1 In di kazanɛn kafas nɛ kazatse kafas, nek kazanɛn imɛsɛng e nɛ kazatse imɛsɛng e mi tsang got, izek ti di se awo. 2 In ti in di Kuwɔp aJɛrɛ, fi ku yet aRushelima afas, fi ku tsin tisik fi i ne azanɛn arɔ Adakunom. Ba ku nye gyat tɛ agwol fɛ́ a tsin tot amatek agwol wu. 3 In fok kutɔ kuratek fi ku ne ni kuta igwɔm e, ku fɛ̀ ye, <<Di, yɔkɔnɔng, Adakunom mi te karɔ isonong wu na banet, a da sot gung ni iba. Iba da sot banet wu, na Adakunom ice wu sot gung ni iba, ni iba ku ya ntong.>> 4 A bi ka ba rɛng ngma nayisi na ayisi bá. Iku da ti di se awo, ke kafa kawe, ke kanak, ke npep ikyikak, nek nkyɔrɔk in yame mi tsang got.

5 Iwu ayɔng fɛ́ a se ni sonong ni kuta igwɔm e, a fɛ̀ ye, <<Yɔkɔnɔng, in da nye kaakyi ikyɛng ifas!>> A tɛ a fɛ̀ ni imi, <<Jɛk ideng, nek kucɛɛt kang yet atsak, i se anɔng.>>

6 A tɛ a fɛ̀ ni imi, <<I mi gang! Imi yet Alfa nɛ aOmega, afi Imɛsɛng e ni Gang e. Ngma ayɔng fɛ́ a fok iyɛ ngash, in da ku nɔɔk ashi isɔ fɛ́ a nes ni ikang-ashi kutset, ninang. 7 Ngma ayɔng fɛ́ a ya agap imaas e, a da ya itekari nkyɔrɔk nang, imi da sot Adakunom wu, ni iwu sot arim hom. 8 Awɛt bafi nnyim, na bafɛ́ avit nɔɔk atsak na aYeso, na bafɛ́ iras nkyɔrɔk ngbɛk-gbɛk, na bafi ifɛs banet, na bafɛ́ iras kujang, na bafi iras kubok mbɔɔs, na bafi iya nabannom ntong, nɛ ngma bafi mbɔɔs, karɔ bá yet kubong abing-irong-iruk. Ideng de iyet iku ifɛ́ afaa.>>

9 Azining ayɛt batomaza kanakataat e fɛ́ ba bereng ítsɛ́n kanakataat fɛ́ ba shining ina ni izot kanakataat na fi gang e, a bɛ́ ni imi, a fɛ̀, <<Bɛ́, in da ka tonong agwol e, abining Kitsamang e.>> 10 Wat Kabik Adakunom tik naton hom, atomaza di sok sak ni iriyɔng ihwyanang iratek, a di tonong Kuwɔp aJɛrɛ, aRushelima tsin tisik fɛ́ ne azanɛn narɔ Adakunom. 11 Ku nɛp ni mgbey ízɔk Adakunom, mgbey wu se ti kuta itsom dot, tɛ ajasfa, fi ise gyiri tɛ agyilas. 12 Ka bɛ̀ agbat kafat fi ise zamang gyet awo, na natitu kusɔk abe afaa, na batomaza kusɔk abe afaa fɛ́ ba yɛrɛ na natitu me. Ba jɛk ayerek izít aIsrela kusɔk abe afaa na natitu me. 13 Na kaakyɛ kabak natitu na taat di se, na taat na kabak itarak kunom, na taat abak ice, na taat abatin, nɛ na taat abak ikpa kunom. 14 Ba ta itis inok kafat kuwɔp e ne ata itis kusɔk abe afaa, ni ina ayerek batom-aYeso fɛ́ a yet Kitsamang di se.

15 Atomaza me yɔng fɛ́ a cɛɛt ni imi, a bi kishɛn imaas isop fɛ́ ba nye ni kutsɔm kuseng, nɔng a da maas kuwɔp e, nɛ natitu me, nɛ abat e. 16 Ba kin ta itis kuwɔp e na nabak e se nagbirigbɔng, ngma ni kusɔp ni kugbey e. Atomaza me maas kuwɔp e ni kishɛn imaas wu, a sɛ bakat agup afaa na anakat kusɔk a bɛ afaa (12,000) afi kusɔp e, ni kugbey e, ni kuzamang e me, ngma na na se nagbirigbɔng. 17 Atomaza me maas kubat e, a sɛ kusɔp e se bakat amita anakat nsɔk nnaas ina anaas (144), ni irèn fɛ́ banet di maas narɔ.

18 Ba nok kubat e na ata itsɔm dot fɛ́ ba yes ajasfa, ba nok kuwɔp e na atsɔm-aseng fɛ́ asas, fɛ́ a se gyiri tɛ agyilas. 19 Ba jirim afam-bat itis kuwɔp e, na kaakyɛ kuri ata fɛ́ asas makiyi. Kufi imɛsɛng e, ba nok ba jirim na ajasfa, kufɛ́ afaa ba jirim na asafaya, kufɛ́ ataat ba jirim na akalsedoni, kufɛ́ anaas ba jirim na aemeral (fɛ́ a se tɛ ashi afumung). 20 Kufɛ́ atoon ba jirim na asaronis (a se ti intongkan), kufɛ́ karataat ba jirim na akarneliyan (fɛ́ a yet asɛng), kufɛ́ kanakataat ba jirim na akrisolat (fɛ́ a se tɛ ato afumung azwey e). Kufɛ́ nkara ba jirim na aberil (fɛ́ a se gigyel), ifɛ́ agyɛng-ataat na atofas, ifi kusɔk na akirisofuras, ifi kusɔk abe azining na ajasin, ni ifi kusɔk abe afaa na ametis. 21 Ba nye natitu kusɔk abe afaa me ne ata itsɔm, kaakyɛ katitu bɛ̀ kuzam ata itsɔm e kuzining fi ba nye kusas. Agbat irèn iwɔp e, ba nye iye na atsɔm-aseng wɔɔn na, fɛ a gyɛs gyiri tɛ agyilas.

22 In di kutu iya Adakunom ntong afi iwɔp e awo, nek aTisa Adakunom fɛ́ a wat kaakyɛ ngma, ni Kitsamang e, iba ba ba yet karɔ iya Adakunom ntong e. 23 Kuwɔp e ti ku tsɛt kunom, ke kufɛn ni ku ka ba nɔk mgbey awo, nek ízɔk Adakunom yet mgbey ko, ni Kitsamang e yet agaramun ko. 24 Ngma banet mben azatse da teng ba kaat ayɛt mgbey iwɔp e, bágwɔm azatse ngma bi bɛ́s ni mgbep ba ni kuwɔp e. 25 Vit kunom fɛ́ ba bi fam natitu inɔɔs ni iwɔp e, nek vit katuk azɔng awo. 26 Ba bi bɛ́ ni ízɔk ni iratek mben azatse ngma sak ni iwɔp e. 27 Vit ikyɛng fi i se gbiridik fi i bi nɔ ni iwɔp e, ke afi iras nkyɔrɔk nsum, ke bafi mbɔɔs ayi. Tit bayɔng fɛ́ ayerek bá di se ni jɛk ni kufumung kutset, kufi Kitsamang bi nɔ azɔng.