Lucas 19

Isusul Yini tu Ierusalem ca Amirã

28 Dupã tsi dzãsi aesti, Isusul s-nchisi nãintea a multsãmiljei cãtrã Ierusalem. 29 Cãndu s-apruche di Betafaghe sh-di Betania, ningã muntili numit a Masnjilor, pitricu doi di ucenitsilji a lui, 30 dzãcãnda: "Dutsets-vã tu hoara di-agnanghea sh-cãndu s-intrats, va aflats aclo un gumãric ligat, pri cai nitsiunu nu s-ari ncãlicat. Dizligats-lu sh-adutsets-lu aoa. 31 Macã vãrã va vã ntreabã: ‘Cãtse lu dizligats?’ apãndisits-lji: ‘Domnul ari ananghi di nãsu.’" 32 Atumtsea pitricutslji s-dusirã sh-lu aflarã ashã cum lã avea dzãsã Isusul. 33 Cãndu ma lu dizliga gumãriclu, nicuchirlji lji ntribarã: "Cãtse ma lu dizligats gumãriclu?" 34 Elji apãndisirã: "Domnul ari ananghi." 35 Atumtsea lu dusirã gumãriclu la Isusul sh-dupã tsi lj-arcarã prisupru a gumãriclui stranjili a lor, ncãlicarã pri nãsu Isusul. 36 Pri tutã calea oaminjlji ashtirnea stranjili a lor nãintea a lui. 37 Cãndu elu s-apruche tu calea tsi dipuni dit Muntili a Masnjilor, tutã multsãmea a ucenitsilor ahurhi s-alãvda Dumnidzãlu cu harauã sh-cu boatsi analtã trã tuti thavmatili puternici tsi avea vidzutã. 38 Elji dzãtsea: "Ghinicuvintat s-hibã amirãlu tsi yini tu numa a Domnului! Pace tu tser, sh-mãriri tu locurili atseli analti!"✝19:38 Ps 118:26. 39 Niscãntsã Farisei dit multsãmea lj-dzãsirã al Isus: "Nvitsãtore, vãrghea ucenitsilji a tãlji!" 40 Elu lã apãndisi: "Mini ma vã dzãc cã, macã aeshti va tãtsea, va aurla chetrili."