Fɔʼɔ 5

Anania ghɔŋ Safelia

1 Bɔŋ wobɛʼ ghɔ, yie-e kə́ bɛ Anania ghɔŋ vi-i Safelia, fɛ̀ŋ ibɛʼ-yə tɔ̂kə-ʉə, 2 ɔ sáa via-kyʉə-kə lə̀ŋ vi kə́ kínə, gwè nə viakə gwè mɔ̀ʼ bəshʉ mbʉ bəlɔntəŋNyii.

3 Ndʉʉmɛ, Bita ghɔ̀ŋ tʉ ɔŋ mbɔ, "Anania, chìi ka a mɛ̀ʼtə ŋwɔŋ-aŋ tʉ Sata, ɔ jyʉ́ʉhə a? A chʉ̀ə lɛɛŋkə tʉ LyʉʉhəNyiikə, lə̀ŋ bəʼ-kyʉə-kətɔ̂-kə-a tʉ ŋwɔŋ-aŋ. 4 Mbʉ kətɔ̂ nɔ kə bɛ ya-yə a buŋ fɛ̀ŋ, ndʉʉ ndə a kə fɛ̀ŋ mbʉ kyʉə kə́ bɛ ya-yə. Chìi ka a séʼ mu fyii-a ndə məchìi ntɛ-kənu-ɔ̄ŋ? A chʉ̀ə lɛɛŋkə bə tʉ woməsʉʉ fɛ, a nɔ chʉ̀ə tʉ Nyii."

5 Ndʉʉ ndə Anania kə yʉ́ yɔ̄ŋ-yə, ɔ chóʼnə gwù sê kwú. Wotəmiyɔŋ ndə ɔ̈ yʉ́ nukə-ɔ̄ŋ, faa-kwu-kə yá ɔ. 6 Vâa-kəyɔwo-bələŋ-bɛʼbə lɔ̀ hə sê gɛ̀ lʉ́əŋtə ɔŋ mu ndyi, bɛ̀ʼ ɔ gɛ̀ tyúu.

7 Ŋgwɔʼmbi kʉ̂ʉ tíŋ tə kə́ gɛ̀ ndə bəchî itia, vi-i gwè sʉ́ʉ mu njaa, təmə kínə nukə ndə i nɔʼ tíŋ fɛ. 8 Bita bíʼtə tʉ ɔŋ mbɔ, "Bɛ haʼ chuɔŋ nɔ ndə bii ləŋ-aŋ kə fɛ̀ŋ tɔ̂kə chɔ mɛ?"

Ɔ bɛ́ŋ mbɔ, "Əŋ, nɔ bɛ haʼ yɔŋ-yə."

9 Bita ghɔ̀ŋ mbɔ, "Chìi ka bii bəbûu shyʉ̀ʉ gyʉʉ ndə məmùutə LyʉʉhəTiekətʉkə? Lɛ́nə mbi nyíɛ, vâakəyɔwo bələŋ le ndə bɔ̂ŋ gɛ̀ tyúu ləŋ-aŋ, bɔ̂ŋ bu bɛ̀ʼ a haʼ ghɔ nɔ gɛ̀ tyúu."

10 Haʼ ndʉʉghɔfii, ɔ gwù sê bəshʉ ɔ, kwú. Ndʉʉ ndə mbʉ vâakəyɔwo bələŋ gwè nyíɛ ndə ɔ nɔʼ kwú, bɔ̂ŋ bɛ̀ʼ ɔ fyú gɛ̀ tyúu mbʉə ləŋ-ɛŋ. 11 Faa-kwu-shʉ́əshʉ́ə-kə yá bʉə-chɔshi bənchəŋ leʼnə bʉə bənchəŋ ndə bɔ̂ŋ yʉ́ nubə-ɔ̄ŋ.

Mbʉ bəlɔntəŋNyii chʉ́ʼ bʉə buŋmbi

12 Mbʉ bəlɔntəŋNyii kə́ chìi fɔŋ-bəcheʼ leʼnə nuchíechubə mu mbʉ bʉə. Bʉə ndə bɔ̂ŋ nɔʼ bɛ́ŋ Nyii kə́ chʉʼ fə́nə bìʼ fə́nə mu sêfu-njaafɛ̀ʼndɛŋNyii kəyəŋ ndə bə kə́ tíi nə Chu-Kənjuuhə-Salamu. 13 Təmə wo ndə ɔ gòʼ təmə bɛ nuɔ-yʉə fɛ leʼnə mùutə ndə məbìa bɔŋ fɛ, bɔŋ bʉə kə́ kɔ́ kuŋhə tʉ bɔŋ yɔ́ŋyɔ́ŋ daa. 14 Buŋmbi bʉə ndə bɔ̂ŋ nɔʼ bɛ́ŋ Tiekətʉ, bəke ghɔŋbə bələŋ, kə́ bìʼ nuɔ bɔŋ. 15 Bʉʼka fɔʼɔ-mbʉ-bəlɔntəŋNyii, bə kə́ bɛ̀ʼ bʉə-bəyɔʼ ndəŋ bɔbə ghɔŋbə bəmata, gwè mɔ̀ʼtə bəmbia fia mbɔ Bita kə́ tíŋ nɔ, l̈yʉʉhəkə-i tíŋ hə ndəŋ bɔŋ, bɔ̂ŋ chʉʼ kie nchʉʼ. 16 Nuɔ-bʉə-tə kə́ gwè hə mu lɔʼ-bətə̂ŋ-tə mbʉə Jɛlosalɛŋ, kə́ gwè nə bʉə-bəyɔʼ-bʉə ghɔŋbə bʉə ndə lyʉʉhəbʉəbʉəbə kə́ chɔ́ŋhə bɔŋ, bɔ̂ŋ bənchəŋ kie nchʉʼ.

Bə yátə bəlɔntəŋNyii bʉ̀nə yɔ̀ʼ ghɔkə ndəŋ bɔŋ

17 Ndʉʉmɛ, mbʉ tiefɛ̀ʼndɛŋkwɛʼtəŋNyii lɔ̀ hə sê ghɔŋbə bʉə ndə ghɔŋ bɔŋ kə bɛ mɔʼɔ (bə kə́ tíi bɔŋ nə bʉə-Sadusi), bɔ̂ŋ kə́ bɛ nə ŋkwɔʼtə bəfyuʼ te mbʉ bəlɔntəŋNyii. 18 Bɔ̂ŋ yátə mbʉ bəlɔntəŋNyii fʉ̀əŋtə bɔŋ mu njaa-chaŋ-gɔməna. 19 Bɔŋ bətyuʼ-ghɔ̄, wontəŋTiekətʉ ŋɔ́ʼhə chusii-njaa-chaŋ-ghɔ̄ fyúhə bɔŋ, gìe tʉ bɔŋ mbɔ, 20 "B̈ii gɛ̀ mu chunjaafɛ̀ʼndɛŋNyii, gɛ̀ shyíi bʉə nə ntəŋ-məchimbi-ɔ̄ inchəŋ." 21 Ndʉʉ ndə mbʉ bəlɔntəŋNyii kə yʉ́ yɔ̄ŋ-yə, kʉ̂ʉ bɛ ndʉʉsɛŋkə bətyuʼbətyuʼ, bɔ̂ŋ ŋíi mu chunjaafɛ̀ʼndɛŋNyii chʉ́ʉhə kə́ dàhə.

Ndʉʉ ndə mbʉ tiefɛ̀ʼndɛŋkwɛʼtəŋNyii ghɔŋbə bəbɛʼbə kuŋhə kə chə̀ŋtə, bɔ̂ŋ chʉ́ʉhə kaŋsotəkwɛʼtəŋ ghɔŋbə bʉəkwɛʼtəŋ-Isilɛ bənchəŋ. Bɔ̂ŋ tə́ŋ ntəŋ mu njaa-chaŋ mbɔ b̈ə gwè nə mbʉ bəlɔntəŋNyii mu njaafɛ̀ʼ. 22 Bɔŋ ndʉʉ ndə mbʉ bənchyii-njaafɛ̀ʼndɛŋNyii gɛ̀ dàa chɔ, təmə nyíɛ bɔŋ fɛ. Bɔ̂ŋ bʉ̀nə gwè fʉ̀ʼtə mu mbʉ kaŋsotə mbɔ, 23 "Baʼa gɛ̀ dàa le, nyíɛ chusii-njaa-chaŋ ifʉ̀əŋnə, bʉə chyìinə kə́ tə́ŋtə mbʉə ghɔ, bɔŋ baʼa kʉ̂ʉ chóʼ chusii sʉ́ʉ muŋgɔ, təmə nyíɛ wo fɛ."

24 Ndʉʉ ndə wokwɛʼtəŋ bənchyii mu njaafɛ̀ʼndɛŋNyii leʼnə bətiefɛ̀ʼndɛŋNyii kə yʉ́ nukə-ɔ̄ŋ, i chɔ́ŋhə bɔŋ, bɔ̂ŋ kə́ kwɔ̀ʼtə ntɛ ndə i bu yi liʼ. 25 Ndʉʉmɛ, wobɛʼ gwè nə ntəŋ mbɔ, "B̈ii yʉ́! Bʉə-bīŋ ndə bii kə fʉ̀əŋ bɔŋ mu njaa-chaŋ le, tə́nə nɔ mu chunjaafɛ̀ʼndɛŋNyii kə́ dàhə bʉə."

26 Mbʉ wokwɛʼtəŋ-bənchyii-njaafɛ̀ʼndɛŋNyii ghɔŋbə bʉə-bi ndə bɔ̂ŋ kə́ chyìi njaafɛ̀ʼndɛŋNyii gɛ̀ lʉ̀ bɔŋ gwè nə bɔŋ buɔbuɔ, kə́ fàa mbɔ bʉə bu túŋtə bɔŋ yi, kaʼ bɔ̂ŋ chìi nukə tə lə́ŋhə mbʉ bəlɔntəŋNyii. 27 Bɔ̂ŋ gwè nə bɔŋ, bɔ̂ŋ tə́nə bəshʉ mbʉ bʉə-kaŋsotə, mbʉ Tiefɛ̀ʼndɛŋkwɛʼtəŋNyii bíʼtə mbɔ, 28 "Baʼa chʉʼ shyùu tyunəkə-ii mbɔ bii mə leʼnə dàhə yie wo-ɔ̄ fe? Bɔŋ nyíɛ! Bii nɔʼ buŋ leʼ wɔ̀ʼhə mu Jɛlosalɛŋ nə nubə ndə bii tʉʼ dàhə te yie-Jiso, kə́ mɔ̀ʼ bə liɛŋ-baʼa mbɔ la yi baʼa yí ɔ!"

29 Bɔŋ Bita ghɔŋbə bəbɛʼbə bəlɔntəŋNyii bə̀ŋhə mbɔ, "Baʼa nɔ kie ndə məyʉ́ chu-Nyii kaa mə yʉ́ chu-woməsʉʉ fɛ. 30 Nyii bətietie-baʼa nɔ nə bʉ̀nə kóʼhə Jiso, ndə bii kə kwɛ̀ŋ ɔŋ ndəŋ tyʉntɔɔnəkə yi, 31 dùʼhə ɔŋ ndəŋ yəŋ-məgʉ́ə-kə nə Vaa-fɔŋkwɛʼtəŋ, ɔ bɔŋleʼ kə́ bɛ Ŋkwaa. Ɔ nɔ chìi yɔ̄ŋ-yə mbɔ Isilɛ chʉʼ kie fia ndə məshìe liɛŋ ndəŋ bʉ̂ʼtə-ʉə bʉ̀nə gwè tʉ Nyii, ɔ chʉʼ sʉ̀fyii hə ndəŋ bʉ̂ʼtə-ʉə. 32 Nubə-ɔ̄ŋ nɔ mì shʉ bʉʼʉ, bʉʼʉbə LyʉʉhəNyiikə, ndə Nyii kɔ́ tʉ bʉə ndə bɔ̂ŋ tʉʼ yʉ́ chu-i."

33 Ndʉʉ ndə bɔ̂ŋ yʉ́ yɔ̄ŋ-yə, i shùɔ bɔŋ fyii-bɔŋ, bɔ̂ŋ shyʉ̀ʉ gyʉʉ ndə məyí bɔŋ. 34 Bɔŋ mbyu wobɛʼ mu bɔŋ, bə kə́ tíi ɔ nə Gamalia, kə́ bɛ wo-Falasi, bɔŋleʼ kə́ bɛ wo dàhə nuʼ-Mushi, ndə bʉə buŋmbi fàa ɔ, lɔ̀ hə sê tə́nə kàhə mbɔ b̈ə la fyúhə mbʉ bəlɔntəŋNyii hə mu kaŋsotə b̈ɔ̂ŋ kwìhə mbi məniʼ. 35 Ndʉʉmɛ, ɔ kwə́ʼ tʉ mbʉ bʉə mu kaŋsotə-ghɔ̄ mbɔ, "Bətie-bɔŋ, bʉə-Isilɛ, b̈ii láa, nukə ndə bii tʉʼ shʉ̀tə ndə məchìi nə bʉə-bɔ̄ŋ! 36 B̈ii kə́ kwɛ́nə mbɔ wobɛʼ nɔ nə kwɔnə fyú tə́nə, bə kə́ tíi ɔ nə Tioda, kə́ làhə shʉ bʉə mbɔ ɔ la bɛ wokwɛʼtəŋ. Bʉə bìa ɔ tə kə́ gɛ̀ nə təghyʉʉ kwi, bɔŋ bə kʉ̂ʉ leʼ yí ɔ, bʉə nuɔ-bi wɔ̀ʼnə bəmɔʼbəmɔʼ, fɔʼɔ-ɛ mì njʉnjʉ. 37 Ibɛʼ-yə wo bìʼ fyú gwè hə bɔ̌ŋ ɔŋ, bə kə́ tíi ɔ nə Juda, ɔ lɔ̀ hə Galili ndəŋ ŋgʉʼʉmbi ndə bə nə kə́ súu bʉə chɔ. Ɔ ghɔ́ŋ bʉə kɔ́ hə bɔ̌ŋ ɔŋ, bə kʉ̂ʉ leʼ yí ɔ ghɔ, bʉə nuɔ-bi nyʉ́ʉ wɔ̀ʼnə bəmɔʼbəmɔʼ.

38 "Nduɔ, yɔŋ-yə tʉ̂ʼ nɔ bɛ mbɔ kə bii mə chìi nukə nə bʉə-bɔ̄ŋ fɛ, b̈ii mɛ̀ʼtə bʉə-bɔŋ chɔ. Kaʼ nubə ndə bɔ̂ŋ tʉʼ dàhə bɔŋleʼ kə́ fɔ̀ʼ, gwè hə ndəŋ ŋkwɔʼtə-woməsʉʉ təmə i tʉʼ gwè mìmì njʉnjʉ. 39 Bɔŋ kaʼ bɛ nu-Nyii-kə təmə bii mə chíe fɛ. Ndʉʉbɛʼ bii buŋ kə́ gwúu byuʼu bə biibə Nyii."

40 Mbʉ bʉə-kaŋsotəkwɛʼtəŋ bɛ́ŋ tʉ̂ʼ-e, tíi mbʉ bəlɔntəŋNyii mu njaa, gwúu bɔŋ. Ndʉʉmɛ, bɔ̂ŋ kàhə bɔŋ mbɔ bɔ̂ŋ mə leʼnə kwə́ʼ te yie-Jiso fɛ, yɔ̀ʼ ghɔkə ndəŋ bɔŋ, bɔ̂ŋ gɛ̀. 41 Bɔŋ mbʉ bəlɔntəŋNyii fyú hə mu mbʉ kaŋsotə nə tʉʉjyu bʉʼka mbɔ Nyii la nyíɛ bɔŋ, bɔ̂ŋ kʉ̀ʼnə ndə bʉə ndə bəkɔ bɔ̂ŋ nyíɛ ŋgʉəʼ bɔŋleʼ fí tʉvyiikə yie-Jiso. 42 Bɔ̂ŋ kə́ lɔ̀ʼ ntəŋjyujyu bɔŋ-kə́-leʼ dàhə bəchibəchi mu chunjaafɛ̀ʼndɛŋNyii leʼnə mu njaa-bʉə-hə mbɔ, "Wo ndə Nyii Kùŋ Tə́ŋ, ndə bii tʉʼ kʉ́ʉ le, nɔ bɛ Jiso."