1 Baalɛ wʋrʋ wɩɛ Kayisariya dɩɛ naŋ baa yagɛ ɩ sɛ Koneliyosi. Wʋ cha wʋ yɩɛ Roma yuora dikpeŋ gaa baa yagɛ ga sɛ Italiya Dikpeŋ yuora gafie bɩnɛ bɛ. 2 Wʋ na wʋ lʋŋtina kpiniŋ cha baa tʋŋ Ɩsʋɔ na dieli sɛ baa se Ɩsʋɔ. Wʋ yɩɛ dɩbam fa ayɔŋtina sɛ wʋ a jɔ dɩga saŋa kʋma. 3 Wɩɩ darɛ aja yɩɛ karafɩɛ atoro wiita sɛ wʋ yu Ɩsʋɔ lɩsɛ kalaa. Wʋ na na dieli gʋ Ɩsʋɔ gabʋɔ kɔŋ wʋ jaŋ, sɛ wʋ yagɛ ɩ sɛ, <<Koneliyosi!>>

4 Sɛ wʋ mʋ nyɩŋtɩɛ kɩɛ ɩ na dieli sɛ wʋ tasɛ ɩ sɛ, <<Kpaŋjuo, be bɛ?>>

Sɛ Ɩsʋɔ gabʋɔ wʋŋ lɩsɛ ɩ nʋɔ sɛ nya dɩga na gafaasa fa ayɔŋtina kɔŋ Ɩsʋɔ asanaŋ takɩɛ nyiŋi gadiesa.

5 Dɩtɩɛna kpiri bakpa ju Yopa na baa ga yagɛ baalɛ wʋŋ baa yagɛ ɩ sɛ Simoŋ Petero na kɔŋ. 6 Wʋ chaɩ Simoŋ wʋŋ wʋ yɩɛ gbaŋsɩba sɛ wʋ waa tirina ɔpʋ na jaŋ.

7 Gʋ Ɩsʋɔ gabʋɔ wʋŋ wʋ tawɩ fa ɩ lam na, Koneliyosi yagɛ wʋ tʋmɩra bala na yuorɛ wʋŋ wʋ a tʋŋ Ɩsʋɔ na dieli na, wʋŋ wʋ yɩɛ baa baa tʋŋ ɩ na tɩba wʋrʋ. 8 Wʋ tawɩ ba bʋrʋkʋma gaa ga tibi na, sɛ wʋ kpiri ba Yopa.

9 Gʋ tɩɛna aja yɩɛ takɩɛ wiita keŋkeŋ gʋ gabʋɔsɛ baa dɔŋ gbɩɛ dʋɔ baa ju sɛ ba tirina dɩɛ janɛ gaa na, Petero jiŋ ju danɛ adugbe na wʋ a ga jɔ dɩga. 10 Dusoŋ chaŋ ɩ sɛ wʋ a ja bʋrʋ garɛ wʋ a di. Gʋ baa tɩŋɛ adiya na, wʋ yu Ɩsʋɔ lɩsɛ kalaa. 11 Wʋ na gʋ Ɩsʋɔ adugbe fulu sɛ bʋrʋ garɛ gaa ga kɩɛna takɩɛ dukuru janɛ lɩɩ Ɩsʋɔ adugbe ga na ga nʋɔbɩsɩ anara gaa kɔŋ tibi. 12 Ga tɩba wɩɛna namɩɛ kʋma baa ba wɩɛna nafara anara, na namɩɛ baa baa kpii ba lorie dʋɔ na jimbisi. 13 Dɩmaŋ sɛ lofu garɛ tawɩ ɩ sɛ, <<Petero, kʋlʋ kʋ na nyaa tawʋ.>>

14 Sɛ Petero tawɩ sɛ, <<Kpaŋjuo, aye! Ma n di ta bʋrʋ gaa ga ba yɩɛ dɩchɩrɩchɩrɩ yaa ga wʋsɛ wɩɛna iniesi i.>>

15 Sɛ lofu gaa ti tawɩ ɩ bʋlatɛ sɛ, <<N baa ti yagɛ bʋrʋ gaa Ɩsʋɔ yɩɛ ga chɩrɩchɩrɩ sɛ ga wɩɛna iniesi.>>

16 Ŋina tibi gbɩɛta butoro, gabʋanaŋ sɛ dukuru gaa bɔrɛ ju Ɩsʋɔ adugbe.

17 Gʋ Petero cha wʋ a fa nfɩɛrɛ Ɩsʋɔ lɩsɛ kalaa ŋii wʋ yu tie na, bakpa baa Koneliyosi kpiri ba na jiŋ diele gaa Simoŋ waa gaa wɩɛ, sɛ ba ga dʋɔsɩŋ ga buonɔ. 18 Sɛ ba kuusi tasɛ sɛ, <<Jɩna sɛ Simoŋ wʋŋ baa yagɛ ɩ Petero chaɩ naa?>>

19 Gʋ Petero saŋ wʋ a fa nfɩɛrɛ Ɩsʋɔ lɩsɛ kalaa ŋii wʋ yu dʋɔ na, Ɩsʋɔ Feliŋ ŋii tawɩ ɩ sɛ, <<Simoŋ, baala batoro* barɛ aja nyaŋ.>> 20 Dɩmʋŋ dʋɔ kʋlʋ na nyaa tibi. N baa mʋ wɩɛ ŋii kpii na nyaŋ na ba ɩ ju, akala takɩɛ maŋ n kpiri ba.

21 Sɛ Petero tibi tie gaa tawɩ baala baa sɛ, <<Maŋ sɛ ɩ jawʋ na. Be dʋɔ sɛ ɩ kɔnɛ?>>

22 Sɛ baala baa lɩsɛ ɩ nʋɔ sɛ, <<Yuora gafie bɩnɛ Koneliyosi n kpiri daa. Wʋ yɩɛ wʋchirigisa sɛ wʋ a se Ɩsʋɔ, sɛ Yudatina baa kpiniŋ a bu ɩ. Ɩsʋɔ gabʋɔ dɩchɩrɩchɩrɩ n tawɩ ɩ sɛ wʋ n yagɛ nyaŋ kɔŋ wʋ waa dʋɔ na wʋ a nyii wɩɛ ŋii nya wɩɛna nyaa tawɩ na.>> 23 Dɩmaŋ sɛ Petero yagɛ baala baa jʋʋ waa gaa dʋɔ na baa yɩɛ wʋ mʋɔra.

Gʋ tɩɛna na, Petero kʋlʋ sɛ wʋ na ba ju, sɛ lɩɛdɩra baa barɛ baa ba lɩɩ Yopa na kpaŋ ba.

24 Gʋ tɩɛna na, wʋ tala Kayisariya. Koneliyosi cha wʋ a kɩɛ ba gbɩɛ sɛ wʋ yagɛ wʋ lʋŋtina na wʋ dɩɛtina baa ba tirina ɩ gaa sɩla. 25 Gʋ Petero jʋʋ waa gaa dʋɔ na, sɛ Koneliyosi jaŋina ɩ sɛ wʋ luuŋ wʋ dʋna dʋɔ wʋ asanaŋ. 26 Ama Petero yela sɛ wʋ kʋlʋ sɛ wʋ tawɩ ɩ sɛ, <<Kʋlʋ, maŋ gba ma yɩɛ wʋkpa bɛ!>>

27 Gʋ Petero a tawɩ wʋ jaŋ na, wʋ jʋʋ waa gaa dʋɔ, sɛ wʋ na bakpa fɔɩ sɩla. 28 Sɛ wʋ tawɩ ba sɛ, <<Amɩɛ tɩŋtɩŋ ɩ jiŋ gʋ daa mbara n fa gbɩɛ sɛ Yuda wʋkpa na wʋŋ wʋ ba yɩɛ Yuda wʋkpa n bʋga yaa wʋ n ju ga bʋɔ wʋ dʋɔ ɔ. Ama Ɩsʋɔ kalaa maŋ sɛ ma n baa tawɩ wʋrʋ sɛ wʋ ba yɩɛ dɩchɩrɩchɩrɩ yaa wʋ wʋsɛ wɩɛna iniesi i. 29 Dɩmʋŋ dʋɔ gʋ ɩ kpiri yagɛ maŋ na, ma n pɩɛ ɛ. Maa dɩlɛ tasɛ amɩɛ kpɩnɩdɩ dʋɔ sɛ ɩ kpiri yagɛ maŋ naa?>>

30 Sɛ Koneliyosi lɩsɛ ɩ nʋɔ sɛ, <<Wɩɛ anara mɩnaŋ dɩmʋŋ saŋa gana karafɩɛ atoro saŋa wiita keŋkeŋ ma wɩɛ ma waa dʋɔ maa jɔ dɩga. Gabʋanaŋ sɛ ma na baalɛ wʋrʋ fuona gagbasɛ aŋalagisa gaa sɩŋ ma asanaŋ, 31 sɛ wʋ tawɩ sɛ Koneliyosi, Ɩsʋɔ nyii n dɩga sɛ wʋ nyiŋi nya afaasa fa ayɔŋtina. 32 Kpiri ju Yopa na baa ga yagɛ Simoŋ wʋŋ baa yagɛ ɩ sɛ Petero. Wʋ yɩɛ mʋɔrɛ bɛ wʋ wɩɛ Simoŋ gbaŋsɩba wʋŋ wʋ waa tirina ɔpʋ na dʋɔ. 33 Dɩmʋŋ dʋɔ sɛ ma kpiri yagɛ nyaŋ gabʋanaŋ, ŋɩ wɩɛ dieli fa nyaŋ gʋ nya kɔnɛ. Dɩtɩɛna daa kpiniŋ dɩ jaŋi Ɩsʋɔ asanaŋ na dɩɩ nyii bʋrʋkʋma gaa Kpaŋjuo dʋ nyaŋ sɛ nya n tawɩ daa.>>

34 Dɩmaŋ sɛ Petero fara wʋ a tawɩ sɛ, <<Dɩtɩɛna ma jiŋ gʋ ŋɩ yɩɛ gasiŋteŋ takɩɛ Ɩsʋɔ ba aa kɩɛ wʋkpa asanaŋ ŋ, 35 ama atawɩ yɩrɩ wʋkʋma naŋ, baa baa se ɩ sɛ baa yɩɛ bʋrʋ gaa ga wɩɛ dieli na, wʋ a lɩɛ ba dʋ. 36 Ɩ nyii wɩɛ ŋii Ɩsʋɔ mʋ kɔna Isiralitina sɛ wʋ mʋna Yesu Kirisito wʋŋ wʋ yɩɛ bakpa kpiniŋ Kpaŋjuo na dʋɔ tawɩ wʋsɛfɩɛ wɩɛ abama ŋii. 37 Sɛ ɩ jiŋ wɩɛ ŋii ŋɩ tibi Yudiya tibi dʋɔ kpiniŋ, ŋɩ fara lɩɩ Galaliya tibi dʋɔ bɛ saŋa gaa Yohane tawɩ Ɩsʋɔ sɔ dʋɔ wɩɛ ŋii wʋrʋgbɩɛ. 38 Ganaŋkʋ Ɩsʋɔ mʋ wʋ Feliŋ na doŋ fa Yesu Nasarati wʋkpa wʋŋ, na ganaŋkʋ wʋ dɔŋ wʋ a kiliŋsi wʋ a yɩɛ dɩbam yela wʋ a chɔ baa Sɩtanɩ di ba dʋɔ na, akala takɩɛ Ɩsʋɔ cha kpi wʋ dʋɔ.>>

39 Sɛ wʋ ju dʋɔ tawɩ sɛ, <<Dɩ yɩɛ seriyatina bɛ fa bʋrʋkʋma gaa wʋ yɩɛ Yudiya na Yerusalem tibi dʋɔ. Ba jɔ ɩ daŋ gasagasa dʋɔ bɛ kʋ ɩ, 40 ama Ɩsʋɔ feŋsi ɩ lɩɩ sɩŋ naŋ wɩɛ atorotɛ sɛ wʋ yela sɛ ba na ɩ. 41 Naa wʋkʋma n na ɩ ɩ, ama seriyatina baa Ɩsʋɔ fɩla lɩsɛ ba na. Daa baa daa na ɩ di sɛ dɩ nyʋɔ na, gʋ wʋ feŋ lɩɩ sɩŋ naŋ na wʋrʋgbɩɛ. 42 Wʋ dʋ daa sɛ dɩ n tawɩ Ɩsʋɔ wɩɛ ŋii fa bakpa, na dɩɩ di seriya takɩɛ wʋŋ n nyina wʋŋ Ɩsʋɔ lɩsɛ takɩɛ wɩɛ diri fa bakɩɛnasa na atatina. 43 Ɩsʋɔ bajana baa kpiniŋ di wʋ wʋsɛ dʋɔ seriya takɩɛ wʋkʋma wʋŋ wʋ lɩɛ ɩ di na, wʋ a yu dɩsʋbʋ mʋ chɩɛ wʋ yɩrɛ naŋ.>>

44 Gʋ Petero saŋ wʋ a tawɩ dɩmʋŋ wɩɛ ŋina na, Ɩsʋɔ Feliŋ kɔŋ baa ba nyii wɩɛ ŋii na kpiniŋ dʋɔ. 45 Sɛ dɩ yɩɛ lɩɛdɩra baŋlɛ karada baa ba kpaŋ Petero kɔŋ na doba takɩɛ Ɩsʋɔ mʋ gafaasa gaa ga yɩɛ wʋ Feliŋ na fa baa ba ba yɩɛ Yudatina na gba. 46 Akala takɩɛ ba nyii gʋ baa tawɩ atawɩ afɔlɩɛ* yela baa kalɩɛ Ɩsʋɔ.

Dɩmaŋ sɛ Petero tawɩ sɛ, 47 <<Wʋrʋ a dɩlɛ gaa bakpa bana gbɩɛ sɛ ba n baa mʋ lɩŋ sɔ ba? Ba yu Ɩsʋɔ Feliŋ takɩɛ ganaŋkʋ dɩ yu na.>> 48 Dɩmʋŋ dʋɔ Petero dʋ sɛ ba n sɔ ba Yesu Kirisito yɩrɛ naŋ. Dɩmaŋ sɛ ba sʋlʋ ɩ sɛ wʋ n cha ba jaŋ wɩɛ akalasa ŋarɛ.