1,2 Bot ɛbuɛpe nadi esaa náá, Yezu duu bɛ Zɛɛb. Tin, Yezu nyɛ ɛmet nabɛ ààdi eduu bot ɛ tak Zɛɛb. Ye nabɛ ɛ́ bɛdjekel bɛ ɛ́ nadi eduu bot Zɛɛb. É ghɛŋ sama bot ɛ eFalizyɛ nagwak náá, Yezu nadi eduu bot ɛbuɛpe dhaa Zaŋ ɛ, wɔ gwaa bɛ zɛsa mbee lyem. 3 É ghɛŋ Yezu nagwak bot elii deenek ɛ́, nyɛ naazɛdus pɛ kyee dik Yude, nyɛ ɛ́ eezɛsik pɛ kyee dik Ghalile.

4 É di’enek, ye nazogoka ɛ́, nyɛ dhaa pɛ ze kyee dik Samaali. 5 Nyɛ eezɛkum é ngwoob dhiiti ghaada kyee dik Samaali nadi edjóoaa Sikaad ɛ. Ghaada tak nabɛ ɛ́ é ngwoob pyeeb Zakɔɔb nadjɛ mɔn Zozɛf ɛ. 6 É di tak, ye nabɛ ɛ́ nɛ guk mɛdii ɛ Zakɔɔb. Dáa nabela náá, Yezu nabɛ ɛ́ nyɛ eezewak nɛ kyeed ɛ, é di’enek, nyɛ eezɛnɔɔ nyel disi é ngwoob guk mɛdii. Ye nabɛ ɛ́ dwoo moo tyee kuku gwoo.

7,8 Bɛdjekel eezɛtɔ́ pɛ dɛl kɛsaa edee. Bhii tak, dhiiti moma Samaali eezɛzyɛ zɛdaa mɛdii. Wɔ gwaa, Yezu zɛke nɛ nɛ náá: «Djɛ mɛ mɛdii mɛ dek.» 9 Moma tak eezɛbɔɔza nɛ nɛ náá: «Wɔy ɛ́ mot mbyak eYuda. Ye kan dáa, étɛp wɔ neewaab mɛdii nɛ mam, moma mbyak Samaali?» Tinaak, nyɛ nake deenek ɛ́, etɛɛ náá, bot ɛ mbyak eYuda ààgwakel nɛ bot ɛ mbyak Samaali. Yezu eewaab dhiiti moma dɛl ɛ Samaali mɛdii

10 É di’enek, Yezu ɛ́ boozɛbɔɔza nɛ nɛ náá: «Wɔ ɛpedi ɛ́ di egu sa Zɛɛb aadjɛ wɔ ɛ, wɔ baadi egu mot di eke nɛ nɔ náá: "Djɛ mɛ mɛdii, mɛ dek" ɔɔ, pe wɔy ɛ́ waab mɛdii nɛ nɛ. É di’enek, nyɛ waadjɛ wɔ mɛdii mɛ di edjɛ tsik ɛ.»

11 Moma yenɔk eezɛke: «Ghɛŋ! Wɔ tok nɛ sa wɔ aadaa mɛdii nɛ yɛ. Guk nɛ dim. Haaa wɔ aabela mɛdii mɛ di edjɛ tsik ɛ wo?

12 Wɔ kwyɛl ɛlɛɛ ɛ́ náá, wɔ ɛ́ boo-mot dhaa bhaab’es Zakɔɔb, mot nadjɛ bis guk mɛdii mak ɔ? Tin, nyɛ naadɛ mɛdii mɛ tak nyɛy nyɛ ɛmet, zɛnɔɔ bɔn bɛ, nɛ mɛsaa mɛ bɛtit mɛ nyɛ nadi ebaal ɛ?»

13 Tin, Yezu eezɛbɔɔza nɛ nɛ náá: «Bot djas di edɛ mɛdii mak ɔ, bɛ waabaagwak gwyes ɛdɛ mɛdii. 14 Tin, mot aadɛ mɛdii mɛ mam aadjɛ nyɛ ɔ, mot tak aanàkwaabaagwak gwyes mɛdii. Etɛɛ náá, mɛdii mɛ mam aadjɛ nyɛ ɛ, yɛ aaliiza tɔ lɛ ɛ́, sɔɔgɔ mɛdii mɛ tsik na kɔm-kɔm mɛ di ààgel ɛ.» 15 Moma yenɔk eezɛke nɛ nɛ náá: «Ghɛŋ, djɛ mɛ mɛdii mɛ tak, étɛp mɛ needi ààbaagwak gwyes mɛdii, mɛ needi ààbaazezyɛ zɛdaa mɛdii wak.» 16 Yezu eezɛke nɛ moma tak náá: «Tɔ́a, kɛdjóo ngom’ɔ, da bi ɛ́ zyɛ wak.»

17 Tin, moma yenɔk eezɛbɔɔza náá: «Mɛ tok nɛ ngom.» É di’enek, Yezu ɛ́ boozɛke nɛ nɛ náá: «Wɔ ɛ́ nɛ gham nɛ ɛke náá, wɔ tok nɛ ngom. 18 Etɛɛ náá, wɔ naaba botom ɛtɛn. Motom wɔ di nɛ nɛ mos’aak, nyɛ tok ngom’ɔ. É di’enek, wɔ bɛ ɛ́ wɔ eelɛɛ sa di náá, yɛ ɛ́ tsɛɛtsɛ ɛ.»

19 Moma yenɔk eezɛke nɛ Yezu náá: «Ghɛŋ, mɛ bee ɛ́ ɛkɛɛ náá, wɔ ɛ́ ngoolel-Mɛkpa ɛ Zɛɛb. 20 Bɛbhaab bis, bot ɛ Samaali naduwal Zɛɛb ɛ́ kɔ ɛtsok ɛlak. Yɛ kabɛ biyɔ eYuda ɔɔ, bi ke ɛ́ náá: "Di di egoka nɛ ɛdjaala Zɛɛb ɛ, pɛ Yeluzalɛm."» 21 Yezu eezɛbɔɔza nɛ nɛ náá: «Wɔy moma, myaala sa mɛ di elɛɛ’aak. Ɛwala ɛpezyɛ, ɛwala di náá, bot aanàbaakɛduwal Zɛɛb Sɛɛg pɛ kɔ ɛtsok ɛlak nɛghu pɛ Yeluzalɛm ɛ. 22 Biyɔ bot ɛ Samaali, bi dyeebaduwal ɛ́ Zɛɛb bi di ààgu ɛ. Yɛ kabɛ bisɔ eYuda ɔɔ, bis duwal ɛ́ Zɛɛb bis di egu ɛ. Etɛɛ náá, tsik dus ɛ́ pɛ daa bot ɛ mbyak eYuda. 23 Tin, guka náá, ɛwala ɛpezyɛ, ɛwala ɛ tak eezekum, ɛwala ɛ bɛtɛtɛ ɛ bɛduwalel aaduwal Sɛɛg pɛ tɔ sisim nɛ tɔ etsɛɛtsɛ ɛ. Etɛɛ náá, binɔk ɛ́ mbi bɛduwalel ɛ Zɛɛb di ekwyɛl ɔ. 24 Zɛɛb ɛ́ Sisim. Yɛ ɛ́ étɛp tak ɛ ye di enyɔ náá, bot ɛ di eduwal nyɛ ɔ, duwal nyɛ pɛ tɔ sisim nɛ tɔ etsɛɛtsɛ.»

25 Moma eebaazɛke nɛ Yezu náá: «Mɛ nɛ gu náá, Mɛsia di edjóoaa "Klisto" ɔ, nyɛ waazyɛ. É sok nyɛ aazyɛ ɛ, nyɛ waazɛlɛɛ bis esa binek djas». 26 Tin, Yezu eezɛke nɛ nɛ náá: «Mam, mot di elii nɛ nɔ’aak, yɛ ɛ́ mam ɛ di Mɛsia.»

27 É di’enek, bɛdjekel bɛ eezɛtuula bɛ moo tin edjoka etɛɛ náá, bɛ naazɛbela Yezu elii nɛ moma tak. Tin, mot ngɔt pak’ɔɔ nabɛ ààdji nyɛ náá: «Wɔ saa yé?» Nɛghu: «Kɔ ɛsu ɛ yé wɔ di elii bi nɛ moma yak?» 28 Bhii tak, moma tak eezɛlik bhe nyɛ di edaa mɛdii mɛ ɛ, nyɛ eezɛnɔɔ nyel’ɛ, sik pɛ ghaada. Nyɛ moo tin eke nɛ bot náá: 29 «Dhabeeka dhiiti mot eelɛɛ mɛ etɛp ee mɛ di esa djas ɛ. Mɛ bee ɛ́ náá, mot’ak ɛ di Mɛsia!» 30 Bot ɛ ghaada tak eezɛghɛɛ, tɔ́ kɛbee Yezu pɛ nyɛ nadi ɛ́.

31 É di’enek, bɛdjekel bɛ eezɛbesal nyɛ náá, nyɛ dɛ edee. Bɔɔ náá: «Labhi, dɛa edee!» 32 Tin, nyɛ eezɛke nɛ nɔɔ náá: «Mam dɛ ɛ́ mbi edee ee di náá, bi ààgu ɛ.» 33 Tin, bɛdjekel moo tin edjinel pak’ɔɔ náá: «Dhiiti mot bɛ ɛ́ nyɛ eezyɛ nyɛ nɛ edee bhii koŋ’enaka?»

34 É di’enek, Yezu eezɛbɔɔza nɛ nɔɔ náá: «Edee bam ɛ́ ɛsa ɛkwosak ɛ mot nadhis mɛ ɔ. Nyɛ nadhis mɛ ɛ́, étɛp mɛ neesa mɛsa mɛ kɛkum ɛsik ɛ tak. 35 Biyɔ bɛmet bi nɛ dyeebakan kana yak: "Ye kalik ɛ́ bɛngɔn ɛná, étɛp ɛkɛdis edee ee zekwak tɔ epyeeb ɛ." Mam kalɛɛ bin ɛ́ náá, benka mis men, da bi ɛ́ gwyák mɛbhek men, yɛ eezewum, etɛɛ náá, ye neekɛdisaa tɔ epyeeb. 36 Mot di esa mɛsa mɛ ɛdis edee tɔ pyeeb ɔ, nyɛ nɛ bela yɛ efute djala nɛ mɛsa mɛ nyɛ sa ɛ. Nyɛ ɛpesɛɛg mɛbhek, mɛbhek mɛ tak ɛ, bot djas aabela tsik na kɔm-kɔm ɔ. Deenek etɛɛ náá, mot di ebɛ mɛbhek ɔ, nɛ mot di edis edee tɔ pyeeb ɔ, bɔɔ djas neemyaala sama. 37 Yɛ ɛ́ tsɛɛtsɛ, kana di eke náá: "Dhiiti mot ɛpebɛ mɛbhek, nwyak tak kazyɛ ɛ́ zɛbɔk bhum tak". 38 Etɛɛ náá, mɛ eelwom bin, bi tɔ́ kɛdis mɛbhek, tɔ edi di náá, bi nabɛ ààbɛ mɛbhek mɛ tak ɛ. Bɛdhiiti bot ɛ́ nazesa mɛsa, biyɔ kadi ɛ́ bot ɛ di ezyɛ zɛdɛ edee e mɛsa mɔɔ ɔ.»

39 Bɛtɛ nɛ bot ɛ kyee dik Samaali nadi tɔ dɛl ɛlenek ɔ, naabaadum koŋ nɛ Yezu ɛbuɛpe. Bɛ namyaal nyɛ ɛ́ kɔ ɛsu ɛ etɛp e moma yenɔk nalɛɛ bɛ ɛ. Nyɛ nadi eke ɛ́ náá: «Dhabeeka dhiiti mot eelɛɛ mɛ etɛp ee mɛ di esa djas ɛ.» 40 Bhii tak, dáa bot ɛ kyee dik Samaali nazɛbela Yezu tin ɛ, bɛ eezɛke nɛ nɛ náá: «Nàkabaadhaa. Zokadi wak.» Tin, nyɛ eezɛdjasi mɛlu mɛmbá bɛ nɛ bɛnɔɔ. 41 Tin, bɛtɛ nɛ bot naazɛdum koŋ nɛ Zɛɛb ɛbuɛpe, kɔ ɛsu ɛ mɛkpa mɛ Yezu. 42 Tin, bɛ ɛ́ boozɛke nɛ moma yenɔk náá: «É di mena kadi wak nenak’aak, bis ààpadum koŋ nɛ nɛ etɛɛ náá, wɔ nalɛɛ bis. Bis kamyaal ɛ́, etɛɛ náá, bis eegwak nɛ mɛlɔ mes met. Bis eegu náá, yɛ ɛ́ tsɛɛtsɛ náá, nyɛ ɛ́ Mɛtsik-bot kɔ bɔs.»

43 Bhii mɛlu mɛmbá menek, Yezu eezɛdus kɔ dɛl ɛ tak, nyɛ eezɛsik pɛ kyee dik Ghalile. 44 Nyɛ nadi esa deenek ɛ́, etɛɛ náá, nyɛy nyɛ ɛmet naalɛɛ náá: «Ngoolel-Mɛkpa ɛ Zɛɛb ààduwalaa kɔ dɛl ɛ nyɛ nabyel ɛ.» 45 Dáa nyɛ nakum pɛ Ghalile ɛ, bot ɛ kyee dik tak naabe nyɛ ɛnyɔɛpe, etɛɛ náá, bɛ naabee esa djas nyɛ nasa é ghɛŋ ɛbyoŋ ɛ pak pɛ Yeluzalɛm ɛ. Etɛɛ náá, bɔɔ pe naabaatɔ́ pɛ ɛbyoŋ ɛ tak.

46 Bhii tak, nyɛ eezɛsik pɛ ghaada Kana pɛ kyee dik Ghalile. Kana ɛ́ ghaada nyɛ naliig mɛdii moo mɛnyok ɛ. Pɛ ghaada Kapɛlnaum, ye nabɛ ɛ́ nɛ dhiiti boo kukuma lɔɔg esodja ɛ mɛkoozi. Mɔn’ɛ nadi ebɛ. 47 Nyɛ naagwak náá, ye nabɛ ɛ́, Yezu eezedus pɛ kyee dik Yude, tɔ́ pɛ Ghalile. Nyɛ eezɛtɔ́ pɛ daa lɛ, nyɛ eezɛdjaala nɛ nɛ náá: «Geka mɛ ghoŋ! Dha! Mɔn’am mɔɔ motom ɛpebɛ́ ɛkpaŋɛpe. Nyɛ moo ɛ́ pak ɛsyee nɛ tsik. Dha tsik nyɛ.» 48 Yezu eezɛbɔɔza nɛ nɛ náá: «Bi ɛ di ààbee endem e mɛbwala nɛ mɛvyɛkɛlɛ ɔɔ, bi aanàkwaadum koŋ nɛ nam!» 49 Kukuma tak eezɛke nɛ Yezu náá: «Ghɛŋ, lela ɛzyɛ pɛ daa lam ɛsok nɛ mɔn’am nɛ gwyɛ!» 50 Yezu eezɛke nɛ nɛ náá: «Sika pɛ ndjaŋ’ɔ, mɔn’ɔ eezetsak.» Tin, mot’enɔk eezɛmyaal sa Yezu nalɛɛ nyɛ ɛ. Nyɛ eezɛtɔ́.

51 Dáa nyɛ nadi, nyɛ dinaa é ze ɛ, wɔ gwaa bot ɛ mɛsa mɛ zɛboma nɛ nɛ, bɛ eezɛlɛɛ nyɛ náá: «Mɔn’ɔ ɛ́ nyel ɛnyɔɛpe nɛ tsik.» 52 Tin, nyɛ eezɛdji bot ɛ mɛsa mɛ náá: «Nyɛ tsak é yaa ɛwala?» Bɛ eezɛbɔɔza náá: «É ɛwala ɛsok, bhis ɛwala ɛ dwoo di etyaa tɔ gwoo ɛ, mɛkosa naasi nyɛ.» 53 Tin, kukuma tak eezɛgwyak náá, ye nabɛ ɛ́ é ɛwala Yezu nake nɛ nɛ náá: «Mɔn’ɔ ɛ́ nɛ tsik» ɛ. Tin, nyɛ eezɛdum koŋ nɛ Zɛɛb, bɛ nɛ bot ɛ mɛbyel mɛ djas.

54 Yenek nabɛ ɛ́ ndem mɛbwala yii esok ebá Yezu nasa, bhii nyɛ nadus kɔ kyee dik Yude tɔ́ pɛ kyee dik Ghalile ɛ.