1 Kugon rinyi, Yeso ka zɨren hi ri nchon gbu, ran la bla tre dindi ri wa Kpanchi Izhi. Imiri ndu wan Wuru donhari wa ka he ri wu. 2 Ngha mba wa ri wa wa kpa wa chuwo ri meme bɨzhi nga ri meme lilo: Mariyamu riwa wa yowu ri Madalin riwa ibɨji tangban wa zhu rimi kpa wan. 3 Yonana wa Kuza, nga nji rinkon wa ndu riko Hirudus, Suzanatu, nga ngbɨron wari Mba wa nyi wa ran zon wa ri kya riwa wa he ri wu. 4 Riwa gbugbu nji wa ka kabru tu nga nji wa ka ran ye ri Yeso ri gbu ri gbu, ka la wa tre ikɨbu. 5 <<Nji ri ron ka hi riwa a ri chu iwɨlo kpi, wa ri wa joku ri nkon, wa ka chan wa, nga chenchen wa tan wa ri. 6 Wa ri wa joku ri tu han, nga wa riwa wa gbron, imbe mba ka huu ritu a ran fe bubu si ran. 7 Iwɨlo wa ri wa joku ri mi nchon, ka gbron riwu ran ima mbe mba to. 8 Nga iwɨlo wari wa joku rimi meme dindi. ka zhu ran de kɨlo, iso gbigba ri han kya riwa wa chu.>>

Riwa a tre nga nyi, ka yo, <<Riwa a he ton ri wo, no wo.>> 9 Miriko wan wa mɨyen ngye nye ikɨbu tre nyin a he 10 A tre, <<Ito kya riwa a he riri ri kpanchison Izhi wa ka no yi, ama wari me la wa ikɨbu ikɨbu ritu wa to, wari ran wo ama wa ran vu ngɨzhi ran.>

11 Ngye bibi kya riwa itre Ikɨbu kɨbu a he een: ikɨlo-a he tre Izhi. 12 Iwɨlo riwa wa joku ri nkon wa he wawa wa wo, nga meme nji ka ye ran ban tre mba ri sron mba, riwa ran kpa nyɨme wa ri kpa wa chuwo ran. 13 Riwa wa ku ri tu han wa he wawa wa kpa tre ri ngɨri ri tu wa wo, ama wawa wa ran he ri ŋjan ran. Wa kpa nyɨme ri vi ti wan, ama ri nde wa itsra ye wa ku joku. 14 Ikɨlo ri wa a joku ri nchon a he ri wa wa wo, ama ri wa wa hu nkon mba iya ri su kyawa wa ro ri gbungblu me ka nowa wana gbron ran. 15 Ama ikɨlo riwa a ku ri meme dindi a he riwa a he sron dindi, riwa wa wo tre Izhi, wari ngɨzhi wu, wa vu sron wa ri de iwɨlo dindi.

16 <<Njo ran yo wulu ran ka zi ri vaja nga ran ka zi ri za bubu kru ran ri ka zi ri bubu zi, ri wawa nye wa ri to kpan. 17 Ikya ri ran ri riri riwa wa ran tou ran, nga ikya riwa wa kau ti riwa wana bu wu zhu ri ra ran. 18 Mɨlan to bibi riwa wu sɨren ton. njo riwa a he wu wa no bran, njo ri wa a ran he wu ran, Ikya ri wa a he wu wa kpa ri wo wan.>>

19 Mba iyi Yeso nga vayi wan wa ka ye to, ama wa ran ye huehyureri wu ran ritu gbugbu nji. 20 Njo ka la wu, <<Iyi wen nga vayi wen wa he ra wawa wari to wu.>> 21 Ka la, iyi won nga vayi won wa he wawa wa wo tre Izhi wa ri tindu ri wu.

22 Chachu ri Yeso a gra rimi nvuima iwa miriko wan. A tre riwa, <<de ki hi ku gran nne.>> Waka wurunde hi ri gran riwan. 23 Wa rimi hi tse ngha ka vu. Ngungu ri iwo wulu ka ran ti, nghɨma mba kana wa ran sho ri ima hari waka he rimi sisiri.

24 Waka hi wari shɨme u, wari tre, <<Njiriko, Njiriko ki kuu!>>

Ka shɨme, ran yɨra ngha ri gungu nga sɨra wulu mba ngungu nga ima waka kullu, bubu ka he yoon. 25 Ka tre riwa, <<Ikpa nyɨme mbi he mme?>>Waka tsri wari wɨri kpa, wari tre ri kamba, <<Ngha nye nyi hari gungu nga ima wa wo doka wan? wawa ngawen wa wo-u.>>

26 Waka zhu ri meme Garasina riwa wa rugran nne zhu ri meme Galili 27 Riwa Yeso a gɨzhi ri nyu nne tse nji ri riwa a he ri bɨzhi ka zhu rimi gbu ran fe wu ri kon. A ban vi riwa a ran su tsro ran, nga a ran ran son iko ran, tse ri bubu riwa wa no nji yɨwi. 28 Riwa a to Yeso ran ban gro kpa, ran joku kusi wan, ran nzu ran ri,<< Ngye nye wu wa ri me, Yeso, Ivren Izhi riwa wa gbre wu? Me bre wu, ran nowen ya ran!>> 29 A tre nganyi don Yeso no zu shnji bɨzhi jio riwawu don ritu riwa ibɨji a ran vu bla vi, Wa ye waka lo-u yo ri tra. wa lou ri che ama ka su che, meme bɨzhi ka zu hi ji. 30 Yeso ka miyen-u ri,<< Inde wen he ngha?>> Ka tre,<<Tuli>>, Ritu ibɨji wa gra riwu kigbu. 31 Ibɨji wa ka bre wu bran ri no ran no wawa no wa ku ri bubu kuu ran. 32 To, ri bubu wan dushu wa ko waka kigbu wa ran ri ri ri benhen gashi, wa ka bre wu no kpa yɨme riwa nowa gra rimi mba ka kpa yɨme riwa. 33 Imba wa bɨzhi wa ka don wari gra rimi wa dushu wa ko-a gre ke wa dushu wa ko wa ka gre gra ban mi nne wari kuu. 34 Riwa imiri wa kɨshu dushu wa ko wato kya riwa a he, wari wurutsu, wari la tre-a ri wa nchon gbu ri tsitsa gbu. 35 Imba wanji waka zhu riwa wato kya riwa a ti. Riwa wa ye ri Yeso, wa ri ye fe nji riwa wa bɨzhi wa zhu rikpa wan, a son ri kusi Yeso, a su tsro, ituwan kae riri mba waka ti sisiri. 36 Wawa ikya nyi a he kusi mba, waka la wa bibi riwa wa zhu ri bɨzhi rikpa nji-a. 37 Nji wa meme Garasina wawu waka bre Yeso no kawawa don, ritu riwa sisiri a vu wa. Imba ka gra rimi nvuima ran bru hi ngawan.

38 Inji riwa ibɨji wa gra riwu-a, a bre wu no nowawu nkon riwa wawu ri hu nowa zɨren mba-u Ama ka kawu chuwo ran tre, 39 << Bru hiko, wuri la kpolo kyawa riwa Izhi ti riwu.>> Ka hi bla bubu tan rimi gbu la wa kyawa riwa Yeso a ti riwu.

40 Imba riwa Yeso a bru ye, nji waka tre wu ri ye, don wa ran gben ye wan. 41 Mba nji ri wana yo-u ri Yairus, nji rinkon ri tra Izhi, a ye ran joku kusi Yeso, ran bre wu no hi ko wan. 42 A he ri vruwa riri, riwa a he rise wuru don hari, a he ri nyu kuu.

Riwa Yeso a ran hi ngawan, ikpanji waka ran ima-u 43 Iwa ri riwa ise wan a he wuru don hari a ran zhu yi njo rimi mba ka ran ya no si ran. 44 A ju ri Yeso kugon ran bre wo ri nyu tsro wan, ri mba iyi- a ka kukiri.

45 Yeso ka tre,<< Nnga nye ibrewen wo? >> Riwa waka tɨron wawu mba, Bitrus ka tre,<< Iti ko, Ikpanji wa ran ima-u.>>

46 Ama Yeso ka tre,<< Njo ibrewen wo, ritu mi to gbengbren zhu ri kpa won.>>

47 Riwa Iwa-a a to kamba ran ri tuwan, ran chiwi hi ran gra wɨri kpa, ran ku kru kusi wan, a ju ri tuwan ri kusi gbunji ran la kya riwa wawu ibretsiro wan wo ri tu wan, ri bibi riwa a fe si. 48 Ka la wu ri,<< Ivɨra won ikpanyɨme wen a kpawu chuwo. Hi ri si kpa.>>

49 Riwa Yeso a he rimi tre, nji ri ka zhu ri ko nji riko Izhi ran tre,<< Ivira wen a kuu,>>Ran vu ya sro ŋnga ri nji ri tsro ran.>>

50 Ama riwa Yeso a wo kamba, ka nyɨme ran tre ri nji rinkon ri tra Izhi,<< Ran ti sisiri ran ikpanyɨme wen nkankshe, a ri fe si.>>

51 Riwa a gra ri ko-a a ran nyɨme no njo no gra ran, ka ra Bitrus ri Yohana, ri Yakuba, nga ti mba iyi vra. 52 Waka kamba ran ti shnji siron wari ran yi ritu wan. Ama Yeso ka tre, << Bi ka yi chuwo. Ivira-a a ran kuu ran, ari kruna.>>

53 Waka ran ndza Yeso, ritu wa to ri a kuu. 54 Ama Yeso ka vu wo vra ka nzu ran tre ri,<< Ivɨra won, wurunde.>> 55 Ivɨri wan ka bru ye, ka wurunde, ka lawa ri nowa no ri no ri. 56 Wa ti vra waka ti mamaki, ama Yeso ka lawa ri nowa ran la njo ran ikya riwa a ti.