Salmos 19

Ukulu wa Nguluwi kuli vilumbigwe

1 Kilanga kwangiwikula ukulu wa Nguluwi,

ulanga wangutawiza mijito ja moko ga heye.

2 Chila zuwa lyanguulonga,

chila nechilo yanguzelesa.

3 Kuduhu nhelo ama ulonzi ulingulonjigwa,

ne lizi lulinguhulikwa,

4 ila lizi lya hewo lyangulutaga kuli isi yeng’ha,

na ulonzi wa hewo kuli kuduma kwa isi yeng’ha.

Nguluwi nakaliwichila isanya honhu hake kuli ulanga,

5 nalyo lyangulawa kota mkasano yalingulawa kuli chihengo cha heye,

lyangusangalala kota munhu yawele na mong’ho yalingubilima kuli nzila ya heye.

6 Lyangulawaga ubanzi umwe,

na kuzunguluta mbaka ubanzi uyage,

haduhu choweza kibagula na ivuche lyake.

Malajizo ga Mkulu Nguluwi

7 Ilajizo lya Mkulu Nguluwi ndo lyenela,

kangumpaga munhu ukomu unyale.

Ulolezi wa Mkulu Nguluwi nawima nzinzili,

kanguwapaga luhala walihela uwanzi.

8 Malajizo ga Mkulu Nguluwi ndo ga hachi,

kangusangalazaga nhumbula.

Mizilo ja Mkulu Nguluwi jahela nongwa,

jangigala lumuli kuli meho.