1 Kɔlɛŋ 12

Mbyu mbʉə imɔʼ nə yəŋbə-i buŋmbi

12 Haʼ ndə mbyu mbʉə bɛ imɔʼ kə́ kie yəŋbə chɔ buŋmbi, mbʉ bəyəŋ buŋmbi chìi mbyu mbʉə imɔʼ, nɔ bɛ haʼ nɔ ndə mbʉə-Klai bɛ. 13 Yɔ̄ŋ-yə nɔ bɛ nɔ bʉʼka bʉʼʉ bənchəŋ nɔ kə fí ntɛ muu imɔʼ kə́ bɛ LyʉʉhəNyiikə. Bə chìi bʉʼʉ ndə məbɛ mbyu mbʉə imɔʼ, kə bʉʼʉ bɛ bʉə-Juu, kə bʉʼʉ gòʼ təmə bɛ bʉə-Juu fɛ, kə bʉʼʉ bɛ fʉəhə, kə bʉʼʉ gòʼ təmə bɛ fʉəhə fɛ, Nyii nɔʼ kɔ́ ntɛ-kəLyʉʉhə-hə imɔʼ tʉ bʉʼʉ ndə fɔkə ndə mənú ndə ɔ nɔʼ véʼ, bʉʼʉ nú.

14 Bʉʼka mbʉ mbʉə kie yəŋkə imɔʼ fɛ bɔŋ bɛ yəŋbə buŋmbi. 15 Kaʼ wukə ghɔ̀ŋ mbɔ, "Bʉʼka mbɔ mɔ kaa ghɔkə fɛ, mɔ leʼ kwú nukə baʼa mbʉ mbʉə fɛ," maa-yɔ̄ŋ məchìi ɔ, təmə ɔ leʼ bɛ yəŋ-mbʉ-mbʉə-kə fɛ. 16 Kaʼ tyunəkə ghɔ̀ŋ mbɔ, "Bʉʼka mɔ bɛ shʉ fɛ, mɔ kwú nukə baʼa mbʉ mbʉə fɛ," maa-yɔ̄ŋ məchìi ɔ təmə ɔ leʼ bɛ yəŋ-mbʉ-mbʉə-kə fɛ. 17 Kaʼ mbʉ ŋkwê mbʉə inchəŋ kʉ̌ʉ bɛ shʉ, təmə bə kə́ yʉ́ nukə təka? Kaʼ mbʉ ŋkwê mbʉə kʉ̌ʉ bɛ tyunəkə inchəŋ, təmə bəkɔ bə kə́ lùŋhə fɔkə təka?

18 Bɔŋ haʼ ndə nɔ, Nyii nɔ chyúunə yəŋkə təmiyɔŋ ndə mbʉ mbʉə haʼ ndə ɔ kʉ̀ʉ mbɔ i bɛ. 19 Kaʼ yəŋ-mbʉ-mbʉə-bə kʉ̌ʉ bɛ imɔʼ, təmə mbʉ ŋkwê mbʉə bɛ fa? 20 Bɔŋ ndə nɔ, yəŋ-mbʉə-bə nɔ bɛ buŋmbi bɔŋ bɛ mbyu mbʉə haʼ imɔʼ. 21 Shʉ mə ghɔ̀ŋ tʉ kwii mbɔ, "Mɔ kie nubɛʼkə ndə məchìi baʼa fɛ." Təmə tʉkə mə ghɔ̀ŋ tʉ wukə mbɔ, "Mɔ leʼ kie nubɛʼkə ndə məchìi baʼa fɛ."

22 Buŋ ndə bii tʉʼ leʼ nyíɛ nɔ, nɔ buŋ leʼ bɛ yəŋ-mbʉə-bə ndə i bɛ fi nə i lʉ́ʉtə, ndə mbʉə-woməsʉʉ mə fɔ̀ʼ təmə yɔŋ fɛ. 23 Yəŋ-mbʉə-bə ndə bʉʼʉ kwɔ̀ʼtə mbɔ i bɛ fɔkə fɛ, nɔ bɛ yəŋbə ndə bʉʼʉ tʉʼ kɔ́ kuŋhə chɔ yɔ́ŋyɔ́ŋ, yəŋbə ndə bə gòʼ təmə kie mə-kə́-nyíɛ fɛ, bʉʼʉ kɛŋ shʉ̀tə bɔ̀ŋ jyujyu, 24 ndə yəŋbə ndə bə tʉʼ nyíɛ mə dʉ̀ʼ mbɔ bə shʉ̀tə nɔ fɛ. Nyii bɔŋ chìi mbʉə, kɔ́ kuŋ-yɔ́ŋyɔ́ŋ-hə tʉ yəŋbə ndə bɔ̂ŋ gòʼ təmə kie kuŋhə fɛ. 25 Ɔ nɔ chìi nɔ bʉʼka ŋkʉʉŋkʉʉ mə bɛ ndə mbʉ mbʉə, mbɔ mbʉ bəyəŋ mbʉə chʉʼ kə́ lɛ́nə ŋwɔŋtə-ʉə ndyʉndyʉ. 26 Kaʼ mbyu kəyəŋ imɔʼ kə́ nyíɛ ŋgʉəʼ, bɔ̂ŋ bənchəŋ nyíɛ ŋgʉəʼ ntuo, kaʼ mbyu kəyəŋ imɔʼ kie məgʉ́ə, bɔ̂ŋ bənchəŋ kie tʉʉjyu ghɔŋbə maa-yīŋ.

27 Nduɔ, bii nɔ bɛ mbʉə-Klai, kə́ bɛ yəŋ-mbʉə-bə-i bəmɔʼbəmɔʼ.