1 In di, Kitsamang e ni nyeseng ashon hom naton Ihwyanang aSihiyona, banet agup anakat azining ni nsɔk nnaas na anaas (144,000) kin se gung ni wu. Ba kin jɛk iyerek wu, ni ifɛ́ Ada wu na natii bá. 2 In fok iwɔng ne azanɛn ti ifɛ́ ashi fɛ́ a tisik kpool, ti itasak íza. Iwɔng fin in fok e, se ti ifɛ́ anet fɛ́ a tsin kpereng izóm. 3 Ba ra abom afas ashon kuta igwɔm, nɛ ashon nkyɔrɔk ntset nnaas e nɛ ashon bashɔn e. Vit akak fɛ́ a kyɛm a mees abom e, tit banet agup anakat azining ni nsɔk nnaas na anaas e (144,000) fɛ́ ba mi sɛ isheshek azatse. 4 Ba bang wu, ba bereng ace bá cɛ́l, ba ki mang beseng nrɔm bá na banyining awo. Ba kuus Kitsamang e sak na kaakyɛ arɔ fɛ́ a di tses. Ba bang mi sɛ isheshek ayɛɛt banet azatse, ba mi sot inɔɔk kunang itusung nayak imɛsɛng sak na Adakunom ni Kitsamang e. 5 Vit mbɔɔs fɛ́ ba sɛ nanu bá, ba ka sɛ vit inɛn.

6 Wat in di atomaza akak na tsin teng naton aza, a bi ifɛ̀ fi i se ayɛ na ayɛ, fɛ́ a da shara na banet fɛ́ ba se azatse, na kaakyi mben, ni ícɛ́n, ni ilem, ni izɔrɔk. 7 A fɛrɛng ni kutɔ kuratek ye, <<Fok yin nnyim Adakunom, ni ku nesek yin iratek, nek izen ishɔt wu mi bɛ́. Ya yin ntong, sak na ayɔng fɛ́ a nye kazanɛn e, nɛ kazatse, ni izɛk, nɛ ákang.>>

8 Atomaza afɛ́ afaa me, di kuus afi mɛsɛng e, a fɛ́ ye, <<A mi kpa! Agbat iwɔp aBabila mi kpa, iwu fɛ́ a sak ngma mben azatse sɔ ashi anap iririm wu, afi kujang wu.>>

9 Atomaza afɛ́ ataat e, ka ba kuus mo, a fɛrɛng ni kutɔ kuratek fok, <<Ngma ayɔng fɛ́ a ya kunyam e ntong, nɛ kubannom fɛ́ ba nok tɛ nawu ko, a shan alamba ko natii wu, ke ni bɔk wu, 10 iwu ma a bi sɔ ashi anap naman Adakunom, kuyɔng fɛ́ ba mi korok nyif ne agap karidɛ naman wu. A bi sɔ izot ayɛɛt asɛng aca-rong ashon batomaza ba jɛrɛ, ni Kitsamang e. 11 Atseng-iron izot bà, ngarak ayɛ nɛ ayɛ. Vit ifɔɔn katuk ni kunom, sak na bayɔng fɛ́ ba ya ntong sak ni kukyɛng ashi me, ni kubannom fi ba nok na nawu ko, ke a shan alamba iyerek ko.>> 12 Ideng shim banet Adakunom na ba sot na kabɔk, ni ifoos ifɛ̀ wu, ni inyeseng gbak ayɛɛt atsak na aYeso.

13 In ti in fok kutɔ ne na azanɛn ye, <<Jɛk! Awɛng se gung na bayɔng fɛ́ ba kus nek ba yet bafɛ́ aTisa, azeng yɔkɔnɔng sak ashon.>> Kabik Adakunom fɛ̀, <<Ey! Ba bi fɔn ni mgbang bá, nek ba bi te burum ntomong ntek bá awo.>>

14 Fi in se ni iyɛrɛ, in di anɔk akan, nɛ akak sonong naton anɔk e, <<Tɛ Arim Anet>>, na abong igwɔm kutsɔm kuseng ni ice wu, ni kuvotot kukot ni bɔk wu. 15 Wat atomaza akak ne narɔ iya Adakunom ntong e, a yes ayɔng fɛ́ a sonong na anɔk e ni kutɔ kuratek, a fɛ́, <<Sok kuvotot kukot ngɔn, di tusung nayak e, nek izen itusung nayak e mi nye, nek nayak azatse mi been.>> 16 Wat ayɔng fɛ́ a sonong naton anɔk e, a ziming kuvotot kukot wu naton kazatse, a tusung kuyak azatse me.

17 Atomaza me akak ne narɔ iya Adakunom ntong azanɛn, iwu bɛ̀ kuvotot kukot e bà. 18 Ama anɔng, atomaza akak, fɛ́ a bi ice naton kurong, a ne ni kuta ashosh e, a yes atomaza fɛ́ a bereng kuvotot kukot e, ni kutɔ kuratek fok, <<Sok kuvotot kukot ngɔn, di tusung ice ica anap azatse, nek a mi ben.>> 19 Atomaza me a ziming kuvotot kukot wu me na azatse, a tusung ace anap e, a bara ina ni bong ifarang e, fi i tonong naman Adakunom. 20 Ba shesh ide narɔ fɛ́ ba di farang ica anap ama iwɔp, nasok fɛ́ na nes ni bong e, kuzamang e bi se bakat karɔ fɛ́ ba di tes iguk itsaap, kuyikyik e bi se bakat amile anakat afaa.