Atos 16

Bə fʉ̀əŋ Bɔɔ ghɔŋ Sila chaŋ

16 Chibɛʼkə, ndə baʼa kə́ gɛ̀ kəyəŋ gháaNyii, baʼa nyíɛ vaabəkebɛʼ ndə ɔ bɛ fʉə-wo tʉ ɔ nɔʼ jyʉ́ʉ mu lyʉʉhə-bəlʉʼʉ-nyii-kə, ɔ gwè tʉ baʼa. Ɔ kə́ fʉ́ʉ fê, kə́ kie kyʉə chɔ buŋmbi, kɔ́ tʉ bətiefɔʼɔ-bi. 17 Mbʉ vaabəke kə́ gwè hə bɔ̌ŋ baʼabə Bɔɔ kə́ tòʼ tíi ghɔ̀ŋ mbɔ, "Bʉə-bɔ̄ŋ nɔ bɛ vâafɔʼɔ-Nyii, Fɔŋ-Wokwɛʼtəŋ ndə bɔ̂ŋ gwè ndə mədʉ̀ʼ fia tʉ bii ndə məkie ŋkwaa."

18 Ɔ kə́ fɔ̀ʼ haʼ nɔ bəchibəchi, i chìi tʉʉ Bɔɔ byʉ́ʼ daa, ɔ kíahə sɔ́ʼ mbʉ kəlyʉʉhə-bəlʉʼʉ-nyii ghɔ̀ŋ mbɔ, "Mɔ nɔ kàhə a yie-Jiso Klai mbɔ ä fyú hə mbʉə-ɔ." Ɔ fyú haʼ ndʉʉghɔfii.

19 Ndʉʉ ndə bətiefɔʼɔ-bi nyíɛ mbɔ yəŋkə ndə bɔŋ kə́ yʉ́əʼnə chɔ ndə məkie sii nɔʼ mɔ̀ʼ bɔŋ sê, bɔ̂ŋ gwù ndəŋ Bɔɔ ghɔŋ Sila shyùu bɔŋ gɛ̀ nə bɔŋ vyii tʉ bʉəkwɛʼtəŋ. 20 Bɔ̂ŋ kʉ̂ʉ gɛ̀ nə bɔŋ tʉ bʉə chʉ̀ə fɛʼɛ ghɔ̀ŋ mbɔ, "Bʉə-Juu-bɔ̄ŋ nɔ tʉʼ byùutə mu kəyəŋkwɛʼtəŋ-yaʼ. 21 Bɔ̂ŋ nɔ tʉʼ dàhə nuʼ ndə i kʉ̀ʼnə tʉ baʼa bʉə-Luŋ ndə mətʉ́ʼ fɛ."

22 Mbʉ nuɔ-bʉə lɔ̀ hə sê bənchəŋ bɔ̌ŋ bɔŋ, mbʉ bʉə chʉ̀ə fɛʼɛ yá bɔŋ, jɔ̀ʼtə ndyihə-ʉə, téʼ mbɔ b̈ə la gwúu bɔŋ. 23 Ndʉʉ ndə bɔ̂ŋ gwúu bɔŋ nə ŋgwɔŋhə buŋmbi, bɔ̂ŋ tʉ́ʉhə bɔŋ kɔ́ mu njaa-chaŋ téʼ tʉ mbʉ wo ndə ɔ chyìi mbʉ njaa-chaŋ mbɔ ɔ̈ la kə́ chyìi bɔŋ jyujyu. 24 Ndʉʉ ndə ɔ̈ yʉ́ nubə-ɔ̄ŋ, ɔ lʉ̀ bɔŋ kɔ́ kɛŋ mu njəŋ-njaa-chaŋ-dɔdɔ, sʉ́ʉhə fʉəŋtə-ʉə mu koʼkə, fʉ̀əŋ.

25 I kʉ̂ʉ bɛ nə ndʉʉkwɔnəmbi, Bɔɔ ghɔŋ Sila kə́ gháaNyii bɔŋleʼ yùɔ lyuu lə̀ʼtə Nyii, bʉə mu njaa-chaŋ kə́ yʉ́ bɔŋ. 26 Kə kwɔnə nyíɛ, ŋkʉə-sê-kəyəŋ-ghɔ̄-kə ŋʉ̀ʼnə tə mbʉ njaa-chaŋ ŋʉ̀ʼnə hə ndə yiesê-e, haʼ ndʉʉmɛ, chusiitə yɔ̀ʼnə inchəŋ, bəchaŋ fyú hə təfʉəŋ-mbʉ-bʉə-njaa-chaŋ bənchəŋ gwùtə sê. 27 Mbʉ wo ndə ɔ̃ chyìi njaa-chaŋ kʉ̂ʉ gwùʼtə mbɛŋhə, nyíɛ chusiitə ighʉ́ʉnə, sʉ̀ʉ setəkə-i kə́ kʉ́ʉ shùɔ ŋwɔŋ-ɛŋ chɔ yí, kə́ kwɔ̀ʼtə mbɔ mbʉ bʉə-njaa-chaŋ la nɔʼ nyʉ́ʉtə nə wʉə. 28 Bɔŋ Bɔɔ tíi nə ghʉəʼkə ghɔ̀ŋ mbɔ, "Kə a mə lə́ŋhə ŋwɔŋ-aŋ fɛ, bʉʼka baʼa bənchəŋ nɔ bɛ fɛ̄ŋ."

29 Mbʉ wo chyìi njaa-chaŋ tíi mbɔ b̈ə chúʼ kɛʼɛ, ɔ nyʉ́ʉ gɛ̀ muŋgɔ nəndʉʉnəndʉʉ, kə́ gwònə gwù bəshʉ Bɔɔ ghɔŋ Sila. 30 Ɔ kʉ̂ʉ fyúhə bɔŋ mbi bíʼtə mbɔ, "Bətie-bɔŋ, bəkɔ mɔ chìi təka ndə məkie ŋkwaa?"

31 Bɔ̂ŋ ghɔ̀ŋ mbɔ, "Bɛ́ŋ Jiso Tiekətʉ, Nyii bu kwáa a, bii bənchinjaa-a." 32 Ndʉʉmɛ, bɔ̂ŋ kwə́ʼ ŋgie-Tiekətʉ-kə tʉ ɔŋ leʼnə nchinjaa-ɛ bənchəŋ. 33 Ɔ lʉ̀ bɔŋ haʼ ndʉʉghɔfii, gɛ̀ sʉ̀ dyʉʼbə-ʉə, ɔ fí muu ghɔŋbə nchinjaa-ɛ bənchəŋ. 34 Ɔ kʉ̂ʉ lʉ̀ bɔŋ gɛ̀ nə bɔŋ mu njaa-ɔ, gɛ̀ kɔ́ fɔyubə tʉ bɔŋ, tʉʉ-i kə́ bʉ̀ʉ ndə ɔ nɔʼ bɛ́ŋ Nyii ghɔŋbə nchinjaa-ɛ inchəŋ.

35 Kʉ̂ʉ bɛ ndʉʉsɛŋkə, mbʉ bʉə chʉ̀ə fɛʼɛ tə́ŋ bʉə-shia-kəfʉəŋ nə ntəŋ mbɔ, "Mɛ̀ʼtə bʉə-bīŋ b̈ɔ̂ŋ gɛ̀." 36 Mbʉ wo chyìi njaa-chaŋ gìe tʉ Bɔɔ mbɔ, "Bʉə chʉ̀ə fɛʼɛ nɔʼ tə́ŋ wo mbɔ m̈ɔ mɛ̀ʼtə bii, b̈ii gɛ̀. Nduɔ, b̈ii fyú gɛ̀, tòʼ jyu."

37 Bɔŋ Bɔɔ bə̀ŋhə mbɔ, "Bɔ̂ŋ nɔ kə gwúu baʼa ŋgwʉʉnə, gɛ̀ fʉ̀əŋ baʼa təmə nyíɛ mbɔ baʼa nɔʼ gwù fɛʼɛ fɛ. Baʼa kə́ bɛ bʉə-Luŋ, bɔ̂ŋ fʉ̀əŋ baʼa mu njaa-chaŋ. Nduɔ, bɔ̂ŋ kə́ kʉ́ʉ ndə məfyúhə baʼa bɔ̌ŋbɔ̌ŋ, baʼa mə bɛ́ŋ fɛ. B̈ɔ̂ŋ gwè nə mbəŋ-yʉə gwè fyúhə baʼa."

38 Ndʉʉ ndə mbʉ wo-shia-kəfʉəŋ gɛ̀ fʉ̀ʼtə yɔ̄ŋ-yə tʉ mbʉ bʉə chʉ̀ə fɛʼɛ, bɔ̂ŋ fàa ndʉʉ ndə bɔ̂ŋ yʉ́ mbɔ bɔ̂ŋ bɛ bʉə-Luŋ. 39 Bɔ̂ŋ gwè gwía fyùufyùu tʉ bɔŋ, fyúhə bɔŋ, gìe tʉ bɔŋ bìʼ gìe mbɔ bɔ̂ŋ fyú hə mbʉ mu kəyəŋkwɛʼtəŋ. 40 Bɔ̂ŋ fyú gɛ̀ mu njaa-Lidia, gɛ̀ bìatə bʉə ndə bɔ̂ŋ nɔʼ bɛ́ŋ Nyii chɔ, kwèʼhə bɔŋ ndəŋ nu-Nyii-bə buŋ fyú nə wʉə hə mu mbʉ kəyəŋkwɛʼtəŋ.