1 Dɩmʋŋ saŋa gana naŋ, Juo Hɛrɔdɩ chaŋ lɩɛdɩra dikpeŋ gaa tɩba barɛ akala takɩɛ wʋ a ja sɛ wʋ a nyala ba. 2 Wʋ yela sɛ ba mʋ yuo dabɩla kʋ Jamesi, Yohane wʋ ŋmɩɛtɩ. 3 Gʋ wʋ na gʋ Yudatina asadi na, wʋ ju dʋɔ ga chaŋ Petero gba. Bodobodo gaa ga Tana Yiisi Asadi Adiya di saŋa sɛ ŋina tibi. 4 Gʋ wʋ chaŋ ɩ wʋrʋgbɩɛ na, wʋ mʋ ɩ tɔ danɛ, sɛ wʋ mʋ ɩ fa yuora akpeŋ anara ŋii dikpeŋ garɛ kʋma yɩɛ yuora banara na. Hɛrɔdɩ yɩɛ wʋ nfɩɛrɛ sɛ ba di Nyiŋi Asadi Adiya di taŋ na, wʋ a lɩsɛ ɩ na baa di wʋ wɩɛ bakpa asanaŋ.

5 Dɩmʋŋ dʋɔ Petero saŋ wʋ wɩɛ danɛ dɩtʋɔtɩŋ, ama lɩɛdɩra dikpeŋ gaa dɩsɛchɩbɛ sɛ ba jɔ dɩga fa Ɩsʋɔ fa ɩ.

6 Yuluma pʋɩ na Hɛrɔdɩ a lɩsɛ ɩ na baa di wʋ wɩɛ na, Petero cha wʋ duwei yuora bala tɩtɩba sɛ ba mʋ agbaraŋgbaraŋ ala pɔgʋ ɩ yela yuora sɩmɩɛɩ danɛ dɩtʋɔtɩŋ buonɔ baa gie ga. 7 Gabʋanaŋ sɛ Ɩsʋɔ gabʋɔ lɩsɛ wʋ wʋsɛ sɛ danɛ dɩtʋɔtɩŋ gaa naŋ ŋmaŋi. Sɛ wʋ jɔ Petero feŋsi ɩ tawɩ ɩ sɛ, <<Kʋlʋ sɩŋ bileŋ.>> Sɛ dɩgbaraŋgbaraŋ gaa ba cha mʋ pɔgʋ ɩ wʋ pamɩɛ naŋ na boli lɩɩ sala.

8 Dɩmaŋ sɛ Ɩsʋɔ gabʋɔ wʋŋ tawɩ ɩ sɛ, <<Fu nya abʋrɩ na nyaa dʋ nya asibita.>> Sɛ Petero yɩɛ dɩmʋŋ. Sɛ Ɩsʋɔ gabʋɔ wʋŋ ti tawɩ sɛ, <<Fu nya adugbe gagba na nyaa kpaŋ maŋ.>> 9 Sɛ Petero kpaŋ Ɩsʋɔ gabʋɔ wʋŋ lɩɩ danɛ dɩtʋɔtɩŋ gaa naŋ. Ama Petero ba jiŋ sɛ ŋii Ɩsʋɔ gabʋɔ wʋŋ cha wʋ a yɩɛ na, a tibi gasiŋteŋ ŋ. Wʋ cha wʋ jiŋ sɛ wʋ yu Ɩsʋɔ lɩsɛ kalaa bɛ. 10 Sɛ ba chɩŋkpɩɛ laŋ kɩɛra asanaŋtina na bʋlatɛ baa dʋɔ, sɛ ba gaa tala nyɩŋgɩrɛ buonɔ gaa baa mʋna baa jʋʋ dɩɛ janɛ gaa naŋ na. Sɛ ga tɩŋtɩŋ ga tʋlʋ fa ba sɛ ba pala lɩɩ. Gʋ ba pala dɩɛ naŋ gbɩɛ bie gaa dʋɔ ju ba asanaŋ chonii na, gabʋanaŋ sɛ Ɩsʋɔ gabʋɔ wʋŋ tʋsʋ Petero dʋɔ.

11 Dɩmaŋ sɛ dɩ ŋmaŋi Petero asa dʋɔ sɛ wʋ tawɩ sɛ, <<Dɩtɩɛna ma jiŋ gʋ ŋɩ yɩɛ gasiŋteŋ bɛ takɩɛ Ɩsʋɔ kpiri wʋ gabʋɔ sɛ wʋ n gaa lɩɛ maŋ lɩɩ Hɛrɔdɩ pamɩɛ naŋ, na bʋrʋkʋma gaa nafʋɔ Yudatina a kɩɛ gbɩɛ sɛ ba n mʋ yɩɛ maŋ na.>>

12 Gʋ wʋ cha na ŋina na, wʋ ju Mariya wʋŋ wʋ bu n nyina Yohane wʋŋ baa yagɛ ɩ sɛ Maakɩ waa dʋɔ, diele gaa bakpa fɔɩ sɩla baa jɔ dɩga. 13 Sɛ Petero jɔ asʋŋ bʋɔlɛ gaa dʋɔ, sɛ tʋmɩrɛ galibie wʋrʋ wʋŋ baa yagɛ ɩ sɛ Roda gaa suŋa kɩɛ sɛ n Mmʋɔ aaŋ jɔ bʋɔlɛ gaa. 14 Gʋ wʋ jiŋ Petero lofu na, wʋ asadi galaŋ sɛ wʋ n tʋlʋ bʋɔlɛ gaa a, sɛ wʋ se ga tawɩ ba sɛ, <<Petero sɩmɩɛɩ buonɔ.>>

15 Sɛ ba tawɩ ɩ sɛ, <<Nya nfɩɛrɛ warɩɛwʋ.>> Gʋ wʋ ju dʋɔ wʋ a tawɩ sɛ ŋɩ yɩɛ gasiŋteŋ na, ba tawɩ sɛ, <<Aja yɩɛ wʋ Ɩsʋɔ gabʋɔ bɛ.>>

16 Ama Petero ju dʋɔ wʋ a jɔ bʋɔlɛ gaa, gʋ ba tʋlʋ sɛ ba na ɩ na, dɩ yɩɛ ba doba. 17 Sɛ Petero ŋɩrɛ ba pam sɛ ba n fu ba nʋɔsɛ dʋɔ. Sɛ wʋ tawɩ ba ganaŋkʋ Kpaŋjuo lɩsɛ ɩ lɩɩ danɛ dɩtʋɔtɩŋ gaa tɩba. Sɛ wʋ tawɩ ba sɛ, <<N tawɩ ŋina fa Jamesi na lɩɛdɩra baa.>> Sɛ wʋ lɩɩ dɩmaŋ ju gatʋŋgʋrʋ.

18 Gʋ tɩɛna nafo na, yuora baa wuliti akala takɩɛ ba ba jiŋ bʋrʋ gaa ga yɩɛ Petero na a. 19 Gʋ Hɛrɔdɩ yela sɛ ba ju ga ja ɩ na dieli sɛ ba n na ɩ na, wʋ tasɛ kɩɛra baa nʋɔnaŋ wɩɛ na dieli sɛ wʋ dʋ sɛ ba n kʋ ba.

Dɩmaŋ sɛ Hɛrɔdɩ lɩɩ Yudiya ju Kayisariya ga cha wɩɛ akalasa ŋarɛ. 20 Hɛrɔdɩ cha wʋ a yuo na Tirositina na Sidoŋtina. Ba yɩɛ nʋɔ garɛ kpiri gabʋɔ ju Hɛrɔdɩ jaŋ. Ba tawɩ Bilasitusi wʋŋ wʋ yɩɛ juo wʋŋ bɩnɩɛ baa tɩba wʋkpari, sɛ wʋ kpa sɛ wʋ a chɔna ba na baa ju Hɛrɔdɩ jaŋ ga ja wʋsɛfɩɛ, akala takɩɛ wʋ tibi dʋɔ sɛ baa yu ba adiya baa lɩɩ.

21 Gʋ wɩɩ gaa Hɛrɔdɩ lɩsɛ si talɛ na, wʋ fu wʋ juori gagbasɛ sɛ wʋ cha wʋ juorigbeli dʋɔ tawɩ wʋ nʋɔnaŋ wɩɛ fa bakpa baa bakpa naŋ. 22 Sɛ ba kuusi na doŋ tawɩ sɛ, <<Panɛ lofu mɩnaŋ, naa wʋkpa a.>> 23 Gabʋanaŋ sɛ Kpaŋjuo gabʋɔ jɔ Hɛrɔdɩ lɔ akala takɩɛ wʋ n mʋ kalɩɛwʋ fa Ɩsʋɔ ɔ, sɛ sieliesi di ɩ sɛ wʋ sɩŋ.

24 Ama Ɩsʋɔ wɩɛ ŋii ju dʋɔ bɩɩ sɛ ŋɩ yalagi.

25 Gʋ Banabasi na Sɔɔlʋ taŋ ba dɩtʋm na, ba lɩɩ Yerusalem bɔrɛ ju Antiyokiya, sɛ ba mʋ Yohane wʋŋ ba ti baa yagɛ ɩ sɛ Maakɩ na kpi ba wʋsɛ dʋɔ.