1 EFalizyɛ nɛ eSaduseɛ naazyɛ pɛ daa Yezu étɛp ɛsaŋ ɛ ɛlóo ɛ nyɛ pɛ ɛko, da bwood nyɛ pɛ kyɛ. Bɛ eezɛke nɛ nɛ náá, nyɛ lyaal bɛ dhiiti ndem mɛbwala di edus pɛ tɔ gwoo ɛ. 2 Yezu ɛ́ boo kabulal bɛ dáak: «Dwoo ɛ sila ɔɔ, bi ke ɛ́ náá: "Yɛ aadi ɛ́, mbɛɛ dwoo, etɛɛ náá, gwoo moo ɛ́ tɔɔbelaa." 3 Kɛɛŋ tɔ mɛlem, bi dyeebake ɛ́: "Bhi ɛ́ waanee mos, etɛɛ náá, gwoo ɛ́ tɔɔbelaa." Bi ɛ́ nɛ ghwyil ɛsiiza ɛnyɔɛpe endem ee di tɔ gwoo ɔ, ghuna bi ààgu ɛbɛk membi mɛ endem di edhaa mɛlu mak ɛ. 4 Biyɔ, bot ɛ mɛlu mak, biyɔ bɛmbee ɛ bot, bot ɛ di ààbɛ sosoob é mis ɛ Zɛɛb ɔ, bi kasaŋ ɛ́ endem e mɛbwala. Yɛ aanàkwaadjɛaa bin dhiiti ndem, yɛ di ààbɛ yii nasael é ghɛŋ ɛ ngoolel Mɛkpa ɛ Zɛɛb Zonas ɛ.» Bhii tak, nyɛ eezɛbet bɛ, zɛtɔ́.

5 É di bɛdjekel nadhaa pɛ yii kyiid soob ɔ, bɛ eezɛdjisa ɛnɔŋ ɛ emapa. 6 Yezu ɛ́ boolɛɛ bɛ náá: «Dika nɛ etsoŋ, da bi ɛ́ kyee leviid e eFalizyɛ nɛ eSaduseɛ di nɛ yɛ ɛ.» 7 Bɛdjekel moo tin enyiiŋela pak’ɔɔ náá: «Nyɛ lii deenek ɛ́, etɛɛ náá, mena ààpanɔɔka emapa.» 8 Yezu eezɛgu sa bɛ nadi enyiiŋela ɛ. Nyɛ ɛ́ boozɛdji bɛ náá: «Étɛp yé bi di elii pak’en: Yɛ ɛ́ etɛɛ náá, mena tok nɛ mapa? Dhatyee ɛbwaalel ɛ len nɛ Zɛɛb di batsa ɛ! 9 Bi dinaa ààpamɛt ɛsuk, bi tok nɛ ghwyil ɛtaala emapa etɛn mɛ nakaa botom bɛmil ɛtɛn yɛ ɛ, dɔɔ nɛ bɛtɛ nɛ mɛbhwaa bi nabula nɛ yɛ ɛ? 10 Bi tok nɛ ghwyil ɛtaala emapa etɛn nɛ ebá mɛ nakaa bot bɛmil ɛná (4 000) yɛ ɛ, nɛ bɛtɛ nɛ bɛbhwaŋ ɛ bi nabula nɛ yɛ ɛ? 11 Étɛp yé bi di ààgu náá, mɛ bɛ ɛ́ ààlii nɛ nen étɛp emapa, é sok mɛ lii nɛ nen ɛ? Mɛ ke ɛ́ náá: "Kyeeka leviid e eFalizyɛ nɛ eSaduseɛ".»

12 É di tak, bɛdjekel eezɛgu náá, nyɛ nabɛ ɛ́ ààke náá, bɛ kyee leviid di ewaaa tɔ emapa ɛ. Ghuna ye nabɛ ɛ́ mɛlyo mɛ eFalizyɛ nɛ eSaduseɛ.

13 Yezu eezɛkum kɔ kyee bɔs Sezaale ɛ Filip. Nyɛ ɛ́ boozɛdji bɛdjekel bɛ náá: «Bot ke dáa dum nɛ Sɛɛŋɛlɛ Mɔn Mot?» 14 Bɛ eezɛbɔɔza nɛ nɛ náá: «Bɛdhiiti ke ɛ́ náá, wɔ ɛ́ Zaŋ Nduuel-bot, bak náá, wɔ ɛ́ Eli. Bɛdhiiti kabaake ɛ́ náá, wɔ ɛ́ Zeelemi nɛghu dhiiti ngoolel-Mɛkpa ɛ Zɛɛb.» 15 Yezu ɛ́ boozɛdji bɛ náá: «Haaa! Biyɔ, bi ke náá, mam ɛ́ zɛ?» 16 Tin, Simɔŋ Pyɛɛd zɛbɔɔza náá: «Wɔ ɛ́ Mɛsia, Mɔn ɛ Zɛɛb di nɛ tsik na kɔm-kɔm ɔ.» 17 Yezu ɛ́ boozɛke nɛ nɛ náá: «Mɛnyɔ nɛ nɔ, Simɔŋ mɔn ɛ Zaŋ, etɛɛ náá, ye tok mot epuud zetel wɔ yenek etsɛɛtsɛ, gua náá yɛ ɛ́ Saagam mot di tɔ gwoo ɔ. 18 Yɛ bɛ mam ɔɔ, mɛ ɛpelɛɛ wɔ, wɔy Pyɛɛd wɔ ɛ́ ɛkok, kɔ ɛkok ɛ tak, mɛ aasum zɛɛga mendjaala mam. Ɛsyee aanàkwaakwak yɛ. 19 Mɛ waaboodjɛ wɔ bɛsap ɛ ndjaa Ɛyoŋ ɛ di tɔ gwoo ɛ. Sa wɔ aalu kɔ bɔs ɛ, yɛ waaluel tɔ gwoo. Sa wɔ aadjɛ ze kɔ bɔs ɛ, ze ɛ́ waadjɛel tɔ gwoo.» 20 Bhii tak, Yezu eezɛlu bɛdjekel bɛ náá, sa bɛ ààlɛɛ mot náá, nyɛ ɛ́ Mɛsia.

21 É di’enek, Yezu moo zɛlɛɛ nɛ bɛdjekel bɛ náá: «Ye goka ɛ́ náá, mɛ tɔ́ pɛ Yeluzalɛm, étɛp mɛ neekɛzuk ɛbuɛpe é mɛmbɔ mɛ bɛpaa eYuda, bɛ nɛ eboo bɛghaa-Zɛɛb, zɛnɔɔ bɛghaŋ ɛ mɛkana mɛ etsi. Bɛ waagó mɛ, bhii mɛlu mɛlɛl, mɛ waagom.» 22 É di’enek, Pyɛɛd eezɛdul nyɛ é ngwoob bɛ nɛ nɛ bɛbá, nyɛ moo edul nyɛ mɛlo: «Zɛɛb baal wɔ, Ghɛŋ! Yenek aanàkwaakosael.» 23 É di’enek, Yezu eezɛbhɛm nyɛ. Nyɛ nɛ Pyɛɛd náá: «Dusa! Tɔ́a ɛtsetaɛpe nɛ nam, Satan! Wɔ ɛ́ ɛbɛk é ze yam, etɛɛ náá, esiiza bɔ tok esiiza e Zɛɛb. Yɛ ɛ́ yii bot ɛ epuud!»

24 Bhii tak, Yezu ɛ́ boozɛke nɛ bɛdjekel bɛ náá: «Yɛ bɛ náá, mot ɛpekwyɛl ɛdu mɛ ɔɔ, nyɛ kat ɛkwyɛɛg ɛ nyel’ɛ, nyɛ bɛp mɛlaaba mɛ, da nyɛ ɛ́ du mɛ. 25 Etɛɛ náá, mot di ekwyɛl ɛtsik ɛ nyel’ɔ ɔ, nyɛ waasu nyel’ɛ. Ghuna mot aasu nyel’ɛ étɛp’am ɔ, nyɛ waabela yɛ! 26 Yɛ ɛ́ tɛtɛ yé, wɔ bela mɛvu mɛ bɔs’ak djas, da wɔ ɛ́ su tsik na kɔm-kɔm? Yɛ ɛ́ nɛ dhiiti sa mot aadjɛ étɛp ɛbɔm ɛ tsik’ɛ? Mam ààbee! 27 Yɛ ɛ́ deenek ɛ́ Sɛɛŋɛlɛ Mɔn Mot aazyɛ tɔ duma Sɛɛg, bɛ nɛ efofop bɛ. É di’enek ɛ nyɛ aadjɛ mot nɛ mot efute mɛsa mɛ tyee nyɛ nadi ekɛ ɛ. 28 Mɛ lɛɛ bin ɛ́ etɛp e tsɛɛtsɛ náá, bɛdhiiti bot ɛ di wak ɔ, bɛ aanàkwaagwyɛ ɛsok nɛ bɛ nɛ bee Sɛɛŋɛlɛ Mɔn Mot ezyɛ tɔ Mɛkoozi mɛ.»