Fɔʼɔ 22

1 "Bətie-bɔŋ, bəliŋ-bɔŋ ghɔŋbə bʉə-Juu, b̈ii yʉ́ ndə mɔ bu túu chʉʼ-ɔ tʉ bii." 2 Ndʉʉ ndə bɔ̂ŋ yʉ́ ɔ kə́ kwə́ʼ tʉ bɔŋ bɛ kəŋgie bʉə-Juu, bɔ̂ŋ kɛŋ bìʼ líitə jyujyu. Ndʉʉmɛ, ɔ ghɔ̀ŋ tʉ bɔŋ mbɔ, 3 "Mɔ nɔ bɛ wo-Juu, bə bí mɔ Taashuʼ mu Silisia bɔŋ mɔ kʉ̀ʼ mu kəyəŋkwɛʼtəŋ-fɛ̄ŋ. Gamalia dàhə mɔ shʉ́əshʉ́ə nə nuʼ-bətie-bʉʼʉ, mɔ kɔ́ fyii-ɔ ndə məfɔ̀ʼ tʉ Nyii shʉ́əshʉ́ə haʼ ndə bii bɛ laa nɔ. 4 Mɔ chɔ́ŋhə Fia-Nyii-ɔ̄ŋ tə kɔ́ tʉ kwu, kə́ yátə bəke ghɔŋbə bələŋ, kɔ́ʼtə bɔŋ gɛ̀ kɔ́ chaŋ. 5 Bəkɔ tiefɛ̀ʼndɛŋkwɛʼtəŋNyii ghɔŋbə bəntəŋbəshʉ-bʉə-kaŋsotə bənchəŋ fʉ̀ʼtə nukə-ɔ̄ŋ. Mɔ nɔ nə fí ŋwɔʼnə kəghɔ-bɔŋ ndə məgɛ̀ nə yɔŋ tʉ bəliŋ-bʉʼʉ bʉə-Juu, gɛ̀ nə kwii Damasiko ndə məlʉ̀ bʉə ndə bɔ̂ŋ bɛ chɔ, kɔ́ʼtə kwiitə-ʉə gwè nə bɔŋ Jɛlosalɛŋ, bə kɔ́ ŋgʉəʼ tʉ bɔŋ.

6 "Ndə mɔ bɛ sêfia ndə məgɛ̀ Damasiko, nɔʼ gɛ̀ tə kə́ kə́ŋhə mbʉə ghɔ, kə́ bɛ nə ndʉʉbeʼ, leʼnə-shʉ́əshʉ́ə-kə kwɔnə báa hə yuo yə̀ŋhə mɔ. 7 Mɔ gwù sê yʉ́ gyʉʉ ndə i ghɔ̀ŋ tʉ mɔ mbɔ, ‘Sɔɔ, Sɔɔ, a tʉʼ chɔ́ŋhə mɔ mbuka?’

8 "Mɔ bə̀ŋhə mbɔ, ‘A buŋ bɛ nda lɔɔŋ, Tiekətʉ?’ Ɔ bə̀ŋhə tʉ mɔ mbɔ, ‘Mɔ nɔ bɛ Jiso ndə ɔ lɔ̀ hə Nasalɛ ndə a tʉʼ chɔ́ŋhə.’ 9 Bʉə ndə baʼa bɔŋ kə́ bɛ mɔʼɔ nyíɛ mbʉ kəleʼnə bɔŋ təmə kínə mbʉ gyʉʉ ndə i tʉʼ kwə́ʼ tʉ mɔ fɛ.

10 "Ndʉʉmɛ, mɔ bíʼtə mbɔ, ‘Bəkɔ mɔ bɛ təka, Tiekətʉ?’

"Mbʉ Tiekətʉ gìe tʉ mɔ mbɔ, ‘Lɔ̀ hə sê gɛ̀ mu Damasiko. A kʉ̂ʉ dàa chɔ nɔ, b̈ə shyíi a nə nubə inchəŋ ndə mɔ nɔʼ kə shʉ̀tə tʉ́ʼ tʉ a ndə məfɔ̀ʼ.’

11 "Nduɔ, bʉʼka mbʉ kəleʼnə shʉ́əshʉ́ə ndə i kə báa shʉmə-ɔŋ le, chìi təmə mɔ mə leʼ nyíɛ yəŋkə fɛ, bʉə ndə baʼa bɔŋ kə bɛ mɔʼɔ yá kwii-ɔ, gɛ̀ nə mɔ mu Damasiko. 12 Ananiabɛʼ nɔ kə bɛ chɔ, kə́ bɛ wo ndə ɔ nɔʼ kɔ́ ŋwɔŋ-ɛŋ ndə nuʼ-Mushi, bʉə-Juu ndə bɔ̂ŋ bɛ chɔ kə́ tíi yie-e jyujyu bənchəŋ. 13 Ɔ gwè tə́nə mbʉə mɔ ghɔ̀ŋ mbɔ, ‘L̈iŋ-ɔŋ Sɔɔ, bʉ̀nə kə́ nyíɛ yəŋkə.’ Haʼ ndʉʉghɔfii, mɔ nyíɛ yəŋkə, nyíɛ ɔŋ!

14 "Ɔ ghɔ̀ŋ mbɔ, ‘Nyii-bətietie-bʉʼʉ nɔʼ kə séʼ a mbɔ ä kínə ŋkʉʉnə tʉʉ-i bɔŋleʼ nyíɛ mbʉ Wo ndə ɔ bɛ Ndyʉndyʉ bɔŋleʼ yʉ́ ŋgiekə ndə i fyú hə chu-ɔ. 15 Bʉʼka a bu bɛ wo ndə a bu lɔ̀ ntəŋ-ɛŋ tʉ bʉə bənchəŋ te nubə ndə a yʉ́ kəghɔ-ɔ bɔŋleʼ nyíɛ. 16 A tʉʼ kʉ̀ʼ ka nduɔ? Lɔ̀ hə sê tə́nə, fí muu, bɔŋleʼ sʉ̀ bʉ̂ʼʉ-a ndə a tʉʼ tíi yie-Tiekətʉ.’

17 "Ndʉʉ ndə mɔ nɔʼ kə bʉ̀nə gɛ̀ Jɛlosalɛŋ, kʉ̂ʉ kə́ gháaNyii mu njaafɛ̀ʼndɛŋNyii, njəŋ chí mɔ təmə mɔ kə́ bɛ́ŋbɛ́ŋ fɛ. 18 Mɔ nyíɛ Tiekətʉ ɔ ghɔ̀ŋ tʉ mɔ mbɔ, ‘Lə̀ŋnə, chʉʼ fyú hə mu Jɛlosalɛŋ nəndʉʉnəndʉʉ bʉʼka bɔ̂ŋ kʉʉ bɛ́ŋ nubə ndə a tʉʼ kwə́ʼ tʉ bɔŋ te mɔ fɛ.’

19 "Mɔ bə̀ŋhə mbɔ, ‘Tiekətʉ, bɔ̂ŋ nə mbəŋtə-ʉə nɔ kínə mbɔ mɔ nɔ kə́ tòʼ lɔ̀ hə ndə njaagháaNyii imɔʼ dàa ndə ibɛʼ-yə kə́ tòʼ, yátə bʉə ndə bɔ̂ŋ bɛ́ŋ aŋ gwúutə bɔŋ bɔŋleʼ gɛ̀ fʉ̀əŋtə bɔŋ chaŋ. 20 Ndʉʉ ndə bə kə tyù fɔbʉə-Shitifɛ̄ŋ-kə, wo ndə ɔ kə́ lɔ̀ʼ yie-a, mɔ nə mbəŋ ɔŋ nɔ kə tə́nə mbʉə bɔŋ, kə́ kɔ́ viʼi mbɔ b̈ə yí ɔ bɔŋ-kə́-leʼ chyìi ndyi-bʉə-hə ndə bɔ̂ŋ kə́ yí ɔ.

21 "Ɔ ghɔ̀ŋ tʉ mɔ mbɔ, ‘Gɛ̀, bʉʼka mɔ bu tə́ŋ aŋ kɛŋ dɔdɔ tʉ bʉə ndə bɔ̂ŋ gòʼ təmə bɛ bʉə-Juu fɛ.’"

22 Bɔ̂ŋ kɔ́ tyunəbə-ʉə tʉ ɔŋ ndə məyʉ́ kwəʼ-ɛ, bɔŋ ndə ɔ dàa ndəŋ yɔ̄ŋ-yə mbyu kənu, bɔ̂ŋ chɔ̀ʼhə gyʉʉhə-ʉə ghɔʼ ghɔ̀ŋ mbɔ, "B̈ii lɔ̀ nə fɔ-maa-kə-ɔ̄ŋ hə kəwʉʉnəmbi bʉʼka ɔ kʉ̀ʼnə wo ɔ kə́ chí kəwʉʉnəmbi fɛ." 23 Bɔ̂ŋ kə́ tíitə shùɔ ndyi-fəʼə-hə-ʉə mɛ̀ʼ, kə́ leʼ yʉ̀ʼ bʉəkə yuo.

Bɔɔ kɛ̀ʼ ŋwɔŋ-ɛŋ mbɔ ɔ la bɛ wo Luŋ

24 Mbʉ ntəŋbəshʉ-bʉəkwɛʼtəŋ-bəsɔge kàhə mbɔ b̈ə gwè nə nɔŋ mu njaa-bəsɔge, bə gwúu ɔ, ɔ chʉʼ kɛ̀ʼ nubə ndə i chìi nuɔ-bʉə kə́ tíitə kətʉ-ɔ. 25 Bɔŋ ndʉʉ ndə bə kə shyìi ɔ ndə məgwúu, Bɔɔ bíʼtə tʉ wokwɛʼtəŋ-bəsɔge ghyʉʉ ndə ɔ kə tə́nə mbʉə ɔ mbɔ, "Nuʼ bɛ́ŋ mbɔ ä gwúu wo-Luŋ təmə nɔʼ kwɛ̀ fɛʼɛ-ɛ, ɔ gwù fɛ mɛ?"

26 Ndʉʉ ndə mbʉ wokwɛʼtəŋ-bəsɔge yʉ́ yɔ̄ŋ-yə, ɔ gɛ̀ mbʉə ntəŋbəshʉ-bʉəkwɛʼtəŋ-bəsɔge, gìe tʉ ɔŋ mbɔ, "A tʉʼ kʉ́ʉ chìi ka nɔ? Bʉʼka wo-ɔ̄ nɔ bɛ wo-Luŋ!"

27 Ndʉʉmɛ, mbʉ ntəŋbəshʉ gwè ghɔ̀ŋ tʉ Bɔɔ mbɔ, "Shyíi mɔ, a bɛ wo-Luŋ la?"

Ɔ ghɔ̀ŋ mbɔ, "Ɔŋ."

28 Mbʉ ntəŋbəshʉ-bʉəkwɛʼtəŋ-bəsɔge bə̀ŋhə mbɔ, "Mɔ nɔ nyúɔ ndə məbɛ wo-lɔʼɔ-ɔ̄ nə kyʉə yɔ́ŋyɔ́ŋ."

Bɔŋ Bɔɔ bə̀ŋhə mbɔ, "Mɔ nɔ bɛ wo-lɔʼɔ-ɔ̄ lʉ̀ hə vaambuɔ."

29 Ndʉʉmɛ, bʉə ndə bɔ̂ŋ kə́ kʉ́ʉ tyúutə ɔŋ shùʼtə gɛ̀ bɔ̌ŋbɔ̌ŋ, mbʉ ntəŋbəshʉ-bʉəkwɛʼtəŋ-bəsɔge fàa ghɔ ndʉʉ ndə ɔ kə chèʼnə mbɔ Bɔɔ bɛ vaa-Luŋ ndə ɔ nɔʼ kɔ́ʼtə ɔŋ.

Bə lʉ̀ Bɔɔ gɛ̀ nə nɔŋ mu kaŋsotəkwɛʼtəŋ

30 Mbi kʉ̂ʉ sɛŋ fíi, ɔ kə́ kʉ́ʉ ndə məkínə ŋkɛŋ luu ndə bʉə-Juu kə́ tíitə kətʉ-ɔ. Ɔ yɔ̀ʼtə ɔŋ, kàhə bətiefɛ̀ʼndɛŋNyii ghɔŋbə bʉə mu kaŋsotəkwɛʼtəŋ bənchəŋ mbɔ bɔ̂ŋ chə̀ŋtə, ndʉʉmɛ ɔ gwè nə Bɔɔ, tʉ́ʼ bəshʉ bɔŋ.