Mateus 2

Kubɛ́ bafi kutsik irēn

1 Ama kutes aYeso na aBatalami ni mben aJudiya, na aHiridus tsin yet agbat agwɔm ni izen e yɔng. Banet kutsik irēn nse ádat, tsɛ na aRushelima, 2 ba se ni irisim, <<Ayɔng fɛ́ ba tes fɛ́ ayet agwɔm baYahuda me se kɛ? Iyit di yit àdat wu abatin, in bi in ku ya yit ntong.>>

3 Fɛ́ agwɔm aHiridus fok anɔng, a nɔ kudaam, gung nɛ banet aRushelima. 4 Ama fɛ́ a mi tusung ngma bagbat áware, nɛ bágwɔm irēn ntsi aMusa, a ka ba rip karɔ fɛ́ ba fɛ̀ ba di ki tes Anet-Isheshek e. 5 Ba fɛ̀ ni wu, <<Ni wɔp aBatalami ni mben aJudiya, nek ikyɛng de fɛ́ atan e kin jɛk,

6 <Awɛt ngɔn aBatalami,

ni mben aJudiya,

ngɔn wu i rat awosong

ayɛt bágwɔm mben aYahuda awo;

nek ayɛt ngɔn wu fɛ́ agwɔm akak bi di ne,

ayɔng fɛ́ a bi yet anek banet aIsrela.> >>

7 AHiridus yes banet kutsik irēn nse ádat e ni nɛt, a shim a rēn akpaf izen fi iba di di àdat e. 8 A ka ba tom sak na aBatalami me, a fɛ̀ ni iba, <<Tseng yin, tsi tsɛt yin nggon e yelel. Nɔng ki i sɛ yin ika, ni bi ni di tak yin, nɔng in da tsin in ka ka ya ntong.>>

9 Ama fɛ́ ba ma fok ifɛ̀ agwɔm e, ba yit irèn, àdat e yɔng fɛ́ ba di iwu abatin, a ya kashon ni itseng ashon ba, a tsɛ a nyeseng narɔ fɛ́ ba di tes nggon e. 10 Ni izen fɛ́ ba tɛ ba di àdat e, ba nye iyɛ ikan hwyɛ awo. 11 Fɛ́ ba nɔ ari me, ba di nggon e ni nggɔ ka aMarya, ba te gururuk aben, ba ka ka ya ntong. Ama anɔng, ba tarak amala bá, ba nɔɔk kunang nkyɔrɔk itsɔm hwyɛ wo, ata asɛng, aluban nɛ amur*2:11 aluban nɛ amur: Mkpe fɛ́ ba di fesem kurong fi in se hwyɔlɔl nɛ name ikon fɛ́ na se hwyɔlɔl.. 12 Ba tɛ ba bun sak ni wɔp bá; ba kuus irèn ikak zɛɛt, nek Adakunom mi tsang ka ba kɔrɔk kuto na nabos, yɛ da na ba tɛ ba got narɔ aHiridus awo.