1 Bə nɔʼ kɛŋ leʼ fʉ̀ʼtə shʉəŋ mbɔ bəsəŋ la bɛ mu bii, ntɛ bəsəŋ ndə bʉə ndə bɔ̂ŋ gòʼ təmə kə́ fàa Nyii fɛ buŋ bɛ́ŋ fɛ. Bə nɔ ghɔ̀ŋ mbɔ wobɛʼ mu bii la nɔʼ chí nə vi tie-e. 2 Bii bɔŋ lʉ̀ bə ndə nu-tʉʉ-gʉənə-kə! Bii kie ndə mə-kə́-gwíagwía fe? B̈ii fyúhə wo ndə ɔ chìi yɔ̄ŋ-yə ntɛ-kənu mu bii.

3 Mɔ buŋ gòʼ təmə bɛ bʉʼʉ mɔʼɔ nə mbʉə-ɔ fɛ nɔ, bɔŋ kə́ bɛ bʉʼʉ mɔʼɔ mu fyii-mɔ. Mɔ nɔʼ chʉ̀ə ŋkwɛ ntɛ wo-maa-ɔ̄ŋ fi nə bʉʼʉ bɛ mɔʼɔ. 4 Ndʉʉ ndə bii fə́nə nə chɔshi yie-Jiso Tiekətʉ nɔ bɔŋ ndə bʉʼʉ leʼ bɛ mɔʼɔ mu fyii-mɔ, nə ghʉəʼ-Jiso-Tiekətʉ-yʉʼʉ-kə, 5 b̈ii chɔ̀ʼhə wo-ghɔ̄, kɔ́ mu kəghɔ-Sata, ɔ̈ bʉ́əhə mbʉə-bʉ̂ʼʉ-e, mbɔ lyʉʉhəkə-i chʉʼ kie ŋkwaaNyii ndəŋ chî-Tiekətʉ-kə.

6 Məkwɛ̀ŋ fyiihə-ii te nukə-ɔ̄ŋ bʉ̀ʉ fɛ. Bii kínə mbɔ bʉ̂ʼʉ bɛ nə vaadyʉʼʉ-yî, ndə bə mɔ̀ʼ mu mbʉ̂ətə-bobo i tòʼ muŋgɔ inchəŋ fe? 7 B̈ii fyúhə nduɔŋ yî, ndə i bɛ məfyúhə wo-bʉ̂ʼʉ-ɔ̄ mu bii. Ndʉʉmɛ, bii bu bɛ nə mbʉ̂ətə-bobo-fefe, ndə bə kúu təmə mɔ̀ʼ yî chɔ fɛ, ndə bɛ fɔkə ndə bii kɛŋ bɛ yɔŋ, bʉʼka bə nɔʼ fɛ̀ʼndɛŋ nə Klai ndə bɛ Vaabinjyʉʉ-Yíɛʼsii-yʉʼʉ. 8 Ndʉʉmɛ, b̈ʉʼʉ yú mbʉ nchəŋtə, təmə yú nə bele ndə i kie nduɔŋ yî fɛ, ndə bɛ buuŋbʉə ghɔŋbə bʉ̂ʼʉ, b̈ʉʼʉ bɔŋ yú nə bele ndə i gòʼ təmə kie yî fɛ, ndə bɛ məbɛ tʉ́ʉnə ghɔŋbə shʉəŋ.

9 Mɔ nɔ kə nyɔ̀ʼ tʉ bii mu ŋwɔʼnə-ɔŋ mbɔ bii mə kə́ yúnə biibə bʉə ndə bɔ̂ŋ kɔ́ ŋwɔŋ-yʉə ndəŋ bʉ̂ʼʉ-bəsəŋ fɛ. 10 Mɔ tʉʼ te bʉə-gháa-bəsəŋ-kəwʉʉnəmbi-bɔ̄ŋ ndə bɔ̂ŋ gòʼ təmə kínə Nyii fɛ byuunɔ bʉəməntɔ ghɔŋbə bʉə kwò bəfɔ byuunɔ bʉə ndə bɔ̂ŋ tʉʼ gháa bənyii kədɔŋ fɛ. Kaʼ bɛ nɔ, bii kie ndə fyúhə ŋwɔŋ-yii hə mu kəwʉʉnəmbi-fɛ̄ŋ ndə məfyú mu bɔŋ. 11 Bɔŋ nduɔ, mɔ nɔ tʉʼ nyɔ̀ʼ tʉ bii mbɔ kə bii mə kə́ yúnə biibə wo ndə ɔ tʉʼ bɛ́ŋ yie-wo-Nyii, bɔŋ kə́ bɛ ŋghaa-bəsəŋ byuunɔ kə́ bɛ woməntɔ, byuunɔ kə́ gháa bənyii kədɔŋ, byuunɔ kə́ bʉ́əhə yie-bʉə, byuunɔ mbuuməndʉʼ, byuunɔ wo ndə ɔ tʉʼ kwò wo, kə bii mə buŋ yú fɔbə bii bɔŋ mɔʼɔ fɛ.

12 Mɔ kie ka baʼabə bʉə mbi ndə mə-kə́-chʉ̀ə ŋkwɛ-yʉə? Kaa bʉə ndə bɔ̂ŋ bɛ mu chɔshi ndə bii kie ndə məchʉ̀ə ŋkwɛ-yʉə fe? 13 Nɔ bu chʉ̀ə Nyii chʉ̀ə ŋkwɛ bʉə mbi. Ndə ŋwɔʼnə-Nyii ghɔ̀ŋ mbɔ, "B̈ii fyúhə wo-bʉ̂ʼʉ mu bii."