Nabos Abik AYohana 20

Ayɛ agup azining afi iya igwɔm aYeso

1 In di atomaza akak na tsin tisik, a ne azanɛn, a bereng kufet itarak katitu ibong fi ise tsik vit nkum, a bereng inyang iratek ni bɔk wu. 2 A kɔrɔk kuhwyen e, kuhwyen kuzen ayame me, fi ku yet amaan e, ke aShetan ayi. A rosom iko ayɛ agup azining. 3 A barak iko ayɛt kubong fi kutsik ko se vit nkum e, a te kpaf, a di basak nagang-ice-igwɔm, a ku ko ro ni iwɔrɔk banet azatse, tit ma ama ayɛ agup azining e shining. Ama anɔng, ba bi ne ba ku ko nɔɔk kawat nfi kizen gyet.

4 In di ata igwɔm, bayɔng fɛ́ ba di sosok ni na yet bayɔng fɛ́ ba mi ka ba nɔɔk kukyem ira ishɔt. In di nabik bayɔng fɛ́ ba kin tɛsɛng ice bà mok itot ifɛ̀ aYeso, ni ifɛ̀ Adakunom. Bayɔng fɛ́ da ba mang ya kukyɛng ashi me, ni kubannom wu ntong awo. Iba fɛ́ da ba kin shan izizɔ wu na natii bà, ni ni mbɔk bà awo. Ba mi tɛ ba sɛ kutset, ba tsin ya igwɔm na Anet-Isheshek ayɛ agup azining. 5 (Ishɛrɛp bafaben dorok awo, tit ma ayɛ agup azining e shining.) Idoro bafaben ifi imɛsɛng yɔng. 6 Awɛng nɛ ajɛrɛ yet afɛ́ bayɔng fɛ́ ba bi se ni idoro bafaben ifi imɛsɛng e. Iku ifɛ́ afaa bɛ̀ agap naton bá awo, awɛt iba bi yet áware Adakunom nɛ Anet-Isheshek. Ba bi ya igwɔm ni wu ayɛ agup azining.

Kawɛy fɛ́ ka tsin tot aShetan

7 Ama fɛ́ ayɛ agup azining e mi gang, ba bi bisik aShetan na ari inyang e. 8 AShetan e bi wuruk, nɔng i da bin wɔrɔsɔ mben azatse na atsok anaas afɛ́ azatse, fɛ́ ba yet aGog nɛ aMagog, nek ira itsom. Kudot banet e bi se ti izɛk anu izek. 9 Ba nes na narɔ zizɛɛt azatse, ba te karɔ isot banet Adakunom nate, kuwɔp fi iwu shim ko. Awɛt kurong ne azanɛn ku ka ba ya hwyii. 10 Awɛt amaan e, fɛ́ a ka ba wɔrɔsɔ, ba ku worok ni kubong árong fɛ́ a ya na abing-irong-iruk, karɔ fɛ́ ba kin di worok kukyɛng ashi nɛ atan mbɔɔs e. Ba da ka ba nesek izot kunom na katuk, ayɛ na ayɛ.