋ nɛ Zɛɛb!» 28 Tin, Toma eezɛbɔɔza náá: «Ghɛŋ’am, Zɛɛb’am!» 29 É di’enek, Yezu eezɛke nɛ nɛ náá: «Wɔ dum koŋ’ɔ nɛ nam ɛ, etɛɛ náá, wɔ eebee mɛ? Ɛnyɔ nɛ bot ɛ di edum koŋ nɛ nam, bɔɔ ààbee mɛ ɔ!»